16
Au afada ei dede'ak kala ia so, fo suek ei ta heok mima Au mai. 2 Dei fo hataholi Yahudi la husi heni ei mima sila uma huhule-haladoin mai. Ta kada leo ndiak, huu dei fo hambu faik fo mete ma hataholi tao lisa ei, na, ala dudu'a lae, ala tao dede'a malole neu Manetualain. 3 Ala tao leo ndiak neu ei, huu ta lalelak tebe-tebe Au. Sila boe oo ta lalelak Au Amang. 4 Tehuu Au afada dede'ak kala ia leu ei so, fo suek mete ma dede'ak kala ia dadi so, na, dei fo ei bisa masaneda mae, Au afada memak ei neme makahulun mai so. Huu Au bei sama-sama ua ei, huu ndia de Au ta afada akahuluk.”Manetualain Dulan uen
5 Yesus fee nanonolik nakadaik nae, “Hatematak ia Au fali uni mana madenu Au uni dae-bafok ia mai. Tehuu ta hambu neme ei mai matane Au mae, ‘Lamatuak sangga bee muu?’ 6 Huu Au afada dede'ak kala ia neu ei so, de ei dalem hedis so. 7 Tehuu hata fo Au afada ei ndia, tetebes. Mete ma Au uu, na, ndia malolen seli neu ei. Huu mete ma Au ta uu, na, Mana Makalala'ok ndia ta mai natudu dalak neu ei. Tehuu mete ma Au uu, na, Au adenu Ndia mai soa-neu ei.
8 Mete ma Ana mai so, na, dei fo Ana natudu hataholi malai dae-bafok ia nae, sila dalen ma tataon nala, sala. Ana kokoe sala fo tungga dala ndoon. Ma Ndia boe oo nasanenedak kasa nae, neu ko Manetualain nau naketu sila dede'an nala nae, sila ndia, ndoos do, sala. 9 Mana Makalala'ok ndia natudu sila salan nala, huu ala ta lamahele leu Au. 10 Ndia boe oo natudu dala soda ndoos. Huu Au fali uni Au Amang uu, dei fo ei ta mita Au so bali. Huu ndia de Mana Makalala'ok ndia mai nggati Au. 11 Ndia boe oo natudu nae, Manetualain nau naketu hataholi la dede'an nala no ndoos, huu Manetualain naketu nitu la malanggan dede'an so, fo mana palenda nai dae-bafok ia.
12 Hambu dede'ak no'uk fo Au sangga afada ei, tehuu ei bei ta bisa malelak hatematak ia. 13 Tehuu mete ma Dulak fo mana matudu dede'a ndoos sala mai so, na, dei fo Ana nakalala'ok fo ela ei bisa bubuluk basa dede'a ndoos sala. Ana ta kokolak tungga Ndia hihii hehelin, tehuu Ana nafada hata fo Ana namanenen neme Au Amang mai. Ndia boe oo sangga nafada ei, hata fo doo-doo dei fo ana dadi. 14 Ana nau so'u dema-demak Au, huu Ana nau buka basa hata fo ndoos la'e-neu Au, ma natudu sala neu ei. 15 Basa hata fo dadik neu Au Amang enan, dadik neu Au enang boe. Huu ndia de Au kokolang isinaak ndia ae, dei fo Manetualain Dulan sangga buka basa hata fo ndoos la'e-neu Au, ma natudu sala neu ei.”
Ei musi dale hedi makahuluk, basa bei fo mamahoko
16 Yesus nafada nakadaik nae, “Ta dook bali, te ei ta mita Au so. Tehuu ta dook boe ma ei mita falik Au.”
17 Basa boe ma Ndia ana mana tunggan nala luma lakokola lae, “Lamatuak maksut hata, de nae, ‘Ta dook bali, te ei ta mita Au so. Tehuu ta dook boe ma ei mita falik Au.’ Ma hatina de Ana kokolak nae, ‘Huu Au sangga uni Au Amang uu’?” 18 Boe ma ala latanen lae, “Ndia maksut hata de nae, ‘Ta dook bali’? Ai ta malelak.”
