3 Pah-pinan ma neon gwe tnanan re' hit tiit sin oras ia, hit tpirsai tak, Uisneno es anmoe' sin ok-oke'. Mes In ka nmoe' sin fa npaek baer es, re' anmui' nain, re' mansian ii bisa niit ma nre'o. Are' saa'-saa' re' ia, anjarin natuin In na'uab anpaek In Kabin ma Prenat kuun.^a

4 Nai' Habel anpirsai Uisneno. Nok ranan naan, in neik fua'-turu' re' reko nneis na'ko in tataf nai' Kain. Uisneno antoup reko neu nai' Habel nok in fua'-turu' naan, natuin in neekn ee namneo ma namnoon. Onaim maski in nmate 'roo gwen, mes hit bisa tanoni' fe' na'ko nai' Habel, natuin in rais pirsait naan.^b

5 Nai' Hanok anpirsai Uisneno msa'. Nok ranan naan, Uisneno nait nasaeb ee ntaam neu sonaf neno tunan, he in kais anmaet. Tuaf-tuaf naim je, mes ka niit ee fa, natuin Uisneno nait nasaeb anrari. Uisneno antoup gwe nok reko, fin Uisneno nak, “Nai' Hanok ia, tuaf re' anharineb Au nekak.”^c

6 Onaim aok-bian aar ki! Batuur-batuur kniun een. Uisneno ka ntoup reko fa neu tuaf-tuaf re' ka npirsai Je fa. Fin tuaf-tuaf re' he neem ma ntaam neu Uisneno, in ro he npirsai nak, Uisneno naan ro batuur-batuur et na. Ma in imsa' ro he npirsai nak, Uisneno nroim he nturun ma nbaab tuaf-tuaf re' neem ma naim Je.

7 Nai' Noh anpirsai Uisneno msa'. Nok ranan naan, Uisneno natoon nain ee mnak, “Noh! Mumnau, he! Au of ureu' pah-pinan ia 'paek noe mahenu' ko'u, re' mansian ii ka niit-niit ee fa fe'.” Maski nai' Noh ka niit niit fa on re' naan amsa', in nneen ma natniin Uisneno. In nmo'e bnao oe he nasaeb in uim je nanan, he sin napenin fetin na'ko siraak. Natuin in rais pirsait naan, Uisneno naan ee njair atoin neek amneot ma amnonot. Mes mansian bian ein ok-oke' re' ka npirsain fa, Uisneno nasanut hukun ma'fena' neu sin.^d

8 Ka'o Abraham anpirsai Uisneno msa'. Nok ranan naan, Uisneno no'en ma nhaman ka'o Abraham am nak, “Abraham! Ampoi ma mnao musaitan ho kuan naan, mnao nai meu bare re' au of ukrira' ma ururu' ko. Bare naan of anjair pusaak neu ho sufa'-ka'uf sin.” Anneen on naan ate, in nmoe' natuin Uisneno In romin, maski in ka nahiin fa he nnao neu mee.^e 9 Oras in ntea bare naan, in nahake' tenar, ma natua on re' anao-amnemat anbi bare re' Uisneno anba'an he nfee je neu na. Rarit in anah nai' Isak nok in upuf nai' Yakop natuan anbin naan amsa', natuin Uisneno anba'an anrair he nfee bare naan he njair sin pusaak.^f 10 In nafnekan ma nharap he in of anmoni nbi kota ma'tain es. Fin Uisneno kuun es re' anmoe' gambaran he nafena' kota naan.

11 Ain Sara', ka'o Abraham in fee, anpirsai Uisneno msa'. Maski in ka nahoni' niit fa fe', ma namnais re'-reu'f een, mes Uisneno nmoo' je njair ain uuf neu pah kou' gwes. Fin in npirsai nak, Uisneno ro tebes anmoe' natuin saa' re' In nba'an anrair je naan.^g 12 Nok ranan naan, maski in namnais re'-reu'f een amsa', in bisa nahoni' ma nasuuf amfa-faun fe', tar antea ka tiit fa tuaf re' bisa nsoi' naan sin. Fin sin amfauk ein on re' kfuu et neon gwe tnanan, ma on re' snaen et tais je ninin.^h

