Au 'tui surat re' ia, ma 'soun ee 'eu ki re' Uisneno npiir naan ki. Hi mjair anao-amnemat re' mnao ma mmoni mbi bare-bare et propinsi Pontus, propinsi Galatia, propinsi Kapadokia, propinsi Asia, ma propinsi Bitinia.

Aok-bian manekat aar ki! Na'ko un-unu', Ama' Uisneno npiir nain ki he mjair Iin na. In Asmaan ee nmoe' ki mjari kninu' meu Ne msa', he hi bisa mmoe' mituin In apreent ein ok-oke' re' Yesus Kristus anfee sin neu ki. Ma karu hi mmoe' mituin In apreent ein ok-oke', naan on re' Uisneno nbisin Nai' Yesus In naa' ee neu ki, he njair tanar nak, hi mikninu' mrair meu Ne.

Au 'onen he Uisneno naruru' ma nakrira' In nekan arekot neu ki, maut he hi bisa mmoin na'ko neon gwes meu neon gwes nok mamut, rame' es nok es, ma tainina' na'baab ok piut.

3 Are' kanan pures ma bo'is neu Uisneno! In re' naan hit Usi' Yesus Kristus In Amaf. Natuin Uisneno In neekn ee reko, es naan ate In nkasian kit. Yesus Kristus anmaet, rarit In nmoni nfain. Onaim oras Kristus namonib kit, In nfee kit 'moin fe'u nahuum on re' nahonis nafani' kit. Es naan ate, hit tpirsai teu Kristus piut, ma hit tafnekan ma tpirsai mtak, In of anpairoir ma npijaar kit nok rek-reko. 4 Anbi pah-pinan ia, karu a'naef es anmaet, in nasaitan in a'mui'k ein neu in aanh ein. On naan amsa', Nai' Yesus natunu' nrair pusaak neu kit et neon gwe tunan. Pusaak naan ka bisa nreu' fa, ka bisa nrapu' fa, ma ka bisa namneuk fa. 5 Hi mpirsai mak Uisneno nmui' kuasa he nturun ma nbaab ki. In npijaar ma npairoir ki, he saa' es kais nareu' ki. Ma oras pah-pinan ia namsoup, In he naruru' ma nakrira', he In nsoi nafetin ki nok taos ma mo'et on mee.

6 Es naan ate, hi neekm ein anmarinan, maski oras ia hi mnaben ate ma'fena' natuin hi mipein susat huma'-huma'. 7 Uisneno nkonan kit he tapein furit he n'ui ma nsoba' hit rais pirsait ee teu Ne. Karu hit tpoi tkoon ta'ko furit, naan naruru' ma nakrira' mnak, hit rais pirsait naan ma'tani' ma batuur. Hit bisa tataib ee nok amnatu'. Hit ro he tout gwe nbi ai je nanan, he in makrauf ein anpoin fe', na' hit tapeni mnaut ee in afan batuur-batuur. Te kaah, tatuin Uisneno In tenab, hit rais pirsait ma'osa' nneis na'ko mnatu'. Onaim karu hit rais pirsait ii npoi nkoon na'ko furit on re' naan, oras Yesus Kristus ankoen On anfain neem, of Uisneno nbo'is kit, rarit In naruru' ma nakrira' hit pinak ma krahak, ma In nhormaat kit.

8 Maski hi ka mkius miit fa Nai' Yesus langsung, mes hi mneek Ee. Maski hi ka mkius miit Ee fa oras ia, mes hi mpirsai Je. Hi neekm ein anmariin anneis-neisi msa', maski ka nmui' fa uab re' natai he mitoon meu tuaf ein anmatoom nok hi neekm ein anmarinan. 9 Natuin hi mpirsai Je, hi upam ma pa'e, es re' Uisneno nsoi nafetin ki na'ko hi sanat ma penu sin.

10 Uisneno In mafefa kniun' ein un-unu' sin namin he nahinin reko nneis, on mee m'es Uisneno nsoi nafetin tuaf na'ko sin sanat ma penu sin. Mafefa kniun' ein naan natoon nanin anmatoom nok Uisneno naruru' ma nakrira' In nekan arekot neu ki, natuin In nabarab anrair he nsoi nafetin ki. 11 Kristus In Asmaan ee nmeup et sin neek ein he natoon nain am nak, Kristus ro he napein susat, ma nok ranan on mee he In napein ha'mu'it ma ma'ne'at. Are' rasin naan anjarin oke' te, na' Uisneno naikas na'rat-raatn Ee. Es naan ate, mafefa kniun' ein namin he nahinin reka' te rasin re' ia njarin. 12 Rarit Kristus In Asmaan ee, natoon neu mafefa kniun' ein am nak, sin es re' ka nkius ma nitan fa, mes hi es re' amkius ma miit rasin re' ia. Oras ia hi mneen ma mitniin maan rasin re' ia, natuin Uisneno In Asmaan Akninu' na'ko sonaf neno tunan ansonu' ma nreek tuaf a'teta' he neit natoon Uisneno In Rais Reko neu ki. Te kaah, Uisneno In ameupt ein sonaf neno tunan anromin he nitan kuuk are' rasin re' ia.

