Kais mutuin mo'et ma taos pah-pinan
4
Hi mmatoe ma mmabaan es nok es. In raisn ii saa'? Naan natuin anbi hi sonam ma hi tnaanm ein naan, anmui' tuaf-tuaf re' namin ranan he nharineb sin tuak ein kuuk. 2 Hi mikoman baer es, mes hi 'niim ein ka ntean fa he nreo' naan ee. Rarit hi neekm ein namenan, ammatoe ma ammabaan, tar antea hi mroim he mi'maet es ate, ka mimtau fa.Natuin hi ka m'onen fa, ma ka mtoit fa na'ko Uisneno, etun hi ka mipein je fa. 3 Maski hi m'onen mifeek hau-fatu msa', mes hi ka mipein fa saa' re' hi mtoot je, natuin hi mtoit mituin ahaa hi tenab re' he minokab hi sarit mese'-mese'.
4 Batuur-batuur hi atoin ka a'ki'it ki fa! Hi on re' amatsaos re' anmakaek. Karu hi mituin mo'et ma taos pah-pinan, hi mmoe' hi tuam ein ammamuus mok Uisneno. Batuur ate! 5 Etun Uisneno In Suur Akniun' ee ntui mnak, “Uisneno natuaba' In Asmaan Akniun' ee et hit nekak. Es naan ate, Asmaan Akninu' naan In roimn ii ta'kii' tabaar tbi haa Na. Fin In re' naan, amantinus.” 6 Saa' antein, Uisneno nroim fe' he nfee nathoeb In nekan arekot amsa'. Etun Suur Akniun' ee ntui mnak:
“Uisneno nraban tuaf re' na'ratan in tuan,
mes In nakrira' In nekan arekot neu tuaf re' neek a'parat.”a
7 Uisneno naan, A'nakaf! Onaim amnona' hi tuam ein naan meu Ne, he mituin In romin. Hi kais mituin niut reu'f ein sin a'naak kou' gwe in romin. Amraban ma'tani' meu ne. Nok ranan naan, in of naen nasaitan ki. 8-9 Maim ranan he hi mkua'noon ma mmoin nekaf mese' mok Uisneno. Nok ranan naan, In npaumaak ki.
Hae, mansian amonit anbi rais amre'ut ki! Hi ro he minoon ma mineo hi 'monim. Ma hi re' neek abeot ein! Hi ro he mnao mne'o mituin Uisneno, ma kais amtebi 'rii-'ne'u ntein. Tar antea neno ia, hi 'moinm ein anbin gwah ahaa marine. Onaim oras ia, misnaas nai! Hi mihini mrair mak hi neekm ein anbeon, natuin hi saant ein. Reko nneis, hi mmei' jom ma mkae mpin-pinus nai. 10 Karu hi mihiin batuur-batuur mak, hi ka ma'osa' ki fa mbi Uisneno In human ma In matan, In of nait na'ratan ki mjair tuaf-tuaf re' ma'osa' nbi In human ma In matan.
Kais mi'uab mi're'uf es
11 Aok-bian aar ki! Kais mi'uab mi're'uf es nok es. Fin karu hi mmoe' on naan ate, ma misaeb sanat piut neu atoni' bian, hi mtanhai mrair Uisneno In atoran re' nak, “Ho ro he mneek ho aom-bian, nahuum on re' ho mneek ho tuam aan kuum.” Ma karu hi ka mituin fa atoran naan, hi mi'ratan amrair hi tuam ein anneis na'ko Uisneno In Atoran. 12 Uisneno neikn On es nahakeb Atoran naan. Onaim In es re' anmui' hak he nafeek hit rasin. In neikn On es anmui' hak he nsoi nafetin kit, ai' anhukun na'maet kit. Hi ka mmui' fa hak he mifeek atoni' sin rasin, ai' mi'uab mi're'uf biak ein sin kanak arekot.
Kais miboo
13 On nai! Hi ro he mihiin, he kais mi'uab am mak, “Neno ia, ai' noka', hai he mnao meu kota nee joo! Hai he mnao mitua maan on re' toon es. Ma hai he mrakan he miis maan akre'o!” 14 Ho muhiin saa' re' noka'-nmeu te he njair? Ka tiit tain fa tuaf es, re' nahiin nain in a'moint ii on re' mee. Mansian ii 'moin ii on re' nipu', re' mamnita' rabah, rarit namneuk.b 15 Reko nneis hi mi'uab am mak, “Karu Uisneno nneek kit, maut he hit tmoin. Ma karu Uisneno nromi te, maut he hit bisa tmoe' ia.” 16 Natuin karu hi ka mi'uab fa on re' naan, hi suma miboo gwah. Naan on re' hi mnikan main Uisneno nbi hi teenb ein. Naan saant ii ko'u!
17 Mimnau mirek-reko'! Tuaf re' nahini nrair saa' es re' batuur, mes ka nmoe' natuin fa on naan, naan on re' in nmoe' ansaan anrari msa'.