Anggama Yahudi malanggan nala loke Petrus no Yohanis mai lasale sala
4
Faik ndia, Petrus no Yohanis bei kokolak lo hataholi la sila, te hataholi ina-huuk hida mai. Sila luma malangga anggama Yahudi, malangga mana manea Uma Ina Huhule-haladoik ma hataholi leme paltei anggama Saduki mai. Ala mai lasisimbo bafak lo Petrus ma Yohanis. 2 Hataholi ina-huuk kala sila luli, huu dua sala lahiik lafada basa hataholi lae, “Yesus nasoda fali neme mamaten mai so. No leo ndiak, Ana soi dalak fee hataholi mana matek kala, fo sila boe oo bisa lasoda fali.”a 3 Boe ma ala palenda sila hataholin fo leu humu dua sala. Tehuu ledo sangga tesa so, boe ma landee dua sala leni bui dale leu. Suek fo'a mai, bei fo ala sangga lakaneni dede'ak ndia.b 4 Tehuu neme hataholi mana mahiik lamanene nadedenuk kala sila, hataholi no'uk manaku so lae, hata fo lanolik kala sila, memak tetebes. Huu ndia de sila hataholin nala boe lamano'u meda losa hataholi lifun lima. 5 Fo'a mai, boe ma hataholi Yahudi hataholi ina-huun nala lakabubua lai kota Yerusalem. Ndia, malanggan nala, lasi hadak kala, ma mese anggama Yahudi la. 6 Ma malangga anggama Yahudi malangga ina-huun nai ndia boe. Ndia naden Hanas. Hataholi ina-huu fe'ek kala, ndia Kayafas, Yohanis, Aleksander, ma malangga ina-huuk bobonggi fe'en nala lai ndia boe. 7 Ledo-eik basa sala maso so, boe ma ala palenda hataholi fo leu ha'i Petrus no Yohanis fo mai lasale malanggan nala sila. Ledo-eik ala maso so, boe ma latane lae, “Talo bee de ei bisa tao mahai hataholi lu'uk ndia? Ei pake see koasan? See ndia nakambo'ik fo ei mambalani tao leo ndiak?”
8 Boe ma Manetualain Dulan tao nambalalani Petrus, de ana nataa nae,
“Ama nggala ei, fo mana dadik hataholi ina-huuk ma lasi hada nusa Israel asa! Boso mamanasa, mete ma ai masapangga faa. 9 Nonook leo ama sala sangga tao dede'ak no ai, huu ai tulun tao mahai hataholi lu'uk esa so. Boe ma ama sala sangga bubuluk ai pake see koasan? 10 De au sangga ataa leo iak: neu ko ama sala bei lasaneda hataholi Nasaret ndia, fo naden Yesus. Ndia ndia Karistus, fo Manetualain tudu memak kana neme makahulun mai so. Ei mbaku misan neme ai ngganggek so. Tehuu Manetualain tao nasoda falik kana neme mamaten mai so. Au nau ama sala ma basa hataholi nusa Israel kada bubuluk, te ai tao mahai hataholi lu'uk ndia pake Yesus koasan. 11 Yesus ia, fo ala sulak memak kana nai Manetualain Susula Malalaon so nae,
‘Hambu batu esa tukan nala nggali henin so;
tehuu hatematak ia batu ndia dadik batu netes so.’c
12 Nai dae-bafok katematuan, Manetualain ta soi dala fe'ek bali, fo nasala'e ita neme ita sala-singgon nala mai. Kada dalak esak, ndia Yesus. Mete ma Ndia taa, na, ta hambu hataholi fe'ek esa bali, fo bisa nasala'e nala ita.”
13 Hataholi mana langgatuuk nai ndia, ala bubuluk lae, Petrus no Yohanis ndia, kada hataholi kadi'ik, sama leo hataholi ta mana sulak ma lees lalelak. Tehuu ala heran lalan seli neu dua sala kambalanin, huu ala kokolak ta pake babaak. Nakalenak bali ala bubuluk lae, hataholi kaduak kala sila, eik esa lo Yesus. 14 Huu ndia de bafan nala nana seuk so, losa ta bisa kokolak no'uk bali, nakalenak hataholi lu'uk mana haik ndia, nambadeik neulalau nai ndia boe, ndandaak neu mata idun nala. 15 Boe ma ladenu Yesus nadedenu kaduan nala sila lae, “Ei dua nggei kalua tataak dei.” Boe ma lakokola fo sangga dalak. 16 Ala lakokola lae, “Tolanoo nggala ei! Ita musi tao hata neu hataholi kaduak kala ia? Huu basa hataholi manai Yerusalem bubuluk so lae, dua sala tao tanda heran ia. Ita nau talelesi hata bali, te butin ndia so. 17 Malolenak ita sangga dalak, fo suek dede'ak ia ta losa nggenggela nai sudi bee bali. Malolenak ita takabibiik dua sala, fo boso ala fee nanonolik bali la'e-neu Yesus Dala Sodan. Mete ma losa ala ta nau lamanene, na, ala lalelak aon leo!”
18 Boe ma ala loke hataholi kaduak sila maso fali, de lafada sala lae, “Mata neuk, bou! Ei ta bole manoli hataholi la'e-neu Yesus bali!”