13 Es naan ate, hi ro he mibarab piut he mihiin mirek-reko' rasin re' ia ok-oke'. Ampanat mirek-reko' he hi mitenab namneo ma namnoon. Mibarab piut he hi mpirsai piut meu Yesus Kristus tar antea In nkoen On anfain neem. Natuin anbi oras naan, Uisneno he naruru' ma nakrira' In nekan arekot neu ki. 14 Hi ro mneen ma mitniin Uisneno, on re' ri'ana' re' anneen ma natniin in ainaf-amaf. Unu' te hi ka mihiin fa fe' Uisneno In raan a'honis re' amneot ma amnonot. Mes oras ia hi mihini mrair. Onaim kais ammoin mituin hi romim re' he mmoe' maufinu mtein. Fin re' naan hi raan a'honis amnaa'. 15 Es naan ate, oras ia hi ro he mmoni kninu'. Natuin Uisneno, ro kninu'. In es re' no'en ma nnapen naan ki he mjair In aanh ein. Natuin rasi naan, hi ro he kninu' mbi hi 'moinm ein a'teme-'teme. 16 Fin matu'i nbi Uisneno In Suur Akninu' mnak, “Hi ro he kninu', natuin Au kninu' Kau.”^a

17 Hi mroim he mi'uab mok Uisneno nahuum on re' hi Ama'. In njair Afeek Rasi msa', re' of anparikas ansuun-suun tuaf in a'monin. Mes In ka huma' mese' fa on re' afeek rasi bian ein. Fin In nafeek rasi, ro natai ma ka ma'feen ao-biaf fa. Es naan ate hi ro he mpaant om. Fin hi on re' atoin sona' re' mitua mtahan ambi pah-pinan ia.

18 Hi mihini mrair mak, Kristus anbaen nafeek anrair he nsoi nafetin ki na'ko hi 'monim re' ka ma'u'u ma ma'ba'af fa. 'Monit nahuum on re' naan, hi mtoup maan ee mi'ko hi be'i-na'i sin, on re' pusaak. Mes mimnau, fin Kristus ansoi ki ka npaek fa roi mnatu' ai' roi muti' re' of namnekun oke'. 19 Mes In nsoi ki npaek In naa' ee kuun. Naan, ro ma'osa' batuur! In nmaet on re' 'bib-kaes aan es, re' ka nmoe' niit fa sanat, re' sin nroor gwe he njair fua'-turu'.

20 Oras Uisneno ka nmoe' pah-pinan ia fa fe', In nahini nrair saa'-saa' re' Kristus of anmoe' sin. Mes unu' te, Uisneno ka naruru' ma nakrira' Kristus fa fe' neu mansian anbi pah-pinan ia. Oras ia, in fe' naruru' ma nakrira' Kristus he njair tetus neu ki. 21 Natuin Kristus anmoe' on naan, hi bisa mpirsai Uisneno. Fin In namonib nafani' Kristus, ma naikas na'rat-raatn Ee. Uisneno nmoe' on naan he hi mpirsai Je, ma mifnekan he In nmoe' natuin saa' re' In anba'an nain je.

22 Hi mmoe' mituin saa' re' batuur. Onaim oras ia hi bisa mmeup ma'tani' meu Uisneno. Naan anmoe' ki mneek hi aok-bian atoin apirsait ein batuur-batuur. Hi rais manekat naan ro he na'baab on piut, natuin hi neekm ein nakniun' ein. 23 Oras ia, hi mipeni mrair 'moin fe'u. Mes 'moin fe'u re' ia hi ka mipein je fa mi'ko hi aina'-ama' re' of anmaten nbin pah-pinan ia, mes hi mipein je mi'ko hit Ama' abit sonaf neno tunan re' ka nmaet fa. Hi 'moin fe'u re' ia, hi mipein je mi'ko Uisneno In Kabin ma Prenat. In Kabin ma Prenat re' ia, neiki 'monit re' amneot ma amnonot, ma ntahan piut. 24 Fin matu'i et Uisneno In Suur Akninu' mnak,

Uisneno In Kabin ma Prenat sin re' naan, esan re' Rais Reko re' hai mitoon amrair sin meu ki.^b