12
Onaim on mee, hit amonit oras ia? Hit on re' tuaf re' nok anbi mnaenat. Hit be'i-na'i sin re' anpirsain neun Uisneno un-unu' naan, sin on re' akiust ein, re' na'haba' kit. Mes karu hit atmafuut fe' tok hit saant ein, naan hit amnaent ii ma'fena'. Es naan ate, hit ro he tait itporin hit saant ein ok-oke', he hit bisa taen ta'bei'. Fin Uisneno anpiir nain kit aar kit een, he hit tok atbi mnaenat re' ia, onaim hit ro he taran ma ttahan tar antea fenis amsoput. 2 Ma oras hit ttaen, hit kais atniik ai' tasneku' 'rii ma 'ne'u, mes atkius teu Nai' Yesus anmees. Natuin In es re' anfei ma naruru' ranan he hit bisa tpirsai Uisneno. Ma In of anturun ma nbaab kit he bisa tpirsai piut-piut tar namsoup. Hi mimnau, ai'? Oras Nai' Yesus napein ha'mu'it ma ma'ne'at anbi hau nehe, atoni' anraitn Ee ma nkana'paar Ee, mes In naran ma ntahan. Natuin In nahiin nak, In ha'mu'it naan oek' een, In neekn ee of anmainua ma nmariin. Naan ro batuur. Fin In nmate nrair, onaim Uisneno nait nasaeb Ee ma ntook et Uisneno In abnapan a'ne'u, he Sin nua sin napreent ein bu'-bua'. 3 Maski biak ein anmo'en maufinu neu Ne, mes In naran ma ntahan piut. Onaim hi kais amnikan Nai' Yesus In ha'mu'it ia, he hi bisa maran ma mtahan piut-piut amsa', ma kais am'oer.Uisneno nroim he nakain kit he nanoni' kit, on re' mahoint es nanoni' in anah
4 Hi mraban amrair rais maufinun, mes hi ka mraban ma'tani' tar antea hi naa' ii nsai fa fe'. Ai', on mee? 5 Of oni' hi mnikan amrair Uisneno In Kabin ma Prenat re' In natoon anrair neu ki, on re' mahoint es na'uab nok in anah am nak,
“Anah!
Karu hit Usi' anhukun he nanoni' ko, he ho mmoin mutuin raan a'honis amneot-amnonot,
ho kais amkoson uab ein naan ma musmeru' sin!
Ma karu In nakaina' he nanoni' ko,
ho nekam naan kais nabait.
6 Hit Usi' nakaina' he nanoni' tuaf re' In neek ee.
Batuur, are' tuaf ein ok-oke' re' In antoup sin anjarin In aanh ein,
In ro he nakaina' sin he nanoni' sin.”a
7 Onaim karu Uisneno nakaina' he nanoni' ki he mmoin mituin ranan re' batuur ate, maran ma mtahan ambi rasi naan. In nmoe' on re' naan, natuin hi mjari mrair In aanh ein. Fin mahoint ii ro he nakaina' ma nanoni' in anah, tar antea ri'ana' naan nahiin 'monit re' natuin raan reko. 8 Fin karu Uisneno ka nakaina' fa he nanoni' ki on re' In anah bian sin, rasi naan in oetn ii nak, hi re' naan, hi ka anah Uisneno ki fa.
9 Hit biasa thormaat hit mahoint ii anbi pah-pinan ia, natuin in nakaina' he nanoni' kit oras hit ana' fe'. Naan ro batuur. Mes anneis-neisi ntein' ii, hit ro he tneen ma tatniin Uisneno, natuin In re' naan, hit Ama' et sonaf neno tunan, ma In nroim he nakaina' kit he nanoni' kit he tmoin tatuin In raan amneot ma amnonot. 10 Hit mahoint ein, nakaina' he nanoni' kit suma oras akre'-reo' gwah, natuin saa' re' in nak reko. Mes Uisneno nahini nneis saa' re' tperluu he hit tanoin ee. Es naan ate, In nakaina' he nanoni' kit he tmoni kninu' on re' Iin. 11 Batuur! Karu nakaina' kit, hit neek ii ro nabait. Mes a'roo-'roo te, hit neek ki n'oeteen ma na'tena', natuin hit tahini trair he tmoin tatuin Uisneno In romin.
