Lamatuak Yesus sama leo ai huu anggol
15
Yesus kokolak nae, “Mamanene baa! Ei nana mba'ak mia Au. Au sama leo ai huu anggol esa. Tehuu Au ia, ai huu anggol tetebes!a Ma Au Amang ndia, sama leo mana tao osi. 2 De hataholi fo kada nae ana nana mba'ak no Au, tehuu ta tao hata esa boe, na Au Amang nggali henin, sama leo mana tao osi kedi heni basa ba'ek kala fo ta mana maboak. Tehuu hataholi esa-esak fo nana mba'ak no Au, na Amak tao nalalao manggenggeok neme ndia dalen mai, sama leo mana tao osi kedi keke'u ba'ek esa, fo suek boan boe namano'u. 3 Au Dede'a-kokolang sila, bisa tao nalalao ei dalem mala so, sama leo mana tao osi tao nalalao ai huuk ba'en nala. 4 Ei musi nana mba'ak makandoo mia Au, sama leo Au nana mba'ak ua ei. Huu ba'ek fo tepa henin neme huun mai ta bisa naboa so. Leo ndiak boe no ei. Ei ta bisa tao hata malole esa boe, mete ma ei ta nana mba'ak makandoo mia Au.
5 Au ia, sama leo ai huu anggol esa. Ei ndia, sama leo ndia ba'en. De hataholi fo nana mba'ak nakandoo no Au, ma Au boe oo nana mba'ak ua ndia, na ndia sama leo ba'ek esa mana maboa no'uk. Huu mete ma ei ta nana mba'ak makandoo mia Au, na, ei ta bisa tao hata fo malole. 6 Hataholi fo ta nana mba'ak nakandoo no Au, na ndia sama leo ba'ek esa fo sosoan taa. Ba'ek mata leo ndiak, hataholi la lateme kedi henin, fo elan namatuu. Basa de hataholi lakaduduluk lala ba'ek kala sila, de ala nggali sala leni ha'i dale leu fo hotu heni sala. 7 Tehuu mete ma ei nana mba'ak nakandoo mia Au, ma Au Dede'a-kokolang boe nahele nakandoo nai ei dalem mala, na, ei bisa moke sudi hata neu Manetualain, boe ma dei fo Ana tao fee ei.
8 Mete ma ei tao dede'a malole makadotok, na sama leo ba'ek esa naboa makadotok, na, ndia so'u dema-demak Manetualain. No leo ndiak, na ei boe oo matudu mae, ei ia, Au ana mana tungga nggala.
9 Sama leo Amak sue Au, de Au boe oo sue ei leo ndiak. Ei musi nana mba'ak makandoo mia Au, fo suek Au bisa atudu Au susueng neu ei. 10 Mete ma ei tao tungga Au palenda nggala, na, ei nana mba'ak makandoo mia Au, de Au bisa atudu Au susueng neu ei. Ndia sama leo Au tao tungga Au Amang palendan, de Ana natudu Ndia susuen nakandoo neu Au.
11 Au afada dede'ak kala ia neu ei neme makahulun mai, fo suek ei dalem mala bisa lamahoko, sama leo Au daleng namahoko. Huu Au hihiing, na ei dalem mala lamahoko lalan seli! 12 Au palendang leo iak: ei musi masue ao esa no esa, sama leo Au boe oo sue ei so.b 13 Mete ma hataholi esa sadia mate, fo suek ndia nonoon bisa nasoda, na, ana sue tebe-tebe nonoon ndia. Ta hambu susuek fo lena heni ndia. 14 Mete ma ei tao tungga Au palendang nakandondoo henin, na, ei dadik Au nonoo nggala. 15 Au ta nau oke ei ae, Au ‘atang’ bali. Huu ata esa ta bubuluk no teteben ndia malanggan hihiin. Tehuu Au oke ei, ae Au ‘nonoong’, huu Au buka ledo-ledo basa hata fo Au Amang nafada Au so. 16 Ei ta hele Au. Tehuu Au ndia hele ma so'u ala ei, fo makalala'ok ues ia. No leo ndiak, ei musi miu tao dede'a malole no'uk fo buna-boan bisa nahele nala dook. Ndia sama leo ai huu anggol esa naboa malole nakandondoo henin. Mete ma ei tao leo ndiak, na, ei bisa moke Au Amang sudi hata minik Au nadeng, boe ma Ana tao fee ei. 17 De Au palenda ei ia, leo iak: ei musi masue ao esa no esa.”
Hataholi malai dae-bafok ia binci Yesus hataholin nala
18 Yesus kokolak nakadaik nae, “Mete ma hataholi malai dae-bafok ia binci ei, na, masaneda, huu ala binci lakahuluk Au so. 19 Mete ma ei ia sama leo hataholi fe'ek kala malai dae-bafok ia, na, neu ko ala sue ei. Tehuu ei ta sama leo sila. Huu Au hele ala ei, fo tao kofe'e ei mima sila mai. Huu ndia de ala binci ei.
20 Boso mafalende henin, fo Au afada ei ndia so ae, ‘Ata esa ta lena heni ndia malanggan.’ De mete ma ala tao doidoso Au, na, neu ko sila boe oo tao doidoso ei. Mete ma ala lamanene Au Dede'a-kokolang, na, sila boe oo lamanene ei.c 21 Dei fo ala tao doidoso ei, huu ei nana mba'ak mia Au. Sila boe oo ta lalelak Ndia fo mana madenu Au. 22 Au mai ma atudu dala ndoos neu hataholi manai dae-bafok ia so. De mete ma ala tao salak, na, ala ta laena to'ok bali fo kokolak lae, ‘Wei! Ai ta bubuluk hata fo ai taok ndia, salak.’ Mete ma Au ta kokolak dede'a ndoos neu sala, na, fama ala dudu'a lakandoo lae, sila ta sala hata esa boe. Tehuu hatematak ia taa.
23 Hataholi fo binci Au, ndia boe oo binci Au Amang. 24 Au tao tanda heran mata-matak kala so, fo hataholi fe'ek ta tao nitak. Hataholi malai dae-bafok ia lita tanda heran sila, tehuu ala ta hii Au ua Au Amang nai nusa sodak. Mete ma Au ta tao tanda heran sila, na, Au Amang taok sila ta sala. Tehuu hatematak ia ala musi lemba salak ndia. 25 Basa dede'ak kala ia dadi so, fo tao tungga hata fo nana sulak nai Manetualain Heti-heun nae, ‘Ala binci Au. Naa te sila bincin ndia, ta no huu-okak hata esa boe.’d
26 Tehuu dei fo Mana Makalala'ok ndia sangga mai. Ndia ndia Dulak fo tao ei malelak hata fo ndoos. Ana neme Au Amang mai. Mete ma Au uni Au Amang uu so, na, dei fo Au haitua Dulak ndia mai neu ei. Ana nafada ei la'e-neu Au. 27 Ei musi kokolak neu hataholi fe'ek la'e-neu Au, huu ei sama-sama mia Au so, neu faik fo Au mulai fee nanonolik.