Ananias no Safira mate, huu ala soba Manetualain Dulan
5
Tehuu faik ndia boe oo touk esa, nade Ananias. Saon nade Safira. Dua sala se'o dae bibiak esa boe. 2 Tehuu dua sala lala halak, fo lafuni doik luma neme dae ndia belin mai. Se'o basa dae ndia, boe ma Ananias neu nafada Lamatuak nadedenun nala nae, “Bei fo ai se'o heni dae bibiak esa. Hatematak ia, ai sangga fee basa doin neu Manetualain.” 3 Tehuu Petrus sapa nae, “Wee! Ananias! O ia ana seli ma! Talo bee de o mafuni doik neme dae fo o se'ok ndia? O dalem manggalauk nalan seli, huu o tungga nitu la malanggan hihiin. O mambalani pepeko Manetualain Dula-dale Malalaon! 4 Leo iak! O nau se'o dae ndia, do ta se'o, neme kada o mai. Mete ma o se'on so, o nau fee doin katemak, do ta boe oo, neme kada o mai. Tehuu talo bee de losa o tao leo ndiak? O soba-soba tao mamanggoa ai hataholi ia, tehuu ta hambu hataholi bisa tao namanggoa Manetualain!”
5 Ananias namanene Petrus kokolak leo ndiak, boe ma kada nggengge neuk ana bala neu dae, de mate tutik kana. Boe ma basa hataholi mana lamanene halak ndia, bii lalan seli. 6 Basa boe ma tou ana muli-soluk hida maso, boe ma ala mbomboti Ananias mbombolan, de leu latoin.
7 Basa de meda li'u telu bali, boe ma Ananias saon maso mai. Tehuu ana ta bubuluk dede'a mana dadik ndia. 8 Boe ma Petrus natanen nae, “Leo bee ina? Ina sala se'o heni dae ndia no belin leo iak, do?”
Boe ma ana nataa nasafali nae, “Tetebes Ama. Belin leo ndiak so.”
9 Boe ma Petrus sapa nae, “Talo bee de o mua o saom, mala halak fo sangga soba Manetualain Dulan? O mete leo! Hataholi mana leu latoi o saom, ala fali so. Ta dook bali, te ala ndolo leni o mbombolam fo leu latoin neu o saom boboan boe.”
10 Inak namanene Petrus kokolan ndia, boe ma kada nggengge neuk ana tu'u neu, de mate tutik kana neu mamanak ndia. Ledo-eik tou ana muli-soluk kala maso fali, ala mete te inak ndia boe oo maten so. Boe ma ala ndolo leni mbombolan, de leu latoin neu saon boboan.
11 Boe ma hataholi mana lamahele neu Yesus, ala bii. Ma basa hataholi fe'ek fo mana lamanene la'e-neu Ananias no Safira mamaten ndia, ala bii boe.
Petrus asa tao lahai hataholi no'uk
12 Faik ndia, Yesus nadedenun nala tao tanda heran no'un seli, de hataholi la lita. Nadedenuk kala sila lahiik maso leni Manetualain Uma Ina Huhule-haladoin leu. Ala lakabubua dalek esa, nai Mane Soleman Uma Loos. 13 Faik ndia boe oo, hataholi no'uk koa Lamatuak Yesus hataholin nala. Tehuu mete ma hataholi bei ta namahele Yesus, na, ana ta nambalani maso neu nakabubua no sala lai ndia.
14 Tehuu hataholi mana lamahele Yesus, tamba faik boe lamano'u. Hambu touk ma hambu inak boe. 15 Faik ndia dadi leo ndiak so, losa hataholi la lo hataholi kamahedik kala mai, fo tao sala leu nene'ik lain, neu dalak bifin. Huu ala dudu'a lae, “Mete ma Petrus no Yohanis lesik ia, na, mae kada la'e dua sala salaon boe oo, hataholi kamahedik kala ia bisa hai.” 16 Basa boe ma hataholi la mai ta lamaketu, leme nggolok kala manai kota Yerusalem bifin mai. Ala ndolo leni sila hataholi kamahedin nala, boe ma Lamatuak nadedenun nala tao lahai basa sala. Sila boe oo, leni sila hataholi nitu nalak kala, boe ma Lamatuak nadedenun nala husi kalua heni basa nitu sila.
