Lamatuak Yesus nakokola no inak esa nai Samaria
4
1-2 Mete ma nakasasama Yohanis no Yesus, na, Yesus ana mana tunggan nala mulai salani hataholi no'un lena heni hataholi fo Yohanis salani sala. Yesus mesak kana ta salani hataholi, kada Ndia ana mana tunggan nala salani hataholi. Boe ma neu faik fo Yesus bubuluk nae, hataholi maleme paltei anggama Farisi lamanene lae, ala salani hataholi no'uk lena so, 3 boe ma Ndia no ana mana tunggan nala la'o ela propensi Yudea, fo ala fali leni propensi Galelea leu. 4 Tehuu ala musi la'ok lesik propensi Samaria, fo lakandoo leni propensi Galelea leu. 5 Ala la'ok, de ala losa kota esa nai propensi Samaria, nade Sikar, deka-deka no dae fo ba'i Yakob feen neu ndia anan Yusuf.a 6-8 Nai ndia hambu oe dolu esa nade, ‘oe dolu Yakob’. Ledo namatetu boe ma Yesus asa losa ndia. Ana nameda manggu neme sila lala'on mai, de Ana nanggatuuk hahae aok nai oe dolu ndia. Boe ma Ndia ana mana tunggan nala la'o ela Ndia mesak kana nai ndia, fo leu hasa nana'ak nai kota.Boe ma inak esa neme kota ndia mai, fo neu lemba oe nai oe dolu ndia. Yesus noke ndia nae, “Ka'a. Au bisa oke oe nininuk faa, do?”
9 Tehuu inak ndia nggengge, huu hataholi Yahudi la ta lateme lakabubua lo hataholi Samaria. Boe ma ana natane nasafali Yesus nae, “Wei! Ama hataholi Yahudi, do? Au ia, hataholi Samaria. Ta sala ia, do? Ama moke au oe fo minu, do?”b
10 Yesus nafada nae, “Leo iak: mete ma ka'a bubuluk hata fo Manetualain nau fee basa hataholi la, ma bubuluk Au mana oke oe ia See, na, neu ko ka'a moke masafali oe neme Au mai. Boe ma Au fee oe maneni sodak.”c
11 Inak ndia nae, “Ama samba dodolu oen taa. Ma oe dolu ia, madema. Neme bee mai Ama hambu oe fo maneni sodak ndia? Do oe ndia nai bee bali? 12 Neme bee mai Ama lena heni ai ba'in Yakob! Ndia ndia ela oe dolu ia neu ai. Ma ndia boe oo ninu neme oe dolu ia mai. Ndia anan nala, ma ndia bandan nala leo ndiak boe.”
13 Yesus nataa nae, “Masanenedak baa! Huu hataholi mana ninu neme oe dolu ia mai, neu ko ana maa mada bali. 14 Tehuu hataholi mana ninu oe fo Au feek ndia, neu ko tana maa mada seluk bali. Huu oe fo Au feek ndia, sama leo oe matak esa fo nasambumbulak deak mai. Oe ndia, neni sodak tetebes fo ta mana ketuk.”
15 Inak ndia nae, “Mete ma leo ndiak, na, Ama fee au oe ndia leo, fo ela au boso maa mada bali! No leo ndiak, na au boso mai taa-taa fo ndui oe nai ia bali.”
16 Boe ma Yesus nadenu nae, “Leo iak. Ka'a fali dei. Muu moke ka'a saom, fo fali muni ia mai.”
17-18 Ana nataa nae, “Au saong taa.”
Boe ma Yesus nae, “Tetebes. O mafada ndoos. Huu o sao touk lima so. Ma touk fo hatematak ia, o saom ta ndia.”
19 Boe ma inak ndia nae, “Awii! Hatematak ia au bubuluk so, Ama ia, Manetualain mana kokolan esa. 20 Au sangga atane. Ai hataholi Samaria bei-ba'in nala lakaluku-lakatele leu Manetualain nai lete Gerisimd ia. Tehuu ei hataholi Yahudi la mae, mete ma nau nakaluku-nakatele neu Manetualain, na, basa hataholi la musi leni Yerusalem leu. Tungga Ama, na teteben ndia leo beek?”