19 Tehuu Petrus no Yohanis lataa lae, “Hena ama sala dudu'a aon leo. Bee ndia malolen lena? Tungga ama sala palendan, do tungga Manetualain palendan? 20 Te ai mita no ai mata de'e hehelin so, ma ai mamanene no ai ndi'i doo hehelin la'e-neu dede'ak no'uk so. Talo bee de ai musi seu bafak, losa ai ta bisa mafada hataholi bali!”
21 Boe ma hataholi mana manggatuuk lakaneni dede'ak sila, ka'i seluk kasa bali. Boe ma ala mbo'i heni hataholi kaduak kala sila, huu ala ta bubuluk sangga huku sala leo beek bali. Ma ala bii boe, boso losak hataholi no'uk manai deak, ala manggalau. Ala koa-kio Manetualain, huu hataholi lu'uk ndia hai so. 22 (Hataholi ndia lu'u lena teuk haa hulu so, bei fo ana bisa la'ok.)
Yesus hataholin nala hule-haladoi loke fo boso ala bii
23 Ledo-eik ala mbo'i heni Petrus no Yohanis, boe ma dua sala fali leni nonoon nala leu. De ala tui basa hata fo malangga anggama Yahudi malanggan nala ma lasi hadak kala ka'i sala so. 24 Basa nonoon nala lamanene leo ndiak, boe ma lakabubua dalek esa, de hule-haladoi lae, “Manetualain fo Mana Koasa Nai Lain Seli. Ama fo mana makadadadik lalai ma dae-bafok no basa isin nala.d 25 Makahulun Manetualain Dula-dale Malalaon pake ba'i Dauk dadik Manetualain mana kokolan so. Ana nafada memak nae, dei fo hataholi laban Yesus. Ana sulak nae:
‘Hataholi leme nusa fe'ek kala mai luli so, huu dede'a ani;
Kada ala ladabak so, fo tao dede'ak fo huu-oka taak.
26 Manek kala lai dae-bafok ia, lakabubua fo sangga latati laban Lamatuak;
ma malanggan nala lala halak fo leu laban Manetualain no Karistus, ndia Hataholi fo Manetualain tudu memak neme makahulun mai so.’e
27 Hata fo ba'i Dauk sulak ndia so, hatematak ia dadi so. Ma hatematak ia ndandaan manggaledok so. Memak nai kota ia, mane Herodes no nggubenol Pontius Pilatus lakabubua lo ai lasi-lasi Israel asa, ma nusa fe'ek kala malanggan nala. Boe ma basa sala lala halak fo laban Yesus, ndia Hataholi fo Manetualain hele memak kana so.f 28 Tehuu hatematak ia ita bubuluk basan nandaa no Manetualain hihiin so, tungga hata fo Manetualain naketu memak kana neme makahulun mai so. 29 Hatematak ia Manetualain mete sudik, te ala tao lakabibiik ai. De ai moke Manetualain tao nambalani ai. Fo ai miu mafada hataholi sudi lai bee, Manetualain Tutui Malolen la'e-neu Yesus. Ma ai ta paluu bii hata-hata. 30 Ai boe oo moke fo Manetualain fee ai koasa, fo bisa tao mahai hataholi kamahedik kala. Ai boe oo moke koasa fo tao tanda heran mata-matak, suek hataholi la bubuluk lae, koasa ndia neme Hataholi Malalaok fo Manetualain nadenun mai, ndia Yesus. Manetualain, ai huhule-haladoin kada leo iak.”
31 Ala hule-haladoi, te uma fo lakabubua lai ndia, nangge'o. Boe ma Manetualain Dula-dale Malalaon nala basa sala. Basa boe ma ala kalua leu tui-bengga Manetualain Hala Malolen ta no babaak.
Hataholi kamahelek kala lasoda lemba belak sama-sama, ma lamahoko sama-sama
32 Basa boe ma basa hataholi mana lamahele neu Yesus, dalek esa ma lasue ao esa no esa. Ta hambu hada kodek, lahiik baba'e sudi hata neu fe'ek kala. Esa-esak no bua hehelin, ala pake sama-sama.g 33 Boe ma Manetualain fee koasa neu nadedenun nala, fo lafada hataholi lae, Lamatuak Yesus nasoda fali neme mamaten mai so. Ala lita no mata de'e hehelin nala so. Boe ma Manetualain fee sala baba'e-babatik makadotok. 34-35 Neme sila mai, hambu hataholi se'o daen, do uma hehelin boe. Ana fee doin neu Lamatuak Yesus nadedenun nala. De ala pake lakaneni neu hataholi no'uk kala paluun. Huu ndia de ala ta kulan hata esa boe.
36-37 Conto leo Yusuf. Ndia ia, Lewi numbu-sadun neme pulu Siprus mai. Lamatuak nadedenun nala loke tungga nade kadi'in lae, ‘Barnabas’, te nadek ndia ndandaan nae, ‘hataholi fo mana nahiik tao natetea hataholi fe'ek’.) Ana neu se'o heni daen bibiak esa, boe ma neni doin neu Lamatuak Yesus nadedenun nala.