Kais ambetis mak, a'naet ai' a'baut
2
Aok bian aar ki! On mee m'es hi bisa mak hi mpirsai Yesus Kristus, hit Usi' re' mapina'-makraha' naan, karu hi mpiir humaf? Kais on naan! 2 Kar-karu nmui' tuaf nua ntaman neu hi uim onen. Tuaf es anpaek tai arimat, ma nakrein kreni mnatu' naheun in akrurun. Tuaf es antein anpaek tai kro-roef. 3 Rarit hi mtaisiub ma mseun meu apaek tai arimat, he mfee ne 'took arekot ambi maat. Mes apaek tai kroef naan, hi mreun gwe mmak, “Amhake mbi kotin nee! Kaah fa te, amtook meu afu!” 4 Nok re' ranan hi mpiir humaf naan, hi on re' afeek rasi re' ka natai fa. Sarit amreu't ii, in es re' nafreu ki.5 Aok-bian manekat aar ki! Uisneno anpiir naan atoin a'baut anbi pah-pinan ia, he sin anpirsain ma'tani' neu Ne, on re' anbin sin neek ein anmu'i 'mu'if. Ma In anpiir sin amsa', he sin napenin sapaaf ma nama' et Uisneno In sonaf neno tunan, re' In nba'an he nfee je neu tuaf-tuaf re' anneek Ee. 6 Mes nok ranan hi mpiir humaf on re' naan, hi mmoe' he mi'paran atoin a'baut ein. Te kaah, sin ka nmo'en fa maufinu saa'-saa' neu ki. Hi mnikan, aa oo? Atoin amui't ein es re' nasusab niis ki. Ma sin es re' nati' te, namin rasi huma'-huma', ma nheer anfonat ki meu umi feek rasi. Sin es re' anpaar minan, on nai te hi mpaar knesan. 7 Hi re' naan Usif Yesus In nonot-asar sin. Mes atoin amui't ein, sin es re' na'uab na're'uf Usif Yesus In kanan arekot. On mee m'es hi maen mituin sin?
8 In areokn ii, hi mmoe' mituin Uisneno In atoran es, re' ma'tani' nneis nak, “Ho ro he mneek ho aok-bian sin, namnees on ho mneek ho tuam.” Atoran naan matu'i et Uisneno In Suur Akninu'.a 9 Mes karu hi mpiir humaf, ma mhariin ahaa atoin amui't ein sin neek ein, naan amtanhai mrair Uisneno In atoran. Natuin Uisneno In atoran hukun ate, hi msaan amrair. 10 Tuaf re' anmoe' natuin Uisneno In atoran hukun sin ok-oke', mes karu in ntanhai mees' aah, naan huma' mese' on re' in ntanhai nain sin ok-oke'. 11 Uisneno anfee nrair prenat nak, “Kais ammakoin karu ka fee-mone fa.” In anfee prenat bian amsa' nak, “Kais mi'maet atoni'.” Onaim karu hi ka mmakoin fa, mes hi mi'maet atoni', naan hi mtanhai mrair Uisneno In atoran hukun.b
12 Onaim karu hi mroim he mi'uab, ai' he mmoe' rais jes, hi ro he mimnau mak: Uisneno of es nafeek karu hit tmoe' tatuin In atoran he tmaneek es nok es, ai' kaah. Natuin atoran naan bisa nafetin kit na'ko In hukun. 13 Natuin Uisneno ka nkasian fa tuaf re' ka nmui' fa rais kasian neu tuaf bian sin. Mes karu hi mmui' rais kasian meu tuaf bian, Uisneno of anmui' rais kasian neu ki msa'. Hi kais mimtau mak hi of mipein Uisneno In hukun, natuin In nso'i nrair hi rais kasian ein.
