Lamatuak Yesus tao nahai hataholi mbokek esa
9
Basa boe ma Yesus asa la'o. Boe ma Ana nita hataholi mbokek esa, fo mboke memak neme bonggin mai so. 2 Boe ma Yesus ana mana tunggan nala latane lae, “Ama Mesen! See ndia tao salak, losak hataholi mboke leo iak? Huu ndia tatao hehelin do, huu ndia ina-aman?”3 Yesus nataa nae, “Hataholi mbokek ia ta tao salak. Ma ndia ina-aman boe oo, ta tao salak fo ana mboke. Bonggin mai leo ndiak so, fo suek basa hataholi la lita Manetualain tao nahai ndia. 4 Manetualain ndia nadenu Au. De ita musi tasusua fo takalala'ok Ndia uen, neu faik fo manggaledok bei nai ia. Huu dei fo makiuk mai so, na hataholi ta bisa tao ues bali. 5 Ledo-eik Au bei nai dae-bafok ia, na Au sama leo manggaledok nasa'a neu basa hataholi la.”a
6 Yesus kokolak nate'e leo ndiak, boe ma Ana mudi amben neu dae. Basa boe ma Ana nakatele, de e'edon dadik tane. Boe ma Ana lose tane ndia neu hataholi mbokek ndia matan. 7 Basa de Ana helu nae, “Muni kolam Siloam muu, fo malou o matam nai ndia.” (Nai dede'a Ibrani, na Siloam ndia ndandaan nae, ‘nadenun mai.’) Boe ma hataholi mbokek ndia neni ele neu fo nalou oe neu matan. Ledo-eik ana fali, boe ma ana bisa nita so!b
8 Basa boe ma hataholi ndia uma tia-tain nala, ma mana nita ndia nahulek doik, mulai latatanek lae, “Wei! Hataholi mbokek ia fo makahulun nateme nanggatuuk nahulek doik, hetu?”
9 Hataholi luma lae, “Hei! Ndindia so!”
Hataholi fe'ek luma lae, “Taa! Ndia ia, kada nahombe leo hataholi ndia!”
Tehuu hataholi ndia mesak kana nafada sala nae, “Taa! Au ndindia so! Fo makahulun mbokek ndia!”
10 Boe ma latanen lae, “Talo bee de losak o bisa mita so?”
11 Boe ma nataa nae, “Leo iak! Hataholi manade Yesus ndia, tao tane, de Ana taon neu au matang. Basa de Ana nadenu au nae, ‘Muni kolam Siloam muu, fo malou oe neu o matam nai ndia.’ De au tao tunggan. Huu ndia de hatematak ia au bisa ita so!”
12 Boe ma ala latanen lae, “De Hataholi ndia nai bee?”
Ana nataa nae, “Au ta bubuluk so maa!”
Hataholi Farisi la palisak hataholi mboke nitak
13-14 Faik ndia, Yesus tao tane, fo tao hataholi mbokek ndia bisa nita, nandaa no hataholi Yahudi la fai hahae tao ues. De ala loo hataholi mboke nitak ndia, fo neu nasale paltei anggama Farisi hataholin nala. 15 Boe ma hataholi Farisi la latanen lae, “Hena o mafada sudik ai dei! Hatina de hatematak ia o bisa mita?”
Ana nataa nae, “Leo iak. Hataholi ndia tao tane neu au matang. Basa de au uu alou oe, boe ma hatematak ia au ita so.”
16 Hambu hataholi Farisi luma lae, “Hataholi fo mana tao nahai o ndia, ta neme Manetualain mai. Ai bubuluk, huu Ana la'o lena heti-heuk la'e-neu fai hahae tao ues so.”
Hambu luma bali lae, “Talo bee de losak hataholi fo mana tao salak ndia bisa tao tanda heran leo ndiak?” Boe ma ala lasisimbo bafak losa lasidak kala.
17 De ala latane seluk hataholi fo makahulun mbokek ndia lae, “Tungga o, na Hataholi fo mana tao nahai o matam ndia, hataholi mata-aon leo beek?”
Ana nataa nae, “Tungga au, na Ndia ndia Manetualain mana kokolan esa.”
18 Tehuu hataholi Yahudi malanggan nala ta lamahele lae, hataholi ndia, mboke nitak, de hatematak ia bisa nita so. Boe ma ala ladenu sila ana mana tunggan leu loke ndia ina-aman mai lasale sila. 19 Ledo-eik ala mai, de malanggan nala sila latane lae, “Hataholi ia ei anam, do? Tetebes do taa, ana mboke memak neme bonggin mai? Boe ma talo bee de hatematak ia ana bisa nita so?”
