2 Hit aar kit ta'uab atsaan huma'-huma'. Mes tuaf re' bisa nafreu naan in fefan, in bisa n'ator in tuan amsa'. 3 Tait i'tope' na'ko bikase'. Hit bisa t'ator bikase' he natuin hit romik, atteetk ahaa in afreu. 4 A'tope' bian na'ko bnao oe. Ain kou' gwi anfuu bnao oe neu-mneem natuin in romin. Kamudi aan'-aan' ahaa mmees, in bisa n'ator naan abnao oe naan in a'naon, natuin anaa' abnao naan in romin. 5 On naan amsa', hit fefak. Fefak re' ia, aan'-ana'. Mes in meupn ein, maineun besi!^a

Naan on re' sapriu aan es, re' bisa nout nareu' nais kou' gwes. 6 Fefaf naan, on re' ai piin ii nnuan on. Hit bisa tpaek hit fefak he tareu' are' kanan rasi. Hit fefak ia bisa nareu' hit i'moink ii no mes-mese'. Rais amre'ut amfaun nbi pah-pinan ia, anpoin na'ko mansian ii in fefan. Ma niut reu'f ein sin a'naak kou' gwe msa', npaek mansian ii in fefan he nanaob in mepun.

7 Mansian ii bisa nheek mui' fui, rarit namausab sin he njarin mui' aem. On naan amsa', kaun anonok, koro, ma ika' nbi tais je nanan. 8 Mes ka nmui' fa tuaf es fa fe', re' n'ator naan in fefan. Natuin fefaf naan, baer amre'ut es, re' ka t'ator taan ee fa. In on re' raso re' annoman nain hit aok ii, tar antea tmaet.

9-10 Nok fefaf mese', hit tpures ma taseku' nok. Naan ka reko fa! Hit tpaek hit fefak he tbo'is Ama' Uisneno. Rarit nok fefaf re' naan amsa', hit taseku' ma ta'akan hit aok-bian, re' Uisneno nmoo' je natuin In human ma In masan. On mee m'es on re' naan?^b

11 Ka neu fa he oe mata' mese' npuran napoitan oe miin reko ma miin mari. 12 Ka neu fa he mauns ii nafua oka'bana'! Ma ka neu fa he peen ii napuin anggur! Fin roet ii ro he nafua ma nanees natuin in atrekan.^c Nahuum on re' hit ka bisa fa he tkui oe reko na'ko niuf miin mari.

13 Atoni' re' nahiin rasi natuin Uisneno In hinit, kais anpaas on ma kais na'naeb in tuan. Fin in nahiin nak, in hinit naan na'uu na'ko Uisneno. Maut he in nakrira' in mahinin naan anbi 'monit amneot. 14-15 Karu ho mneek meens meu tuaf es, ai' mumouf tuaf es he ho mseka', kais maiks om mak ho atoin ahiin rais reko ko! Naan, ho mupoi. Fin 'monit on re' naan ka natai fa nok ‘atoin ahiin rais reko’. Neek menas, ai' mumouf tuaf, ka na'uu fa na'ko Uisneno. Naan, atoni' pah-pinan ia in amneik ein. Naan natai nok tuaf-tuaf re' ka nnona' fa sin tuak ein neu Uisneno. Taos ein naan, natuin niut reu'f ein sin ranan. 16 Fin karu nmui' neek menas neu es, ai' ammamoufun, of anmui' taisibu huma'-huma', ma mansian ii anmo'en maufinu huma'-huma'.

17 Mes rais hinit re' na'uu na'ko Uisneno, es re' ia: nahunu te in nmoe' kit he tmoni kninu'. Rarit in nfee kit neek rame' es nok es, ta'paran tahiin jok, atsabaar piut, ma neek teas. In aafn ii msa' nmoe' hit neek ii reko, troim he tmaturun ma tmabaab, tataiba' tahiin rasi, ma ka tteib fa koti-mmaat teu biak ein. 18 Ma tuaf re' nakrira' raan mamut of napein in upan arekot. Naan on re' atoni' nseen fini, namuni te in napein nafani' in afan arekot.