Karu hit tpirsai batuur-batuur teu Uisneno, hit ro he tmoe' tatuin In Kabin ma Prenat
14 Aok-bian aar ki! Karu anmui' tuaf nak in npirsai Uisneno, mes ka nmoe' fa saa'-saa' he nakrira' in rais pirsait naan, naan ka ma'osa' fa. Rais pirsait on re' naan, ka neik je fa neu rasi 'honis. 15 Karu anmui' atoni' ai' bifee re' anperluu batuur-batuur, es re' ka nmui' fa pake-nohas, ai' ka nmui' fa mnahat. 16 Karu hi suma mak, “Amnao murek-reko'! Maut he Uisneno es anfee ko tetus-athoen. Kais ain ee ntaman ko! Kais mumnaah ammaet!” Uab ein naan ka ma'upan fa, karu hi ka mikrira' fa rais turun-babat meu sin.
17 Onaim ka nanokab fa, karu ho mak, ho mpirsai jah! Karu ho mpirsai jah, mes ka mmoe' mutuin fa ho rais pirsait naan, in ka ntaam fa ‘rais pirsait’ antein. Karu on naan ate, in on re' rais pirsait re' anmate nrair, ma ka ma'upa' fa saa'-saa'.
18 Anmui' tuaf bian bisa na'uab am nak, “Tuaf es bisa npirsai jah neu Uisneno, mes ka nmoe' fa rais reko. Tuaf es antein bisa nmoe' rais reko, mes ka npaek fa Uisneno In kanan.” Mes in raisn ii on nai: bukti na'ko ho rais pirsait aan, es re' ho mmoe' rais reko. Mes karu ho ka mmoe' fa rais reko, au ka bisa fa he 'iit bukti na'ko ho rais pirsait naan. Au bisa ukrira' au rais pirsait natuin ranan au 'moe' rais reko. 19-20 Ho mutuin noni' re' nak, “Uisneno naan, In mese' kuun. Ka nmu'i ntein fa bian.” Reko msa'! Mes niut reu'f ein sin reko nneis na'ko ko, natuin sin npirsain on re' naan amsa', tar antea sin namtau nmaten. Onaim kais mitenab mak, mihiin meik hi roenm ein te, nanokab. Kaah fa, tua!
Naan, mono! Karu rais pirsait ii ka manesa' ma ma'afa' fa, rais pirsait naan ka ma'osa' fa msa'.
21 Tait i'tope' ta'ko ka'o Abraham. Neno naan, in nmoe' natuin saa' re' Uisneno napreent ee, ma neik in anah nai' Isak he nafuat ee neu Uisneno nbi mei fuat. Es naan ate, Uisneno nak, “Nai' Abraham anmoe' batuur een!”c 22 Nai' Abraham anpirsai batuur, tar antea in nmoe' natuin Uisneno In aprenat naan. Onaim nok ranan naan hit tahiin tak, in npirsai nok neek akbubu' neu Uisneno, natuin in nmoe' natuin In aprenat. 23 Onaim rasin re' ia on re' matu'i et Suur Akninu' re' nak, “Nai' Abraham anpirsai Uisneno, rarit Uisneno ntoup gwe njair atoin neek amne'o.” Ma matu'i msa' am nak, “Nai' Abraham naan, Uisneno In soob neek reko.”d
24 Rais ji nakniun een, ai' kaah? Hit tahiin tak, Uisneno antoup mansian karu in rais pirsait neu Uisneno naan, es re' anmoo' je ma nroim he nmoe' rais reko. Pirsait ahaa te, ka nanokab fa.
25 A'tope' bian es re' bi Rahap, bifee a'hake' oras unu'. Oras atoin Yerikos sin naim he nroor na'maet atoin Israelas sin asuntiurs ein ate, bi Rahap na'koro' sin. Rarit in nreun sin he naenan npoin npe'on raan a'teta', he atoin ein kais anheek sin. Onaim Uisneno antoup bi Rahap anjair bifee neek amne'o, natuin in nmoe' rais reko naan.e
26 Rais pirsait re' ka manesa' ma ka ma'afa' fa, nahuum on re' aof re' ka masnasaf fa, es re' mates. On naan amsa', karu nmui' tuaf nak in npirsai Uisneno, mes ka nmoe' fa rais reko, in napoi! Naan, rais pirsait re' ka nmoin fa gwen.