20 Hataholi ndia ina-aman lataa lae, “Ndia ia, memak ai anan. Ma ana mboke memak neme bonggin mai so. 21 Tehuu ai ta bubuluk ana pake hata, de hatematak ia ana bisa nita so. See ndia buka matan, na ai boe oo ta bubuluk. Ana ina-huu so, de matane makandoon leo, huu ana bisa tui aon!” 22 Ala kokolak leo ndiak, huu ala bii hataholi Yahudi malanggan nala. Huu ala bubuluk lae, malanggan nala sila lambeda dede'ak lae, “Mete ma hambu hataholi manaku lae, Yesus ndia Karistus, na, ai musi husi heni hataholi fo mana manaku leo ndiak neme ita hataholi Yahudi la uma huhule-haladoin mai.” 23 Huu ndia de hataholi ndia ina-aman lataa lae, “Ndia ina-huuk so. De matane makandoon neu ndia leo.”
24 Boe ma ala loke seluk hataholi fo makahulun mbokek ndia. De lae, “Leo iak! O musi kokolak ndoos neu Manetualain matan fo manea Ndia nade malolen. Huu ai bubuluk no teteben, Yesus ndia, hataholi manggalauk.”
25 Hataholi mboke nitak ndia nataa nae, “Ama sala boso mamanasa baa! Huu au ta bubuluk Ndia ndia, hataholi manggalauk, do taa. Au bubuluk no teteben, fo makahulun au mbokek; tehuu hatematak ia au bisa ita so.”
26 Ala latanen lae, “Tehuu Ana tao hata neu o? Ana buka o matam talo bee?”
27 Boe ma ana nataa nae, “Heeh! Huu isinaak au tui so, tehuu ei ta nau mamanene. Boe ma hatina de ei nau au tui seluk bali? Ama sala boe oo nau dadik leu Ndia ana mana tunggan, do?”
28 Boe ma ala a'alin, de lae, “Ela o mesa nggo dadik muu Ndia ana mana tunggan! Tehuu ai ia, ba'i Musa ana mana tunggan nala. 29 Ai bubuluk Manetualain nakokola no ba'i Musa. Tehuu ai ta bubuluk Hataholi ndia, neme bolok bee mai.”
30 Hataholi fo makahulun mbokek ndia nataa nae, “Heran ei! Ei ta bubuluk Ana neme bee mai. Naa te Ndia ndia buka au matang, de hatematak ia au bisa ita. 31 Ita basa nggata bubuluk tae, Manetualain ta namanene hataholi manggalauk, hetu? Tehuu Manetualain namanene neu hataholi dale ndoos, fo nasoda tao tungga Ndia hihiin.c 32 Mulai neme Manetualain nakadadadik lalai ma dae-bafok losa hatematak ia, bei ta hambu nitak tutuik esa boe la'e-neu hataholi fo mana tao nahai hataholi fo mbokek neme bonggin mai, fo bisa nita so. 33 De mete ma Yesus ta neme Manetualain mai, na, neu ko Ana ta bisa tao hata esa boe, hetu?”
34 Boe ma ala lataa lae, “Wei! O ia, hataholi manggalauk neme o inam bonggi o mai! Talo bee de losak o dudu'a o bisa manoli masafali ai?” De ala husi heni ndia neme sila uma huhule-haladoin mai.
Hataholi fo dalen makatemak
35 Ledo-eik Yesus namanene ala husi heni hataholi mboke nitak ndia neme uma huhule-haladoik ndia mai, boe ma Ana neu sangga hataholi ndia, losa hambun. De Ana natane nae, “O mamahele neu Hataholi Isi-isik, do?”
36 Ana natane nasafali nae, “Ama, Hataholi ndia, see? Tulun mafada dei, suek au bisa amahele uu Ndia.”
37 Boe ma Yesus nafada nae, “O matonggo mua Ndia so. Ndia ndia, fo ndia Au ia, fo hatematak ia nakokola no o.”
38 De hataholi ndia kokolak nae, “Ama, au amahele!” Boe ma ana sendek fo nakaluku-nakatele neu Yesus.
39 Basa de Yesus nafada ndia nae, “Au uni dae-bafok ia mai, fo atudu hataholi la sala-singgon nala, suek hataholi mbokek bisa lita, ma hataholi mana nitak dadik mbokek.”
40 Nai ndia hambu hataholi Farisi hida, lamanene Ndia kokolan. Boe ma ala latane lae, “O mae, ai mbokek, do?”
41 Yesus nataa nae, “Leo iak. Mete ma ei memak mbokek, na, ta hambu hataholi soli salak neu ei. Tehuu ei mae, ei ia, hataholi fo bisa mita. Huu ndia de ei bei lemba ei sala-singgom mala.”