21 Yesus nataa nae, “Ka'a mamahele dei neu hata fo Au kokolak ia, huu ia tetebes. Dei fo ndia fain ana mai, na, hataholi la lakaluku-lakatele leu Manetualain, tehuu ta kada nai letek ia do, nai Yerusalem. 22 Ei hataholi Samaria ta bubuluk no'uk la'e-neu ei makaluku-makatele neu see. Tehuu ai hataholi Yahudi la bubuluk no'uk la'e-neu Manetualain fo ai makaluku-makatele neun. Huu Ana nau pake ai fo soi dalak, fo suek hataholi bisa hambu nasalala'ek neme sila sala-singgon nala mai. 23 Dei fo ndia fain mai, fo mulai neme hatematak ia mai so, na, hataholi mana makaluku-makatele neu ita Aman nai nusa sodak, ala lakaluku-lakatele leu Ndia tungga Ndia Dulan, ma tungga hata fo ndoos. Huu Amak nai nusa sodak nahiik no hataholi leo ndiak fo mana makaluku-makatele neu Ndia. 24 Hataholi mana nakaluku-nakatele neu Manetualain musi tungga Ndia Dulan ma tungga hata fo ndoos, huu Manetualain ndia, dulak.”
25 Inak ndia nafada nae, “Au bubuluk Mesias ndia sangga mai, fo ndia hataholi la seseik lae, ‘Karistus’, fo Manetualain helu memak sangga nadenun mai. Dei fo mete ma Ana mai so, na, neu ko Ana nafada basa-basan neu ita.”
26 Yesus nataa nae, “Ndia Au ia so, fo mana makokolak hatematak ia.”
27 Nandaa no faik ndia, Ndia ana mana tunggan nala fali leme kota mai. Ala heran, huu ala lita Ndia nakokola no ina Samaria esa. Tehuu ta hambu esa natane inak ndia nae, “O nau hata?” Ma ta hambu esa natane Yesus nae, “Hatina de Lamatuak kokolak no inak ia?”
28 Basa boe ma inak ndia la'o ela ndia nggusin neu ndia, de ana fali neni kota dale neu. Boe ma ana tui hataholi la lai ndia nae, 29 “Mai fo mita sudik hataholi ia dei! Huu Ana bisa buka basa-basan neu au fo au tao itak so. Naa fo Ndia ia, Karistus, fo Manetualain helu sangga nadenun mai so!” 30 Boe ma hataholi la kalua leme kota ndia mai, de leu lita Ndia.
31 Ledo-eik inak ndia bei fo fali neni kota neu, boe ma Yesus ana mana tunggan nala kokoe Ndia lae, “Ama Mesen aa! Mai mu'a dei!”
32 Tehuu Ana nataa nae, “Au hambu nana'ak so fo ei ta bubuluk.”
33 Ndia ana mana tunggan nala latane esa no esa lae, “Talo bee ia? See ndia mai so fo fee Ndia nana'ak?”
34 Tehuu Yesus nafada nae, “Leo iak. Manetualain nadenu Au fo tao tungga Ndia hihiin, ma akalala'ok Ndia uen losa basan. Ndia sama leo nana'ak fo soa-neu au. 35 Ei mateme memetek nai tina, boe ma makandandaak mae, ‘Bei bulak haa bali, bei fo bisa ketu-kolu.’ Mamanene baa! Au afada. Mete ma ei mete neulalau tina la, na, hatematak ia nahehele ketu-kolu so. Tina la, sama leo hataholi no'uk kala lai ele, fo leni ita mai. Huu sila ndia, lahehele lamahele leu Au so. 36 Ta kada leo ndiak, huu mana ketu-kolu la lakaduduluk sila buna-boan lai nggudang dale, de ala mulai simbo sila nggadin nala. Sila ndia, sama leo hataholi mana matudu dalak fo hataholi lamahele neu Manetualain, basa de hambu sodak tetebes fo ta mana ketuk. No leo ndiak, hataholi mana sele bini, ma hataholi mana ketu-kolu buna-boak kala, bisa lamahoko no'u. 37 Hataholi lae, ‘Hataholi esa sele bini; hataholi fe'ek nakaduduluk buna-boak.’ Ndia tetebes. 38 Au adenu ei fo miu makaduduluk buna-boak neme hataholi fe'ek ue-taon mai. Memak ei ndia ta tao ues, tehuu ei ndia hambu nanalak neme sila sosota-mamanggun mai.”
