3 Faik ndia, hambu inak esa nana humu nalak neu faik fo ana hohongge. Boe ma mese anggama hida ma hataholi Farisi hida hela loon neni Yesus neu. Ala lakaseti inak ndia nambadeik neu sila basa sala matan. 4 Boe ma lafada Yesus lae, “Ama Mesen. Ala humu lala inak ia, neu faik fo ana hohongge. 5 Tungga ba'i Musa heti-heun nala, na hambu palenda nae, ‘Hataholi mana hohongge, na huhukun ndia musi mbian losa maten.’ Tungga Lamatuak, na leo bee?”^a 6 Ala nau sangga dalak fo ala bisa soli salak latuda Ndia.

Yesus ta nataa nakandoon, tehuu Ana nakatele de sulak neu dae, nenik Ndia lima ku'un. 7 Ala latane Ndia lakandondoo henin. Boe ma Ana nambadeik, de nafada sala nae, “Leo iak. Mete ma hambu neme ei mai ta tao mitak salak, na, ndia ndia mbia batu kaesan fo huku inak ia.” 8 Boe ma Ana nakatele seluk bali, de sulak nakadaik neu dae.

9 Ledo-eik lamanene Ndia kokolan ndia, de ala mae. Huu nai sila dalen nala, ala bubuluk lae, sila boe oo tao litak salak. Basa de ala latanggelak esa-esa, mulai neme lasik losa mulik. Doo-doo boe ma ela kada Yesus no inak ndia mesak kasa lai mamanak ndia. 10 Boe ma Yesus nambadeik bali, de natane nae, “Heeh? Ala lai bee? Ta hambu hataholi fe'ek nai ia, sangga soli salak fo huku o, do?”

11 Boe ma ana nataa nae, “Taa, Ama.”

Basa de Yesus nafadan nae, “Au boe oo ta nau huku o. De fali leo. Tehuu masanenedak. Boso tao salak bali!”]^b

12 Boe ma Yesus kokolak bali no hataholi no'uk kala sila nae, “Au ia, sama leo manggaledok neu hataholi dae-bafok ia. Hataholi fo mana tungga Au ta nasoda nai makiuk, tehuu ana leo nai manggaledok fo maneni sodak tetebes.”^c

13 Hambu hataholi Farisi luma sapa lae, “Wei! O nau dadik sakasii la'e-neu o ao-ina hehelim, do? Ta bisa! Huu tungga ai heti-heun, na musi hataholi fe'ek dadik sakasii neu hataholi esa, tehuu hataholi ndia ta mesak kana. De ai ta nau simbok, ma ta nau mamahele.”^d

14 Yesus nataa nae, “Leo iak. Ela Au dadik sakasii neu Au ao-ina heheling, tehuu Au kokolang ndia, tetebes. Huu Au mesa nggau bubuluk no teteben, Au uma bee mai, ma sangga bee uu. Ei boe oo ta bubuluk Au uma bee mai, ma ta bubuluk dei fo Au sangga uni bee uu. 15 Ei timba-tai hataholi tungga dae-bafok u'ukun. Tehuu Au ta pake dae-bafok u'ukun fo timba-tai hataholi esa boe. 16 Mete ma Au timba-tai hataholi, na, Au u'ukung ndia, tetebes. Huu Au ta mesa nggau timba-tai, tehuu Au tao basan sama-sama ua Au Amang fo mana nadenu Au. 17 Boso lilii henin. Huu nana sulak nai ei anggamam heti-heun nae, ‘Mete ma hambu hataholi dua sakasii fo kokolan nala sama, na dede'ak ndia tetebes.’ 18 De ta kada Au mesa nggau fo dadik sakasii la'e-neu Au ao-ina heheling. Huu Au Amang fo mana nadenu Au boe oo dadik sakasii fo kokolak la'e-neu Au.”

19 Ala latane lae, “Te O Amam ndia, nai bee?”

Boe ma Yesus nataa nae, “Ei ta malelak tetebes neu Au. Ei boe oo ta malelak Au Amang. Huu mete ma ei malelak tebe-tebe Au, na, neu ko ei boe oo malelak Ndia.”

20 Basa ia, Yesus nafada neu faik fo Ana fee nanonolik neme Uma Ina Huhule-haladoik, dekak no mamanak fo ala paken fo nakaduduluk kolete. Ta hambu hataholi fo humu lala Ndia, huu ndia fain bei ta nandaa.

21 Yesus kokolak nakadaik neu sala nae, “Dei fo Au la'o ela ei, fo uni mamanak fe'ek uu. Dei fo ei masanggak Au, tehuu ta matonggo Au. Huu ei ta maena haak mini mamanak ndia miu. Mete ma ei mate, na, ei bei lemba mahele ei sala-singgom mala.”

