Petrus tao nahai hataholi lu'uk esa
3
Faik esa, li'u telu ledo bobon, Petrus no Yohanis leni Manetualain Uma Ina Huhule-haladoin leu, fo sangga hule-haladoi lo hataholi fe'ek kala. 2 Ala sangga maso lesik lelesu ina esa, nade ‘Lelesu Malole’. Nai ndia lita touk esa, ein lu'uk memak mulai neme inan bonggin mai. Tungga faik, hataholi la lu'a loon neni mamanak ndia neu, fo suek ana bisa hule sudi hata neme sudi see mai, fo mana sangga maso neni Uma Ina Huhule-haladoik ndia neu. 3 Ledo-eik ana nita Petrus no Yohanis sangga maso dalek leu, boe ma ana look liman fo noke nae, “Ama nggala ei! Kasian neu au dei. Fee au hata dei.” 4 Dua sala mete neulalaun, boe ma Petrus nae, “Ka'a! Suli ia dei!”
5 Boe ma hataholi ndia botik matan, fo suli dua sala, ma ana dudu'a nae, “Wei! Neu ko dua sala ia, nau fee au hata-hata.”
6 Tehuu Petrus nae, “Ka'a! Au doing ta sen esa boe. Tehuu hatematak ia, au sangga fee ka'a hata fo au aena. Ka'a mamanene neulalau, baa! No koasa neme Yesus Karistus fo hataholi Nasaret mai, au adenu ka'a fo'a mambadeik fo la'ok leo!”
7 Boe ma Petrus to'u nala hataholi lu'uk ndia lima konan, de tulun hela nambadedein. Faik ndia boe oo, ein nala hai tutik. 8 Kada nggengge neuk, ana palaboku nambadeik, boe ma mulai la'ok neu-mai fo soba ein nala. Basa boe ma ana maso tungga neni Uma Ina Huhule-haladoik neu sama-sama no dua sala. Ana la'ok boku-boku, ma koa-kio Manetualain. 9 Boe ma basa hataholi litan la'ok, ma koa-kio Manetualain.
10 Ledo-eik ala lalelak kana, boe ma ala lamanggonggoak, de lae, “Ndia ia, hataholi lu'uk fo mana hule sudi hata, fo nateme nanggatuuk nai Lelesu Malole, hetu? Leo beek de bisa leo ndiak, bae?”
Petrus kokolak neme Uma Ina Huhule-haladoik
11 Basa boe ma hataholi ndia tungga deka-deka no Petrus ma Yohanis. Telu sala losa uma loos esa nade, ‘Uma Loos Mane Soleman’. Boe ma basa hataholi mai lakalilimbu lala sala, ma heran lalan seli. 12 Ledo-eik Petrus nita hataholi la sila, boe ma ana kokolak nae, “Heeh! Hataholi Israel asa! Hatina de tolanook kala heran mita dede'ak ia? Hatina de ei mambue mete ai makandoo? Ei mae hetuk hataholi ia bisa la'ok, huu ai pake malelak, do, huu ai manggate tungga Manetualain? Do, leo bee? 13 Au sangga afada leo iak: ita bei-ba'in nala, ndia ba'i Abraham, ba'i Isak ma ba'i Yakob lakaluku-lakatele neu Manetualain. Manetualain ndia so'u dema-demak Ndia Hataholin fo Ana hele nalan so, fo ndia Yesus. Yesus ndia Hataholi fo fai maneuk ei mbia henin, ma feen neu nggubenol Pilatus. Nggubenol nau mbo'i henin, tehuu ei laban ndia hihiin fo suek boso mbo'i heni Yesus.a 14 Tehuu Yesus ndia, Hataholi esa sala taak. Dalen malole. Nggubenol nau mbo'i heni Hataholi sala taak ndia, tehuu ei basa nggei laban ndia. Boe ma manggalaun lena bali, ei mbau-edo fo madenu ndia mbo'i heni hataholi manggalauk esa, fo mana tao nisa hataholi, fo fee falik kana neu ei.b 15 Boe ma ei tao misa Yesus. Naa te Ndia dadik okak neme basa mana masodak mai. Memak Ana mate so, tehuu Manetualain tao nasoda falik kana neme mamaten mai so. Ma Ndia ia, fo ita titan no ita mata de'e hehelin so.
16 Ei malelak hataholi lu'uk ia so. Hatematak ia ndia balakaik so, tehuu ai ta ndia tao mahain. Ai ta maena koasa hata-hata. Koasa ndia kada neme Yesus mai. Hataholi ia balakai fali so, huu ana namahele neu Lamatuak Yesus. Huu Yesus ndia tao nahain nai ei matam so.
17 Basa tolanoo nggala ei! Hatematak ia au bubuluk ae, ei ma ei malanggam mala tao manggalauk neu Yesus so, tehuu ei ta bubuluk nenenin nala. 18 Tehuu Manetualain nafada memak kana neme lele uluk mai so, pake Ndia mana kokolan nala nae, Karistus fo ndia Hataholi fo Ana helek ndia so, musi lemba doidosok. Ma hatematak ia, dede'ak ndia dadi so. 19 Huu ndia de ei musi la'o ela ei sala-singgom mala, fo fali mini Manetualain miu, fo suek Ana koka heni ma ta nasaneda ei sala-singgom mala bali. 20 Dei fo Manetualain natetea ei dalem. Ma Manetualain boe oo, nau nadenu falik fee ei, Karistus fo Ana hele nalak so. Ma Karistus ndia Yesus fo Ana nadenu nitak fee ei so. 21 Neme lele uluk mai, Manetualain kokolak pake Ndia mana kokolan nala so nae, ‘Dei fo Manetualain tao nandoo basa dede'ak losa basan dadik beuk.’ Boe ma Yesus musi nahani nai Ndia Mamana Malalaon, losa fain mai, fo tao basa dede'ak kala dadik beuk.
22 Lele uluk ba'i Musa boe oo, kokolak nitak neu hataholi Israel nae,
‘Dei fo ei Manetualain mana naena haak palenda ei, nadenu Hataholi esa neme ei mai fo dadik Ndia mana kokolan, sama leo Ana pake au dadik Ndia mana kokolan. De ei musi pasa ndi'i dook fo mamanene basa hata fo Ndia sangga nafada neu ei.c 23 Tehuu hataholi fo ta nau namanene neulalau Hataholi ndia kokolan, dei fo naelak neme Manetualain hataholin nala mai. Boe ma ta naena haak no sala bali.’d
24 Ta kada ba'i Musa kokolak leo ndiak. Te Manetualain boe oo, pake hataholi fe'ek kala, fo dadik Ndia mana kokolan, ma sila lafada leo ndiak boe. Sama leo neu faik fo Manetualain pake ba'i Semuel so, fo nafada dede'ak fo hatematak ia ita tita to ita mata de'e hehelin. 25 Manetualain boe oo, helu neu ita ba'in Abraham nae,
‘Neme o numbu-sadum mai, dei fo Au fee baba'e-babatik neu basa hataholi nusak manai dae-bafok ia.’e
Heheluk kala fo Manetualain fee neu mana kokola lele uluk kala sila, hatematak ia dadi nai ei so, fo ndia au tolanoong nusa Israel asa. 26 Manetualain nadenu Anan fo Ndia helek so, fo natudu dalak suek ei la'o ela ei sala-singgom mala. No leo ndiak, Ana natudu dale malolen neu ei. Manetualain nadenu Kakanak ndia nakahuluk fee ei, bei fo Ndia nadenu hataholi nusa fe'ek kala. Ndia dadik baba'e-babatik neu ei basa nggei.”