39 Faik ndia, hambu hataholi Samaria no'uk kala lai kota ndia lamahele leu Yesus, huu inak ndia kokolan nae, “Ana buka basa-basan neu au fo au tao itak kana so.” 40 Boe ma neu faik fo leni Yesus leu, ala kokoe Ndia lae, “Ama, leo mia ai nai ia leo!” Boe ma Ana leo tataak faik dua nai ndia.
41 Ma hataholi fe'ek no'uk kala lamahele leu Ndia, huu Ndia kokolan. 42 Boe ma lafada inak ndia lae, “Afik kada ai mamanene o kokolam. Tehuu hatematak ia ai mamahele neu Ndia, huu ai mamanene makandoon neme Ndia mai. Ai bubuluk tebe mae, Hataholi ia, bisa nasala'e nala ita basa nggata nai dae-bafok ia teme ita sala-singgon nala mai.”
Lamatuak Yesus tao nahai pegawe esa anan
43 Yesus asa leo faik dua lai ndia, boe ma ala la'o lakandoo leni propensi Galelea leu. 44 (La'i esa Yesus kokolak nitak nae, “Hataholi ta nahiik fee hada-holomata neu Manetualain mana kokolan fo neme ndia nggolo hehelin mai.”)e 45 Makahulun, neu faik fo bei ta feta Paska, hataholi Galelea no'uk kala leni Yerusalem leu so, fo tao fai malole nai ele. Boe ma ala hambu lelak lita basa hata fo Yesus taon nai Yerusalem. Huu ndia de neu faik fo Ana fali neni Galelea neu, ala simbok Ndia no malole.f 46 Boe ma Yesus asa la'ok lakandoo leni nggolo Kana nai propensi Galelea leu bali. Ana tao nitak oe dadik anggol oek nai ndia.
Faik ndia, hambu pegawe esa nai kota Kapernaum. Ana tou anan namahedi.g 47 Neu faik fo pegawe ndia namanene nae, Yesus fali neni Galelea neu nai propensi Yudea, boe ma ana nda'e neni Kana neu, fo sangga Yesus. Natonggo noon, boe ma ana kokoe fo Yesus konda neu tao nahai ndia anan. Huu kakanak ndia sangga maten so.
48 Yesus nafada pegawe ndia nae, “Ama, ee! Ei moke Au tao tanda heran mata-matak, tehuu mete ma ei ta mita, na, ei ta nau mamahele Au!”
49 Pegawe ndia nataa nae, “Lamatuak. Tulun mai dei. Huu mete ma taa, na, au anang maten ia so.”
50 Boe ma Yesus nafadan nae, “Fali leo. Huu o anam ndia, nasoda.”
Boe ma ana fali memak, huu ana namahele neu Yesus kokolan ndia. 51 Ledo-eik ana fali, te ndia ana mana tao uen nala mai latonggo loon nai dalak, de lae, “Ama boso dale hedi bali, huu ama anan bei kasodak.”
52 Boe ma natane sala nae, “Ana mulai hai neme li'u hida mai?”
Ala lataa lae, “Mulai afik ledo kamatetun li'u esa, matobin konda memak.” 53 Boe ma pegawe ndia nasaneda memak nae, ndia anan hai, mulai neme ledo-eik Yesus nafada ndia nae, “Ama anan ndia kasodak.” Boe ma ndia no basa uma isin nala lamahele Yesus.
54 De ia, tanda heran kaduan fo Yesus taon neu ledo-eik Ana kalua neme Yudea mai, fo neni Galelea neu.