Ala hele lala hataholi hitu fo lakaneni hataholi kadi'ik kala
6
Faik ndia, Lamatuak Yesus hataholin nala boe lamano'u so. Tehuu sila dede'an nala bubuak dua. Sila luma hataholi Yahudi fo kokolak pake dede'a Aram. Ma luma bali, hataholi Yahudi fo kokolak pake dede'a Yunani. Doo-doo boe ma dede'ak sadu nai bubua kaduak kala ia. Bubuak fo mana pake dede'a Yunani, ala ta malole lo bubuak mana pake dede'a Aram. Ala lae, “Ia ta malole! Mete ma ei ba'e nana'ak tungga faik, na, boso benu selik! Te ai ina falun nala ta hambu baba'en nala.”2 Huu ndia de, Lamatuak nadedenu kasanahulu duan nala, loke basa Lamatuak Yesus hataholin nala fo lakabubua. Boe ma ala kokolak lae, “Basa tolanoo nggala ei! Mete ma ai hahae fo kada makaneni ei nana'a-nininum, ndia bisa boe, tehuu ndia ta nandaa. Huu ai ia musi fee nanonolik la'e-neu Manetualain Dede'a-kokolan nakandondoo henin. 3 De ai dudu'an leo iak: malolenak ei hele mala hataholi hitu leme ei mai. Sangga hataholi fo naden malole, bisa nanonoo no sudi see, ana bubuluk dede'ak no'uk, ma Manetualain Dulan heti ndia sodan. Mete ma ei hele mala hataholi mata leo ndiak so, na, dei fo ai so'u sala fo lakaneni la'e-neu nana'a-nininuk ndia. 4 No leo ndiak, ai bisa hule-haladoi no'un lena ma fee nanonolik la'e-neu Manetualain Dede'a-kokolan.”
5 Boe ma ala lakaheik Petrus asa kokolan ndia. De ala hele lala hataholi hitu. Sila:
hataholi esa, nade Stefanus. Ndia ndia namahele tebe-tebe neu Lamatuak Yesus, ma Manetualain Dula-dale Malalaon paken. Ma nonoo fe'en nala, sila:
Filipus,
Prokorus,
Nikanor,
Timon,
Parmenas,
ma Nikolas, neme kota Antiokia mai. Ndia ta hataholi Yahudi, tehuu ana maso anggama Yahudi so.
6 Boe ma ala loo hataholi kahituk kala, fo ala helek sila so, leni Lamatuak nadedenun nala leu. Boe ma nadedenuk kala sila, lalaa liman nala ma hule-haladoi, fo so'u sala dadik hataholi mana makaneni nana'a-nininuk, suek basa hataholi kadi'ik kala hambu baba'ek sama.
7 De Manetualain Dede'a-kokolan nala latanggelak sudi nai bee. Ma hataholi mana tungga Yesus Dala Sodan ndia, boe lamano'u lakandondoo henin nai Yerusalem. Boe ma malangga anggama Yahudi no'uk maso leni Yesus hataholin nala leu boe.
Ala humu lala Stefanus
8 Faik ndia Manetualain natudu dale malolen no'uk neu Stefanus. Ndia boe oo, fee koasa fo Stefanus bisa tao tanda heran ma dede'ak fo ana seli, suek hataholi no'uk kala lita no mata de'e hehelin nala. 9 Nai ndia hambu hataholi Yahudi hida leme mamana dook mai. Fo ndia kota Kirene, kota Aleksandria, propensi Kilikia, ma propensi Asia. Makahulun ala dadik hataholi fe'ek atan, tehuu doo-doo boe ma sila malanggan mbo'i heni sala. Boe ma hataholi la lakabubua lai Yerusalem. Ala lateme maso leni Uma Huhule-haladoik esa neu nade, ‘Nakambo'ik neme ata mai’. Boe ma la'i esa lamanene Stefanus kokolan so, tehuu ala ta hii, boe ma ala mulai lasisimbo bafak loon. 10 Tehuu Stefanus ndia hataholi fo malelan seli, huu ana kokolak pake koasa neme Manetualain Dula-dale Malalaon mai. Huu ndia de ala ta senggin. 11 De ala sangga dala manggalauk. Boe ma leu kosu lala hataholi hida fo suek leu kokolak pepekok lae, “Ai mamanene hataholi ia, kokolak ta malole neu Musa no Manetualain! Ndia memak, kokolak nakadadaek leo ndiak!”
12 Ala dudunggu-mbambau hataholi la, losa hataholi Yahudi lasi hadan nala, ma mese anggama la, lamanene boe. Lamanene leo ndiak, boe ma ala luli. Basa de leu humu lala Stefanus, de ala hela loon neni mamana naketu dede'a anggama neu. 13 Sila sakasii pepekon nala tui dula mata-matak la'e-neu Stefanus lae, “Hataholi ia nambue kokolak manggalauk nakandondoo henin, la'e-neu Uma Ina Huhule-haladoik. Ma ndia boe oo, nahiik kokolak naboboo Manetualain palendan nala fo ba'i Musa nakondan neu ita so. 14 Ai boe oo mamanene ana kokolak so nae, Yesus hataholi Nasaret ndia sangga tao natu'u Uma Ina Huhule-haladoik ia. Ma ndia boe oo sangga ofe heni basa ita hadan heti-heun, fo ba'i Musa nakondan neu ita so!”
15 Basa boe ma, basa hataholi mana langgatuuk lakabubua lai mamana naketu dede'a anggama ndia, mete neulalau Stefanus, huu ndia matan leo Manetualain ata nusa sodan nala matan.