Hi meupm ein ambi pah-pinan ia, es re' he miminab hi tuam ein meik rais marinet pah-pinan. Hi on re' bijae paorn es re' suma nahiin he naah aah, re' antea in oors ate, anroro. Hi mhukun ma mi'maet atoin rekon, re' ka napenin fa mainuan he namneob ok anbin hi humam ma hi matam.

Atoin amui't ein! Reko nneis, amkae mpin-pinus nai! Fin ma'ne'at huma'-huma' of ro he nsaen ki. Hi 'mui'm ein anmurai namreu'n een. Ma hi pake-nohas amasat sin, eets ein of ansoor naan sin. Hi noni mnatu' ma muti' sin ka ma'oos ein fa gwen. Ma sin of naah nafani' ki, on re' ai ji nout hau meto'. On mee m'es pah-pinan ia he namsoup gwen, mes hi amtaisiub fe' he mibuab bare' 'maten? Hi 'mui'm ein of anjarin bukti nak, hi ka mihiin fa mee es re' ma'osa' nbi Uisneno In human ma In matan.^b

7 Aok-bian aar ki! Hi ro he msabaar ambi hatas-paot tar Usi' nkoen On anfain neem. Amkius kiim atoin tani re' anpao nok sabaar neu in reen je afan. Uran ahuunt ee nmouf, rarit in nseen. Rarit in npao nteni' uran re' natorob ma namriab in roet ein. Ka 'roo fa te, nasufan ma nafuan. Ma in oors ee ntea te, tuaf naan annao nseki ma noun. 8 Hi ro he msabaar on re' naan amsa'. Amha'tain hi tuam ein, natuin ka 'roo fa gwen ate, Usi' ankoen On anfain neem!

9 Aok-bian aar ki! Kais amma'munu'. Mee he mma'munu', mma'munu' piut. Maut he Uisneno of es anhukun ki! Amkius kiim! Fin Afeek Rasi sonaf neno tuun ee, anhake nrair et hi maatm ein naan.

10 Aok-bian aar ki! Mituin a'tope' na'ko Uisneno In mafefa kniun' ein. Maski sin napenin susat ma nana'renat huma'-huma', mes sin naarn ein aah. 11 Karu anmui' tuaf re' bisa naran anbi susat ma nana'renat, hit troim he tbo'is ta'naeb in kanan. On re' ka'o Ayup. In napein susat huma'-huma', mes in naran ma'tani'. Rarit Uisneno neekn ee nmouf neu ne, onaim In nmurai n'ator neu nai' Ayup saa'-saa' re' reko. Uisneno nmoe' on naan, natuin In Amanekat ma Amahoet.^c

12 Aok-bian aar ki! Hi kais mihake' supat. Karu hi he mak, “tua”, mitaah mak “tua” gwah. Karu hi he mak, “kahaf”, mitaah mak, “kahaf”. On re' naan ate, noo gwah. Kais ambaineis he mihake' rais supat amteek niutn ee et pah-pinan. Ai' mihake' supat mak, “nbi Uisneno In kanan” re' anmoin et sonaf neno tunan. Ka nmui' fa upan saa'-saa' karu mihake' supat huma'-huma'. Natuin karu on naan ate, of amtoup main ho hukun, natuin ho rais supat sin.^d

13 Karu anmui' tuaf na'ko ki napein susat, reko nneis in n'onen. Ma karu anmui' tuaf anmariin, reko nneis in nsii ma nbo'is Uisneno. 14 Karu anmui' tuaf na'ko ki napein menas, reko nneis miskau amepu krei nggwin, ma mtoit sin he ntaon mina' nbi amenat naan, ma n'oen ein neik Uisneno In kanan, maut he Uisneno nareko' amenat naan.^e 15 Onaim karu hi m'onen amenat, ma mpirsai batuur-batuur meu Uisneno, Uisneno nareko' amenat naan. Karu amenat naan anmo'e nsaan, Uisneno of annoes nain in saant ein. 16 Karu na'ko ki ammo'e msaan, hi ro he mmanaku' sanat es nok es. Nok ranan naan, ro hi m'onen es nok es ate, maut he hi mjair reko.

Tuaf re' in neekn ee kninu' ma namneo, in n'oen ee naheun nok kuasa ma'tani', ma bisa tapein in afan. 17 Tait i'tope' na'ko ka'o Elia. In mansian on re' hit imsa'. Mes oras in n'onen he kais na'uur antein, uran naan nasnaas nain, ma ka nmouf niit fa tar antea toon teun ma stena'.^f 18 Rarit in n'onen he ntoit uran, ma uran naan nmouf nain oras naan. Huun ein natoron ma nnoo maten, ma sekit amnonut amsa'.^g

19 Aok-bian aar ki! Karu anmui' tuaf na'ko ki re' nmo'e nsaan ma nasaitan saa'-saa' re' batuur, rarit anmui' tuaf re' nturun ma nbaab ee nfain neem neu Uisneno In raan amneot, naan reko. 20 Mimnau mirek-reko'! Karu hi mturun tuaf re' anmo'e nsaan, he in nfain neem neu Uisneno, ma in na'piis, hi msoi maan ee, maut he in nmoin piut nok Uisneno. Nok ranan naan, Uisneno nnoes nain in saant ein re' mfau-rutun naan.^h

On re' naan, tua.