Manetualain Dulan nala hataholi la
2
1-2 Nandaa no hataholi Yahudi la fai malolen fo ala seseik lae, ‘Fai Pentakosta’,a basa hataholi mana tungga Lamatuak Yesus lakabubua leme uma esa.b Kada nggengge neuk, lamanene liik neme lalai mai sama leo ani makaluuk. Liin ina-huuk, losa hataholi malai ndia ta bisa lamanene hataholi fe'ek kala halan bali. 3 Basa boe ma ala lita leo ha'i mbilak nababa'e neni sila esa-esak lain neu. 4 Boe ma Manetualain Dulan nala basa sala. De ala mulai lakokola lenik hataholi fe'ek kala dede'an, tungga hata fo Dulak fee sala kokolak. 5 Faik ndia hambu hataholi Yahudi leme nusak mata-matak mai, nai dae-bafok katematuan fo lakabubua lai Yerusalem. Dalen nala dokodoe tungga Manetualain. 6 Ledo-eik lamanene liik ndia, boe ma ala mai lakahohombu nai mamanak ndia. Ma sila esa-esak namanene ndia dede'a hehelin, neme Lamatuak Yesus hataholin nala bafan mai. Huu ndia de ala heran lalan seli. 7 Basa sala lamanggonggoak, boe ma lakokola lae, “Hataholi mana kokolak kala ia, basa sala hataholi Galelea, hetu? 8 Tehuu talo bee, de ita tamanene ala bisa kokolak lenik ita esa-esak nusan dede'a hehelin? 9 Ita ia neme propensi Partia, Media, Elam, Mesopotamia, Yudea, Kapadokia, Pontus, Asia, 10 Frigia, Pamfilia, Masir, leme Libia fo dekak no kota Kirene; hambu ita luma neme kota Roma mai boe; 11 hambu bali leme pulu Kreta mai, ma luma leme dae Arab mai. Ita luma hataholi Yahudi, ma hambu hataholi leme nusa fe'ek mai, fo maso anggama Yahudi so boe. Tehuu ita basa nggata tamanene hataholi la ia kokolak pake ita esa-esak dede'an, la'e-neu dede'ak fo ana seli, fo Manetualain taon so! Wee! Ita heran talan seli.”
12 Basa sala lamanggonggoak fo latatanek esa no esa lae, “Talo bee de leo iak, bae? Ndia ndandaan hata?”
13 Tehuu hataholi fe'ek haumemee sala. Hataholi sila lae, “Wee! Boso mbali sala. Huu ala mafuk lalan seli ndia!”
Petrus kokolak neu hataholi no'uk kala
14 Nai ndia, Petrus no Yesus nadedenu kasanahulu esa fe'en nala. Boe ma Petrus mata neu, de kokolak neu hataholi no'uk kala fo lakahohombu lai ndia. Ana kokolak natingga nae, “Ina-ama, ma basa tolanoo nggala ei. Ei hataholi Yahudi, ma ei mana mai leo nai kota Yerusalem ia! Pasa neulalau ei ndi'i doom, fo mamanene au kokolang ia, te hambu dede'a penting fo au sangga afada ei basa nggei. 15 Ei boso mae hetuk hataholi la ia mafuk. Ta bisa leo ndiak! Masaneda, te ta hambu hataholi fo ninu mafuk nai fafai anak. Nakalenak hatematak ia bei fo li'u sio! 16 Ei mamanene hataholi la ia kokolak lenik ei esa-esak dede'am. Teteben leo iak: faik ndia, Manetualain nafada memak dede'ak ia, nenik Ndia mana kokolan Yoel nae:
17 ‘Manetualain kokolak nae, “Mete ma faik kala late'e so, dei fo,
Au sangga fee Au Dulang neu basa hataholi.
Ei ana tou anam mala ma ana ina anam mala,
dei fo Au pake sala dadik Au mana kokolang.
Ei ana muli-solum mala,
dei fo lita hata fo Au sangga atudu sala.
Ma ei hataholi lasim mala,
dei fo lalame'i hata fo Au sangga fee sala lita.
18 Nandaa neu faik kala fo sangga late'e ndia so,
Au fee Au Dulang neu basa Au ata nggala.