19 Yesus bubuluk so, ala sangga latane Ndia dede'ak esa. Boe ma Ana kokolak nae, “Isinaak Au kokolak ae, ‘Ta dook bali, te ei ta mita Au so. Tehuu ta dook boe ma ei mita falik Au.’ Ei natatanem leo ndiak, hetu?
20 Malole boe, mete ma ei nau sangga bubuluk leo ndiak. Au boe oo sangga afada ei leo iak: dei fo ei mamatani ma dale hedi, tehuu hataholi fe'ek lai dae-bafok ia lamahoko. Mae ei dale hedi leo ndiak, tehuu dei fo ei mamahoko seluk. 21 Ndia sama leo inak esa nameda tein hedis fo sangga bonggi. Dalen belak dei, huu dale hedik mai so. Tehuu basa boe ma ana bonggi nala anan ndia, de ndia dale hedin mopo heni memak kana. Tehuu ndia dalen namahoko, huu hambu hataholi beuk nana bonggik neni dae-bafok ia mai so. 22 Leo ndiak boe no ei. Hatematak ia ei mamatani, ma dale hedi. Tehuu doo-doo, te Au mai tilo seluk ei, de ei dalem mala lamahoko seluk. Ma mete ma ndia dadi so, na, ta hambu hataholi esa boe bisa nakalelee ei namahohokom mala.
23 De mete ma dede'ak ndia dadi so, na, ei ta matane Au hata-hata so bali. Tetebes! Au afada seluk ei bali ae, mete ma ei moke Au Amang sudi hata minik Au nadeng, na, dei fo Ana tao leo ndiak soa-neu ei.a 24 Losa hatematak ia, ei bei ta moke sudi hata minik Au nadeng. De moke leo, fo ei simbon. No leo ndiak, na ei dalem mala bisa lamahoko tetebes.”
Lamatuak Yesus senggi basa koasa malai dae-bafok ia so
25 Yesus kokolak nakadaik nae, “Losa hatematak ia, Au ateme anoli ei unik nakandandaak kala. Tehuu dei fo hambu faik fo Au fee nanonolik ta pake nakandandaak bali. Huu Au nau kokolak manggaledok la'e-neu Au Amang. 26 Mete ma fain ndia mai so, na, ei mesa nggei hule-haladoi fo moke makandoon neu Au Amang minik Au nadeng. Boso Au hule-haladoi fee ei bali. 27 Au Amang sue ei, huu ei sue Au. Ma ei boe oo mamahele mae, Manetualain ndia nadenu Au. 28 Makahulun Au la'o ela Au Amang, fo Au leo tataak nai dae-bafok ia. Tehuu hatematak ia Au sangga la'o ela dae-bafok ia, fo uu leo seluk ua Ndia.”
29 Yesus ana mana tunggan nala lamanene leo ndiak, boe ma ala lafada lae, “Naa! Hatematak ia Lamatuak kokolak manggaledok, ma fee nanonolik ta pake nakandandaak so bali! 30 Ai mamahele tetebes Lamatuak bubuluk basa dede'ak kala so. Hataholi ta paluu natane Lamatuak sudi hata bali, huu Lamatuak bubuluk nakahuluk hata fo ala sangga latanek, ma natataan leo beek. Ndia natudu ai nae, Lamatuak neme Manetualain mai.”
31 Boe ma Yesus natane sala nae, “Tetebes, hetu? Hatematak ia ei mamahele neu Au, do? 32 Leo iak. Doo-doo faa bali, fo ba'i anak, te ei basa nggei malai matanggelak. Hataholi esa-esak nalai la'o ela Au, fo neu kekek nai ndia mamana hehelin. Mae leo ndiak, tehuu Au ta mesa nggau, huu Au Amang sama-sama no Au. 33 Au afada ei dede'ak kala ia so, fo suek ei dalem mala bisa ndoo-ndoo, huu ei nana mba'ak mia Au. Huu hataholi malai dae-bafok ia, dei fo tao lakatoto'ak ma tao doidoso ei. Tehuu matetea ei dalem mala, huu Au senggi basa koasa malai dae-bafok ia so!”