13 Hit be'i-na'i sin, ka'o Abraham, ka'o Isak, ma ka'o Yakop anpirsain piut-piut neun Uisneno msa' tar antea oras sin nmaten. Mes sin ka ntoup fa pah re' Uisneno anba'an anrair je naan. Maski on naan amsa', sin nafnekan ma nharap piut nok neek marine, natuin sin niit anrair bare naan na'ko 'roo. Fin sin nmanauk ein nak, sin suma anao-amnemat re' natua ntahan anbi pah-pinan ia.ⁱ 14 Te kaah, batuur-batuur tuaf re' na'uab on re' naan, sin npa-paon he napein bare he njair sin auf pusaak. 15 Karu pah naan re' hit nai'-ka'o sin anpa-pao gwe naan, es re' ka'o Abraham in kua mnaa' ate, ro tebe, ro nmui' oras mainuan he sin nfanin neun naan. 16 Mes pah re' sin npa-pao gwe naan, es re' pah re' ma'tani' nneis et sonaf neno tunan. Nok ranan naan, Uisneno antoup sin reko he sin njarin Iin na. Fin In nabarab anrair kota es neu sin et sonaf neno tunan.

17-18 Ka'o Abraham anpirsai batuur-batuur neu Uisneno msa', oras Uisneno nsoba' in neek pirsait naan. Nok ranan naan, in nmoe' natuin Uisneno In aprenat he nnona' ma nfee in anah nai' Isak he njair fua'-turu'.^j Te kaah, unu' fe'e te, Uisneno nahake' rais manba'an anmatoom nok ri'ana' naan am nak, “Na'ko ho anah nai' Isak re' ia, ho of mupein sufa'-ka'uf amfaun, tar antea sin njarin pah es, re' ma'tain re'uf.”^k 19 Mes ka'o Abraham natenab anrair nak, Uisneno anmui' kuasa he namonib nafani' amates. Batuur on naan, oras naan in on re' napein nafani' in anah re' anjari nrair fua'-turu'.

20 Ka'o Isak anpirsai Uisneno msa'. Nok ranan naan, in ntoit he Uisneno anfee tetus-athoen neu in anah nai' Yakop ma nai' Esau.^l

21 Ka'o Yakop anpirsai Uisneno msa'. Nok ranan naan, oras in he noi nmate te, maski in a'sau'n ee na'kuub ma nnaa' teas, mes in nhaek he na'ruri' ma na'besan Uisneno. Rarit in ntoit Uisneno nfee tetus-athoen neu in anah nai' Yusuf in aanh ein.^m

22 Ka'o Yusuf anpirsai Uisneno msa'. Oras in he noi nmate te, in npirsai nak, Uisneno of napoin In too Israelas sin na'kon pah Masir. Es naan ate, in nba'an nain sin, he sin ro he neik in nuif ein, karu sin nasaitan pah Masir.ⁿ

23 Ka'o Musa in ainaf-amaf anpirsain Uisneno msa'. Oras in ainf ee nahonis anrair je, sin na'koor ee tar antea funan teun, natuin sin nkius in aon naan reokn ii kah een. Ma sin ka namtausan fa usif pah Masir amsa', maski in aprenat iin na nak, “Amneoka' miis main are' ri'aan moen ein ok-oke' re' bifee Ibranis sin nahonis sin.”^o

24 Oras ka'o Musa na'nae neem, in anpirsai Uisneno msa'. Natuin unu' fe'e te, usif pah Masir in aan feto nsee' naan ee njair in anah. Maski on naan amsa', mes in ka nroim fa he atoni' naan ee njair usif pah Masir in nonot-asar.^p 25 In natenab nak, reko nneis in nmoni nbi susat nabu-bua nok Uisneno Iin na. Karu in he nmariin mes in nmoin nok amaufiunt ein, naan ka 'roo fa te, oek' een. 26 In nkonan biak ein ankana'paar ee, natuin in nafnekan ma nharap Kristus, Tuaf re' Uisneno anba'an anrair he nsoun Ee neem. In naran ma ntahan on re' naan, natuin in nahiin Uisneno of anbaras neu ne nok upan re' reko nneis na'ko are' kanan a'mu'if anbi pah Masir naan.

27 Ka'o Musa npirsai Uisneno msa' oras in ntoit mainuan neu usif pah Masir he neik hit be'i-na'i sin anpoin na'kon pah naan. Maski usif naan natoo' mates, mes ka'o Musa ka namtausn ee fa. Ka'o Musa npirsai piut neu Uisneno re' ka mamnita' fa, nahuum on re' in niit kuun Ee gwen.^q

28 Ka'o Musa npirsai Uisneno msa' oras sin nabaarb ein he nasaitan pah Masir. In nmoe' natuin Uisneno In aprenat, ma nreun hit be'i-na'i sin nmo'en Paska ahunut. Oras naan sin nroron a'bib-kase he njair fua'-turu'. Rarit sin nait naa' 'bib-kase naan ma nahoesb ee njair tanar anbi sin umin. Mabe' naan, Uisneno In ameput na'ko sonaf neno tunan neem ma na'maet nain are' kanan aan moen unu anbi pah Masir. Mes in ka ntaam fa he nroor hit be'i-na'i sin anbi sin umin, natuin in niit naa' anbi eno'.^r