Au fee neu touk kala,
ma Au fee neu inak kala boe.
Dei fo ala kokolak hata fo Au afada sala.
19-21 Dei fo Lamatuak Fain losa. Faik ndia bei ta mai,
tehuu Au tao akahuluk tanda heran nala nai lalai lain.
Tanda heran leo ledo dadik makiuk;
ma bulak boe oo, dadik mbilas sama leo daak.
Au boe oo, nau tao dede'ak fo ana seli nai dae-bafok dae.
Dede'ak kala sila, nonook leo daak, ha'i, ma ha'i masu bubuak-bubuak hene lain leu.
Dei fo losa Lamatuak fain fo ana seli ndia, hataholi fo nanggou noke tulun neu Manetualain,
sila ndia hambu nasalala'ek.”’c
Ndia ndia fo makahulun Yoel sulak so.
22 Tolanoo hataholi Israel asa ei! Pasa ei ndi'i doom, fo mamanene hata fo hatematak ia au sangga kokolak. Manetualain tudu nala Yesus so, fo hataholi Nasaret ndia. Ai bubuluk so mae, ndia tetebes, huu ai mita aom Manetualain pake Yesus so, fo tao tanda heran nala, ma dede'ak fo ana seli. Ei boe oo bubuluk dede'ak ia so, huu Yesus tao tanda heran nala ndia nai ei laladam so. 23 Tehuu ei tao misan, fo ndia ei miu fufudi hataholi manggalauk, fo ala mbaku Ndia nai ai ngganggek. Naa te Manetualain bubuluk basa sila, neme lele uluk mai so, fo memak nandaa no Ndia dudu'an.d 24 Memak ei tao leo ndiak, losa Ana mate tetebes so. Tehuu Manetualain ta nau, fo Yesus mate nakandoo. Huu ndia de Manetualain nakambo'ik Ndia neme mamates koasan mai, ma tao nasoda falik kana. Huu mamates koasan ta bisa senggi Ndia.e
25 Lele uluk mane Dauk sulak memak la'e-neu Yesus so, leo iak:
‘Au bubuluk Manetualain sama-sama no au taa-taa.
Huu ndia de ta hambu hata esa boe bisa natuda au,
huu Manetualain nai au boboang taa-taa.
26 Huu ndia de au daleng namahoko;
boe ma au koa-kio akandoo Ndia,
ma kada au ndoo-ndoo ahani Manetualain.
27 Ana ta ela au samaneng leo nakandoo nai hataholi mana matek kala mamanan.
Ma Manetualain ta ela Ndia Hataholi Malalaon mbombolan dadik mbuluk nai lates dale.
28 Lamatuak natudu au dala sodak tetebes so.
Huu ndia de Au daleng namahoko nalan seli,
te Lamatuak sama-sama no au.’f
Ndia fo makahulun mane Dauk sulak kana so.
29 Basa tolanoo nggala ei! Hatematak ia mbo'i au dei, fo au kokolak manggaledok neu ei la'e-neu ita ba'in Dauk. Ana kokolak leo ndiak, tehuu ana ta natudu ao hehelin. Huu ana mate so, ma latoin so. Ndia laten bei nai ia losa faik ia. 30 Mane Dauk ndia dadik Manetualain mana kokolan esa. Ma ana bubuluk nae, Manetualain helu pake sosook so nae, dei fo Dauk numbu-sadun esa to'u palenda, ndia Hataholi fo Manetualain tudu memak neme makahulun mai so.g 31 Faik ndia Dauk suli dook mata neu. Ma nafada nakahuluk la'e-neu Hataholi fo Manetualain tudu memak kana so. Dei fo Hataholi ndia mate, tehuu nasoda fali boe. Boe ma Dauk nae Hataholi ndia ta leo nakandoo nai hataholi mana matek kala mamanan, ma mbombolan ta mbulu.