Lamatuak Yesus nadedenun nala hambu toto'ak
17 Huu Lamatuak Yesus nadedenun nala uen, de malangga anggama Yahudi malangga ina-huun no nonoon nala leme paltei Saduki mai, lesuha'in nala lakase'e. 18 Huu ndia de ala leu humu lala Yesus nadedenun nala, fo landee sala leni bui dale leu.a
19 Tehuu le'odae, boe ma Manetualain ata nusa sodan esa neni bui dale neu, de soi heni lelesun. Boe ma noo sala leni deak leu. De ana helu nae, 20 “Hatematak ia, ei dua nggei miu memak mini Manetualain Uma Ina Huhule-haladoin miu. Miu mafada basa-basan neu hataholi malai ele, fo ala tungga Lamatuak Dalan fo mana Neni Soda Beuk ia.”
21 Fo'a fafain, ala tao tungga Manetualain ata nusa sodan hehelun ndia. Boe ma ala maso leni Uma Ina Huhule-haladoik pasan leu, de ala lanoli hataholi nai ndia.
Ta dook bali, boe ma malangga ina-huuk ndia no nonoon nala mai sama-sama lo basa hataholi ina-huuk ma lasi hadak kala leme Israel katematuan mai. Ala lakabubua fo sangga palisak dede'a anggama la'e-neu Lamatuak Yesus nadedenun nala. Boe ma ala ladenu hataholi mana manea fo leu ha'i Petrus asa leme bui mai, fo ala sangga lakaneni dede'ak ndia.
22 Tehuu ledo-eik hataholi mana manea losa bui, Petrus asa taak kasa so bali. Boe ma hataholi mana manea leu lafada hataholi ina-huuk kala manai mamana naketu dede'a anggama ndia. 23 Ala lafada lae, “Ama nggala ei, boso luli. Ledo-eik ai losa bui, ai mita basa lelesu nana nggoe nisak. Ma basa mana manea lambadeik lai ndia. Tehuu ledo-eik ai madenu sala soi lelesu fo ai maso, ai ta mita hata esa boe.”
24 Malangga anggama Yahudi malanggan nala ma malangga mana manea Manetualain Uma Ina Huhule-haladoin lamanene leo ndiak, boe ma basa sala lamanggonggoak, huu mopo dudu'an nala so.
25 Basa boe ma hataholi esa mai nafada nae, “Ama nggala ei, mamanene dei! Hataholi la fo ei kena sala leme bui ndia, sila deak ia! Hatematak ia ala lambadeik fo lanoli hataholi lai Uma Ina Huhule-haladoik ia!”
26 Malangga mana manea Uma Ina Huhule-haladoik namanene leo ndiak, boe ma noke nala ana mana tunggan nala, fo leu humu seluk Petrus no nonoon nala. Tehuu ana mana tunggan nala bii, huu hataholi no'uk lamanene Petrus kokolan. Ala dudu'a lae, “Boso losak hataholi no'uk kala manggalau, boe ma ala mbia ita lenik batu.” Huu ndia de ledo-eik ala humu seluk Petrus asa, ala ta lambalani humu no nakasetik.
27 Boe ma ala lo Petrus asa leni mamana naketu dede'ak leu. De malangga ina-huuk mulai natane sala 28 nae, “Ai ka'i ei so, fo boso manoli hataholi no'uk la'e-neu Hataholi fo nau neni dala soda beuk ndia, hetu?! Ei ia, langga batuk! Ei ta nau mbali ai palendan bali, te ei tao tunggga kada ei hihiim! Ei miu fee nanonolik ndule kii-konak nai kota Yerusalem ia. Sama leo ei mbia salak neu ai mae, ai ndia madenu hataholi fo leu tao lisa Yesus.”b
29 Boe ma Petrus nambadeik fo dadik basa nadedenuk kala mana kokolan. De nataa nae,
“Ama nggala ei! Mete ma hambu hataholi palendan laban Manetualain hihiin, na, ai ta bisa tunggan. Tehuu ai musi tungga kada Manetualain palendan! 30 Hataholi fo mana soi ai dala soda beun, ndia Yesus. Ndia ndia, Hataholi fo ei mbaku misan neme ai ngganggek so. Neme makahulun mai, ita ba'in nala lahiik hule-haladoi neu Manetualain. Manetualain ndia, fo mana tao nasoda falik Yesus neme mamaten mai so!
