Surat na'ko a'naak akrei uuf, kaann ee
nai' Yakobus
Tabe ma haan buseet
1
Tabe ma haan buseet na'ko au, nai' Yakobus kau. Au re' ia, Uisneno ma hit Usi', Yesus Kristus Sin aan renu'-aan reka'.Au 'tui surat re' ia, ma 'soun ee neitin ki atoin Yahudis re' hi mituin amrair Usif Yesus, re' hi mitua et are' pah-pah.a b
Karu nmui' ha'mu'it, maran ma mpirsai piut meu Uisneno
2 Aok-bian aar ki! Au he utoon ki on nai: karu hi mi'euk mok susat huma'-huma' te, kais amneek 'oer. Amtoup susat naan nok neek marine, natuin namuni te, of reko. 3 Fin hit tahiin tak, karu hi maran ambi susat on naan ate, ma hi msoi maan om mi'ko furit pah-pinan, ma hi mpirsai piut fe' meu Uisneno, naan anmoe' hi neekm ein naan antainiin ein, karu hi mipein rais furit pah-pinan bian. 4 Hi kais amtet-koit mi'ko susat. Maut he hi bisa minoni' he maran ambi susat, tar antea hi minokab ma mitiis jom. Nok ranan naan, hi mjair tuaf re' mimnasi mbi 'mo'et ma 'taos, ma ka mkuran fa saa' es amsa'.
Attoit saa' es na'ko Uisneno, ro he neek ii kais na'oni'
5 Karu na'ko hi aar ki, re' amnaben hi tuam ein ka mihiin fa raan a'po'i na'ko susat, hi bisa mitaan meu Uisneno, re' nahiin are' saa'-saa'. In es re' bisa nakrira' raan a'po'i neu ki. In es re' anfei ranan nok neek marine, ma In ka nato'on ki fa, karu hi mtoot Je. 6 Mes karu amtoot Je, ro he neekm aan kais na'oni'. Hi ro he mpirsai batuur-batuur mak, In bisa nfee saa'-saa' re' hi mtoot je naan. Fin karu hi mtoit nok neek a'oni', hi mjair on re' okin re' anpee' ma nrikraakn ok piut-piut natuin ain ko'u. 7-8 Tuaf-tuaf re' an'aijoo' gon, rabah ate in neekn ee ka natea fa nbi are' kanan rasi. In kais anharap ma nafnekan nak, in of napein saa'-saa' na'ko Uisneno.
Ama'mu'it ma amu'it
9 Atoin ama'mui't ein re' anpirsain nrarin neun Usif Yesus, sin ro he nharineb sin neek ein, natuin Uisneno nait sin anjarin In nonot-asar sin.
10-11 Ma atoin amui't ein re' anpirsain nrarin neun Usif Yesus, sin ro he nmarinan amsa', natuin Uisneno nanoni' sin he kais nabe'on. Oras ia, sin nahinin batuur nak, sin a'mui'k ein of namnekun, on re' fuboon aan, re' nasuuf ate reokn ii kah een, mes ka 'roo fa te, maans ee nsae ma ntaha' fubona' naan, rarit namneen. On naan amsa', atoin amui't ein. Maski sin ntaisibun nok sin uruusn ein, mes sin namnekun nkonon amsa'.c
Are' kanan rais reko mneem ii na'ko Uisneno, mes rais maufinu ka na'ko fa Uisneno
12 Uisneno anfee tetus-athoen neu tuaf-tuaf re' naran anbi rais furi' pah-pinan tar antea npoi nkoon. Rarit in ntoup in upa 'honis re' Uisneno nba'an anrair he nfee je neu tuaf-tuaf re' anneek Ee. In ntoup in upan on re' atopu kraa mnatu'.d
13 Mimnau mirek-reko'! Karu anmui' tuaf na'ko hi aar ki re' napein rais furi' pah-pinan, ma nroim he nmoe' sanat, kais mikuu mmak, “Naan, Uisneno es re' ansoba' kau!” Fin Uisneno ka nroim niit fa he nmo'en nsaan. Ma In ka nsoba' niit fa es amsa', he tuaf naan anroim he nmo'e nsaan. 14 Fin saant ii npoi na'ko atoni' in neekn ee kuun. Nahunu te, in nekan naan anroim he nmoe' amre'ut, rarit in nmurai natenab neu-mneem he nmoe' rais re'uf. 15 Onaim in nmoe' natuin tenab amre'ut naan. Namuni te, Uisneno nhukun na'maet tuaf-tuaf re' anmo'en amre'ut.