32 Hataholi fo Dauk seseik kana so, ndia Yesus! Manetualain tao nasoda falik kana neme Ndia mamaten mai so. Boe ma ai basa nggai mita Ndia nasoda fali so no ai mata de'e hehelin. 33 Ma hatematak ia, Manetualain so'u Yesus so, fo to'u pangga manai lain seli. Boe ma Ndia nanggatuuk nai Manetualain boboa konan, nai mamanak fo Manetualain sadia memak so. Ma Aman fee Dula-dale Malalaon neun so, sama leo Manetualain helu memak neme makahulun mai so. Huu Ana helu sangga fee Ndia Dula-dale Malalaon neu ita boe. De hatematak ia, hata fo ei mamanene ma mita, na ndia Manetualain fee Ndia Dulan. 34 Dauk mesak kana ta hene neni nusa sodak neu, tehuu ana sulak nae,
‘Manetualain kokolak no au Lamatuang nae,
“Manggatuuk muu Au boboa konang, neu mamanak fo Au sadia memak kana so,
35 losa Au tao O musum mala do'ok neu O.”’h
36 Huu ndia de basa hataholi Israel musi bubuluk tebe-tebe, la'e-neu Yesus fo ei mbaku misan neme ai ngganggek so. Ndia ndia Karistus fo Manetualain hele memak kana neme makahulun mai so. Ma Ndia naena haak palenda ita boe!”
37 Hataholi la lamanene leo ndiak, boe ma dalen nala lambambau tutik. De latane Petrus ma nadedenu fe'ek kala lae, “Ka'a sala ei! Ai musi tao hata bali?”
38 Boe ma Petrus nataa nae, “Ei esa-esak musi la'o ela basa ei sala-singgom mala, fo fali tungga Manetualain. Basa ndia ei musi moke fo hambu salanik, dadik tanda nae, ei fali tungga Yesus Karistus Dala Sodan so. Ndia boe oo dadik tanda nae, Manetualain koka heni ei sala-singgom mala so. Boe ma ei hambu Manetualain Dula-dale Malalaon boe. 39 Huu Manetualain helu memak dede'ak ndia fee basa hataholi fo mana maso dadik Ndia hataholin so. No leo ndiak, Ndia hehelun ndia, fee ei ma ei numbu-sadum. Ndia helu fee hataholi fe'ek boe.”
40 Petrus bei kokolak loa-naluk neu sala leo ndiak, suek nafada sala nae, “Hatematak ia, hataholi no'uk heok leme dala sodak tetebes mai so. Huu ndia de musi mata neuk, suek ei boso tungga hataholi manggalauk kala dalan. Tehuu kada ei musi tungga Manetualain dala ndoon. No leo ndiak, ei hambu nasalala'ek fo masoda makandoo mia Ndia.”
41 Boe ma hataholi no'uk kala sila simbok Petrus kokolan. De ala maso tungga Yesus Dala Sodan, ma loke fo salani sala. Faik ndia boe oo, hambu hataholi lifun telu maso lakabubua lo Yesus hataholin nala. 42 Ala lahiik lakabubua sama-sama lo hataholi fe'ek fo mana tungga Yesus. Ma ala malole esa no esa. Tungga faik, ala manggate lamanene nanonolik neme Lamatuak Yesus nadedenun nala mai. Ala lahiik hule-haladoi sama-sama. Ma ala lahiik la'a sama-sama boe.
Hataholi kamahelek kala dala sodan
43 Faik ndia, Lamatuak nadedenun nala tao tanda heran no'uk, losa basa hataholi la heran lalan seli ma bii. 44 Hataholi fo mana tungga Lamatuak Yesus Dala Sodan ndia, lakabubua ma lasoda dalek esa, losa hata fo sila enan, ala pake sama-sama.i 45 Boe ma hambu luma se'o balo'an nala, ma hata-heton nala, de ala baba'e doin nala fee hataholi kamahelek kala, tungga esa-esak paluun. 46 Tungga faik, lahiik lakabubua nai Manetualain Uma Ina Huhule-haladoin. Ala la'a-linu neme uma esa mai neni uma esa neu, no dale namahokok. Ma basa sala lasoda lahiik tulu-fali esa no esa, ma ta hada kodek. 47 Tungga faik basa sala koa-kio Manetualain ta no namaketuk. Basa hataholi deak kala lahiik lalan seli lo sala. Tungga faik Manetualain nasala'e hataholi, de ala maso lakabubua lo Lamatuak Yesus hataholin nala. Boe ma ala boe lamano'u lakandoo.