29 Oras hit be'i-na'i sin anpoin na'kon pah Masir, sin npirsain Uisneno msa'. Es naan ate, Uisneno npoor ma nbia nbatis oe tasi anbi Tais Me'e, he sin nnaon ma npoin ntean panin anbin auf meto'. Mes soraurs ein pah Masir re' anriu' natuin sin naan, anreem anmaten oras sin ntaman nbin bare naan.^s

30 Oras hit be'i-na'i sin antaman ntean nrarin pah Kana'an, sin anpirsain Uisneno msa'. Sin natuin In aprenat. Sin nnaon nfuun natef-tefan kota Yeriko in raem kotif neno hiut. Onaim rame' naan anpee' ma ntaikoib nain.^t

31 Anmui' naan bifee a'hake' es anbi kota naan, kaann ee bi Rahap. Natuin in npirsai Uisneno, es na' in ntoup nok reko atoin asuntirus na'kon too Israelas sin, ma in na'koro' sin anbin in umi. Rarit Uisneno nareu' nain kota Yeriko nok nain in tuak ein, natuin sin ka nromin fa he nneen ma natniin Ee. Mes Uisneno namnau ain Rahap. Ain Rahap anmoin, natuin in neek pirsait naan.^u

32 Au bisa u'uab amnanu'-mnanu' a'tein fe' anmatoom nok tuaf bian antein re' anpirsain neu Uisneno. Mes au ka 'mui' fa oras he ureta' tar namnuut anmatoom nok nai' Gideon, nai' Barak, nai' Simson, nai' Yefta, nai' Daut, nai' Samuel, ma Uisneno In mafefa kninu' bian sin.^v 33 Sin ar-arsin anpirsain neun Uisneno. Nok ranan naan, bian nisan anbin makenat nok usif bian. Bian anna'an aprenat nok neek amneot ma amnonot, he npeis tuaf re' ka nmui' fa sanat, ma anhukun re' asanat. Bian antoupun saa' re' Uisneno anba'an anrair je. Ma bian niis naan meo'-ro'i singa.^w 34 Bian na'maet ai piin ko'u. Bian Uisneno nsoi nafetin sin na'ko marorot anpaken suni'. Bian ka na'be'in fa, mes Uisneno nha'tain sin ma nfeen sin a'be'if ma'tani'. Bian Uisneno nfeen sin a'be'if ma'tani' he bisa nmakenan, tar sin bisa nbeson ma nriu' na'roob soraur musu sin na'kon bare bian.^x 35 Bian bifee-fee re' antoup nafani' sin nonot-asar sin, re' Uisneno namonib nafani' sin.

Mes bian napenin ha'mu'it ma'tani', natuin sin npirsain neun Uisneno. Sin nromin he nmaten ate es re' reko nneis ji, he sin kais annaon koit Uisneno. Fin sin ka nteet nafeek fa sin rais kua'-nonot nok Uisneno. Onaim sin nafnekan ma nharap nak, Uisneno of nait sin he napenin 'monit arekot anneisi ntein' et sonaf neno tunan.^y 36 Tuaf bian anratin ma nkana'paar sin, bian napenin beso'. Bian sin haek ein anhaip sin anpaken a'hapi' re' anteek ee nak, pasung anbi bui.^z 37 Bian anmaten natuin anpoir niis sin. Bian anheo niis sin. Bian anmaten suni'. Bian nma'mu'in nmaten, suma nmu'i haa tais anbi aon re' anmoo' je na'ko pasu, natuin atoni' nasusab sin, tar anriu' sin,^a 38 ma sin naen natuan nbin baer ruman, nbin a'toe'f ein, anbin nuat ein, ma anbin koon ein. Tuaf ankana'paar atoin ein re' ia, ma anriu' sin nnaon natuan nbin baer re'uf. Te kaah, sin pirsait naan ma'tain besi, tar antea tuaf anbi pah-pinan ia, ka pantas fa he natua nabua nok sin.

39 Uisneno anbo'is sin aar sin re' ia, natuin sin anpirsai Je. Mes antea oras sin nmaten amsa', sin ka ntoup fa saa' re' Uisneno anba'an anrair je naan. 40 In he nmoe' natuin In rais manba'an naan, anpaek ranan re' reko nneisi. Natuin In nroim he hit aar kit bisa tmoin piut tok Ne: es re' hit aar kit re' ia re' tahini trair Kristus, ma sin re' anmaten nrarin un-unu' naan.