16 Aok-bian manekat aar ki! Kais tuaf es napoi ki npaek rasin re' ia.
17 Rais maufiun ii ka na'uun fa na'kon Uisneno. Mes In nfee kit tetus-athoen reko, ma are' saa'-saa' re' kninu' msa'. In es re' anmoe' manas, funan ma kfuun ein. Sin aar sin an'oins ok et neon gwe tnanan, ma nmoe' sin maofk ein na'bain ein piut-piut. Suma Uisneno kuun es re' ka na'bani' niit fa. 18 Uisneno nareon ma nabarab anrair neu kit on nai: In nfee In Kabin ma Prenat amneot neu kit. Ma In npaek In Kabin ma Prenat naan, he namonib kit. Na'ko are' kanan saa'-saa' re' In nmoe' sin anbin pah-pinan ia, In npiri nrair kit he tjair In hau fua unuf.
Amneen ma mmoe' mituin Uisneno In Kabin ma Prenat
19 Aok-bian manekat aar ki! Mimnau! Noni'-taru' areokt ii, on nai: kais mi'uab ruum-ruum aah. Reko nneis, karu nmui' tuaf bian na'uab reko, hi mneen mirek-reko'. Ma kais maan aa fa te mitoo'. 20 Natuin karu mitoo', atoni' ka neu he nmoe' fa rais reko natuin Uisneno In romin.
21 Onaim hi ro he misnasab hi tuam ein mi'ko 'moe' sanat, nahuum on re' atoin tani antoof in rene, rarit nout makrauf ein naan. Ma hi ro he mtoup Uisneno In Kabin ma Prenat nok neek a'paran amsa'. Kabin ma Prenat naan, on re' fini re' anbeben ma ansenan sin et hi neekm ein. Karu hi mmoe' on naan ate, Uisneno of nsoi nafetin nain ki na'ko hi saant ein ok-oke', ma In ntoup ki, rarit hi mmoin mok Ne nabar-baar.
22 Ma karu hi mihini mrair Uisneno In Kabin ma Prenat sin ate, hi ro he mmoe' mituin sin. Kais amneen aah! Karu hi mneen ahaa, ma ka mmoe' mituin fa, hi mipoi hi tuam ein kiim. 23-24 Karu atoni' anneen anrair Kabin ma Prenat naan, ma ka nroim he nmoe' natuin sin fa, in on re' tuaf re' ankius in human et ninu. Mes oras anninun nrair ma nasaitan ninu naan ate, in nnikan nain in human. 25 Mes hi kais amnikan he mparikas mirek-reko' Uisneno In Kabin ma Prenat re' namtiis, re' bisa nsoi nafetin naan atoni' na'ko in saant ein ok-oke'. Uisneno of anfee tetus-athoen neu ki anbi are' kanan saa'-saa' re' hi mmoe' sin, asar ramu hi mneen ma mituin In Kabin ma Prenat. Kais aar antaam anbi hi rukim a'rii, rarit anpoi nkono npeo' hi rukim a'ne'u.
26 Karu tuaf anpaas on nak in atoin amakoet anbi rais Uisneno, mes ka nafreu nahiin fa in fefan, tuaf naan in napoi in tuan aa kuun. In rais pirsait naan, parsuum aah. 27 Natuin rais pirsait re' kniun ii, ka n'oemeet kuun fa. Naan es re' anharineb Ama' Uisneno In nekan. Rais pirsait re' batuur on naan, in nmoe' tuaf anroim he nturun ma nbaab bifee baun ein, ma kome'-manat sin. Tuaf re' na'kii' anbi rais pirsait on re' naan, ka nrae natuin fa furit na'ko rais amre'ut, ma npanat in kaan foo menin.