31 Hatematak ia Manetualain so'u nala Yesus dadik Ndia lima konan so. Boe ma Yesus to'u koasa sama leo mane ina-huuk. Ana soi dalak so, fo hataholi lakambo'ik leme sila sala-singgon nala mai. Ana nau fee dalak neu ita hataholi Israel ia, fo ita hahae neme basa ita sala-singgon nala mai, de fali fo tungga Manetualain dala ndoon. No leo ndiak, Manetualain dalen bisa dadik makasufuk losa Ndia ta nita ita nusa Israel sala-singgon so bali. 32 Te ita tita no mata de'e hehelik so tae, memak Yesus maten so, tehuu Ndia nasoda fali. Hatematak ia, Manetualain Dula-dale Malalaon boe oo nafada dede'ak ia neu hataholi, fo mana tungga Yesus Dala Sodan.”
33 Basa hataholi mana manggatuuk lai mamana naketu dede'ak lamanene basa Petrus kokolan leo ndiak, boe ma ala mulai manggalau losa ala nau tao lisa Lamatuak nadedenun nala. 34 Tehuu hambu hataholi esa nanggatuuk nai ndia tungga palisak dede'ak ndia boe. Nade Gamaliel. Hataholi no'uk fee hada-holomata neun, huu ndia ia paltei anggama Farisi mesen esa fo malelan seli. Ledo-eik Petrus kokolak nate'e so, fo ala sangga tao lisan, boe ma Gamaliel nambadeik de nadenu hataholi la loo tataak Petrus asa deak leu. 35 Ledo-eik ala kalua so, boe ma ana kokolak neu malanggan nala sila nae,
“Basa tolanoo nggala ei! Ita musi mata neuk, bou! Boso losak ita hailai tao manggalauk neu hataholi la ia. Ita musi dudu'a naluk dei. 36 Ei bei masaneda hataholi esa, nade Teudas. Ana mate dook ia so, tehuu neu faik fo bei nasoda, ana so'uk aon nae, ndia hataholi ina-huuk, losa meda hambu hataholi natun haa tunggan. Tehuu neu faik fo hataholi tao lisan, ana mana tunggan nala lalai latanggelak, losa hatematak ia, hataholi mana tungga ndia, ta mita mata-idun nala bali. Ala lalai mopo so!
37 Boe ma ei musi masaneda tutuik esa bali. Faik ndia nandaa no mana palenda sulak hataholi manai nusak katematuan dedesin. Hambu hataholi esa nade Yudas, neme propensi Galelea mai. Hataholi no'uk tunggan boe. Tehuu ala tao lisan boe. Boe ma hataholi mana tungga ndia boe oo lalai toliuk kii-konak losa ta lita sala so bali.
38 De hatematak ia, tolanoo nggala ei, au dudu'ang kada leo iak: boso tao misa sala. Kada ela sala leme naa. Te sila nanonolin ma sila tataon ndia, mete ma neme hataholi mai, na, ta nakatataka nala dook bali, neu ko mopo henin so. 39 Tehuu mete ma nanonolik ia memak neme Manetualain mai, na, dei fo ei ta bisa tao matuda sala. Huu ndia de ei mata neuk dei. Te boso losak ei mesa nggei laban Manetualain.”
Basa sala lamanene leo ndiak, boe ma kada lakaheik tungga Gamaliel nanoli-nafafadan. 40 Basa boe ma loke nadedenuk kala maso, de ladenu hataholi la filo sala. Filo basa, boe ma ala ka'i ta bole seseik Yesus naden bali. Basa boe ma ala mbo'i heni nadedenuk kala sila.
41 Basa boe ma nadedenuk kala sila kalua la'o ela mamana naketu dede'ak ndia. Ala dudu'a lae, mae sila naden naboo so, huu ala tungga Yesus so, tehuu lameda lamahoko boe, huu Manetualain taok sila landaa hambu toto'ak leo ndiak so. Huu ndia de dalen nala lamahoko lalan seli. 42 Boe ma tungga faik leu lanoli hataholi lae, “Hataholi fo Manetualain tudu memak kana neme makahulun mai so, ndia Yesus.” Boe ma lafada dede'ak ndia nakandondoo henin nai hataholi uman nala, ma nai Uma Ina Huhule-haladoik boe.