22 De hataholi Yahudi malanggan nala latatane aok esa no esa lae, “Ana kokolak hata ia? Ana sangga hala aon, do? Huu Ana nae, ‘Ei ta bisa mini mamanak ndia miu.”’

23 Boe ma Yesus nafada sala nae, “Ei mima dae-bafok mai. Tehuu Au uma lalai mai. Ei fo hataholi maneme dae-bafok ia mai. Tehuu Au ta uma dae-bafok ia mai. 24 Huu ndia de isinaak Au afada ae, mete ma ei mate, na, ei bei lemba ei sala-singgom mala. Huu mete ma ei ta mamahele mae, Au ia, ndia Karistus fo Manetualain nadenun mai so, na, mete ma ei mate, na, neu ko ei bei lemba ei sala-singgom mala.”

25 Boe ma ala latane lae, “Wei! Te O ia, see?”

Yesus nataa nae, “Au afada memak neme makasososan mai so.^e 26 Hambu dede'ak no'uk fo Au bisa afada la'e-neu ei. Ei sala-singgom mala no'uk boe. Tehuu Au ta atudu dede'ak kala sila. Mana madenu Au uni mamanak ia mai, mete ma Ana kokolak, na, kada Ana kokolak ndoos. Ma Au kada afada hataholi nai dae-bafok ia, dede'ak kala fo Au amanene neme Ndia mai so.” 27 (Ndia maksut, Ndia Aman nai nusa sodak. Tehuu ala ta lalelak Ndia maksut.)

28 Boe ma Yesus kokolak nakadaik nae, “Mete ma ei londa Au, Hataholi Isi-isik ia nai ai ngganggek lain so, bei fo ei bubuluk mae, Au ia, ndia Karistus. Ma Au ta tao hata-hata neme Au mesa nggau mai, tehuu Au kada fee nanonolik la'e-neu dede'ak kala fo Amak manai nusa sodak nanoli Au so. 29 Mana madenu Au boe oo, sama-sama no au nakandondoo henin. Ana ta mbo'i nitak Au mesa nggau, huu Au tao tungga Ndia hihiin taa-taa.”

30 Neu faik fo Yesus nafada basa dede'ak kala ia, boe ma hambu hataholi no'uk lamahele neu Ndia.

31 Basa boe ma Yesus nafada hataholi Yahudi kamahelek kala leu Ndia nae, “Mete ma ei masoda nana mba'ak mia Au nanonoli nggala ia, ma ei manoli makandoo neme Au mai, na, ei dadik Au ana mana tungga teteben nala. 32 Boe ma ei bisa bubuluk dede'a tetebes sala. Ma dede'a tetebes sala sila lakambo'ik ei, fo ei ta paluu dadik ata bali.”

33 Boe ma ala sapa lae, “Heeh! Ai ia, ta hataholi atan! Huu ai ia, ba'i Abraham tititi-nonosin! Hatina de O kokolak mae, dei fo ai makambo'ik?”^f

34 Boe ma Yesus nafada sala nae, “Au kokolang ndia, tetebes. Huu basa hataholi kasodak kala tao salak, de ala dadik sama leo ata fo kada ala tungga salak hihiin. 35 Tehuu natetemen leo iak: ata la ta lateme leo lakandoo lai uma esa. Huu kada maumak anan nala leo lakandoo lai ndia. 36 De mete ma Au fo Manetualain Anan koka heni basa ei sala-singgom mala, na, ei kalambo'is ndia so, de ta dadik sala-singgok kala atan nala bali. No leo ndiak, na ei kalambo'i tetebes, ma ta paluu tungga sala-singgok hihiin bali!

37 Au bubuluk ei ia, fo ba'i Abraham tititi-nonosin nala so. Mae leo ndiak boe oo, tehuu ei mambue sangga dalak fo tao misa Au, huu ei ta nau simbok Au nanonoling. Nai ei dalem mala, ta hambu mamanak so bali, fo mbeda Au Dede'a-kokolang. 38 Au afada dede'ak kala fo Au ita sala so, fo Au Amang natudu Au so. Ma ei tao tungga dede'ak kala fo ei mamanene neme ei amam mai so.”

39 Ala lataa lae, “Ai ia, ba'i Abraham tititi-nonosin!”

Yesus nafada nae, “Mete ma ei dadik ba'i Abraham tiititi-nonosin teteben, na, ei musi dadik conto tungga ndia. 40 Tehuu ba'i Abraham ta tao nitak manggalauk sama leo ei tataom ndia! Huu ei mambue sangga dalak fo sangga tao misa Au. Naa te Au ia, afada ei dede'a tetebes, fo Au amanenen neme Manetualain mai. 41 Ei tataom ndia memak ta dook neme ei amam mai.”

Tehuu ala sapa lae, “Heeh! Ai ia, kakana tetebes! Boso mae, ai ia, kakana kanae! Huu ai Aman, kada esak, fo ndia Manetualain!”

42 Boe ma Yesus nafada sala nae, “Tehuu mete ma Manetualain tebe-tebe dadik neu ei Amam, na, neu ko ei sue Au. Huu Au uma Ndia mai, ma Au nai ia. Au mai ta tao tungga Au hihii heheling. Tehuu Au mai, huu Ana nadenu Au. 43 Hatina de ei ta malelak Au kokolang? Fama huu ei ta nau mamanene!

44 Ei ia, mata-aok esa mia nitu la malanggan. Huu ei mahiik tao tungga ndia hihiin! Neme makasososan mai, ndia nateme tao nisa hataholi. Ana laban dede'a ndoos, huu ana timba heni basa dede'a ndoos. Mete ma ana nasapepeko, na, memak ndia natetemen ndia. Huu ndia ndia, mana masapepekok, ma kokolak masapepekok huun! 45 Au ia, mana mafada dede'a ndoos. Tehuu ei ta mamahele miu Au. 46 Soba! See neme ei mai bisa natudu buti nae, Au tao salak so? Heran maa! Mete ma Au kokolang ia ndoos, na, hatina de ei ta nau mamahele Au?

47 Hataholi neme Manetualain mai, namanene Ndia Dede'a-kokolan. Tehuu ei ia, ta mima Manetualain mai, de ei ta hii mamanene Au.”

48 Hataholi Yahudi malanggan nala lataa lae, “Weih! Ai kokolak tetebes ndia so. Huu ai kokolak so mae, O ia, ta hataholi Yahudi Isi-isik, tehuu O hataholi Samaria. O boe oo nitu nalak!”

49 Boe ma Yesus nataa nae, “Au ta nitu nalak. Au fee hada-holomata neu Au Amang nai nusa sodak, tehuu ei ta fee hadak miu Au. 50 Au ta soso'uk aok, fo atudu aon Au ana seling. Tehuu hambu Esa fo nau natudu Au ana seling. Ela Ndia ndia naketun nae, Au kokolang ndoos, do taa.

51 Au Dede'a-kokolang, memak tetebes! Boe ma hataholi fo mana namanene ma tao tungga Au Dede'a-kokola nggala, na ta maten.”

52 Hataholi Yahudi malanggan nala lamanene leo ndiak, boe ma ala lafada Ndia lae, “Hatematak ia ai bubuluk so, O kokolam kamuluk, huu O nitu nalak so. Huu ba'i Abraham mesak kana maten so. Manetualain mana kokola makahulun mate sala so boe. Tehuu O mae, ‘hataholi fo mana namanene, ma tao tungga Au Dede'a-kokola nggala, na ta maten.’ Memak O ia mamulu so! 53 Do O dudu'a mae, O ana seli lena heni Abraham fo maten so? Do, O lena heni Manetualain mana kokolan nala fo mana matek kala so? O dudu'a mae, O ia, see?”

54 Boe ma Yesus nataa nae, “Mete ma Au soso'uk aok, na, hataholi la ta nau simbok. Naa te Au ta ndia soso'uk aok, tehuu Au Amang ndia so'u dema-demak Au. Ndia ndia fo ei manaku mae, Ndia dadik neu ei Manetualain. 55 Tehuu ei ta malelak Ndia. Au ndia alelak Ndia no malole. Mete ma Au ae, Au ta alelak Ndia, na, Au mana kokola pepekok, sama leo ei. Tehuu Au alelak neulalau Ndia ma Au boe oo tao tungga Ndia Dede'a-kokolan. 56 Ei ba'im Abraham dalen namahoko nalan seli, neu faik fo ana nahahanik fo nau nita Au mamaing. Ndia memak nita so, de ana nameda dai so.”

57 Hataholi Yahudi malanggan nala lafada lae, “O teum bei ta losa teuk lima hulu boe! Tehuu O mae mita ba'i Abraham so. Tetebes, do?”

58 Boe ma Yesus nataa nae, “Tetebes! Huu ba'i Abraham bei taak kana, tehuu Au akahuluk memak so.”

59 Basa de hataholi la sila ha'i batu fo sangga mbia Ndia, huu Ana so'uk aon sama leo Manetualain. Tehuu Ana la'ok nafufunik de kalua neme Uma Ina Huhule-haladoik pasan mai.^g