12-13 Aok bian ar-arki! Miheran hi 'niim ein re' an'oren nrarin naan, ma mha'kaaf hi haem ein re' ma'feen' ein naan. Kais maen penu-penu, mes maen amneof aah, he bian re' ka bis-bisa fa gwen ate, bisa napenin ma'tanif he bisa naenan piut. Hi ro he mha'tain hi neekm ein naan, he maran ma mtahan, ma mpirsai meu Kristus.b
Kais amtorak Uisneno In nekan arekot neu ki
14 Aok-bian apirsait ein meu Kristus! Hi ro he mpasan hi tuam ein naan he mmoin nok rais rame' es nok es. Ma m'usaha he mmoin nok akninu'. Fin tuaf-tuaf re' ka kninu' fa, ka bisa niit fa Uisneno.
15 Ammaha'tanin ma mma'haba' es nok es he kais anmui' tuaf na'ko ki re' ntet-koit ma nasaitan ki, tar sin ka nnaben naan fa Uisneno In nekan arekot. Ampanat mirek-reko' he kais anmui' tuaf neekn ee nameen anbi hi sonam ma hit tnanam. Fin karu on naan ate, in of anjair on re' raso re' nameun ma nareu' too mfaun.c 16 Ampanat amsa' he kais anmui' tuaf re' nbeoka' in nekan ma anteib neu rais sona'. Rarit ampanat amsa' he kais anmui' tuaf re' ka ntoe fa Uisneno, on re' nai' Esau. Nai' Esau naan, ka'o Isak in aan moen unu. Neon gwes ate, nai' Esau nfain neem nok tai ruman. In ntoti mnahat a'piik es na'ko in orif nai' Yakop. In nfee in hak aan moen unu njair baen neu mnahat naan.d 17 Mes hit tahiin tak ka 'roo fa te, nai' Esau anmei' jon. Natuin oras aam Isak he ntoit Uisneno he nfee tetus-athoen neu aan moen unu, nai' Isak ka bisa ntoti ntein fa gwen, natuin nai' Esau na'sosa' nporin nok ruum-ruum aah hak aan moen unu naan. Etun maski in nkae npin-pinus amsa', in ka bisa napein nafani' fa saa' re' in nporin anrair je.e
18 On nai, aok-bian aar ki! Hit bisa teem atrair teu Uisneno In human ma In matan, tatuin raan fe'u re' In nfei nrair je neu kit. Mes un-unu' fe'e te, hit be'i-na'i sin ka bisa fa on naan. Oras naan Uisneno nahake' rais manba'an nok sin, oras sin nbin a'toe'f es, kaann ee Sinai. Anbi 'to'ef naan in tunan anmui' ai apinat. Anmui' ain ko'u msa'. Ma 'to'ef naan meis'ookn ii an'aum naan ee msa', tar sin namtaun nmaten. 19 Sin anneen toi's ee nahaan, rarit Uisneno In hanan re' ma'tain re'uf naan anpoi neem na'ko 'to'ef naan. Anneen Uisneno In uaban on naan ate, sin namtaun piut, tar antea sin ntoit ka'o Musa nak, “Airoo! Hai ka bisa mtahan maan fa gwen. Hanaf ia ma'tain re'uf!”f 20 Sin batuur-batuur ka bisa ntahan naan fa, natuin saa' re' Uisneno naprenat neu sin naan, ma'feen re'uf. Natuin in naprenat am nak, “Ka bole fa he nmui' tuaf anteri nbi 'to'ef ia! Maski mansian, ai' mu'it! Sekau-sekau re' anteir a'to'ef ia, ro he mpoir miis ne nmaet.”g 21 Saa' re' sin niit ee anbi 'to'ef naan, batuur-batuur sin napipin sin aok ein, nasmanan ma namtaun nmaten. Tar antea ka'o Musa msa' npuus anmeit-meit.h
22 Mes oras ia, ranan he tnao teu Uisneno natsoi nrair, ma hit bisa ta'uab langsung tok Ne. Oras ia hit teem teu toe'f es, kaann ee, Sion. Anbi bare naan, kota Yerusalem et naa. Ka kota Yerusalem pah-pinan ia fa, mes kota Yerusalem fe'u et sonaf neno tunan, es re' Uisneno In bare 'tokos. Anbi naan, Uisneno In ameupt ein sonaf neno tunan namfa-faun, re' anfeest ein rame-rame. 23 Anbi kota naan amsa', anjair bare re' na'bua' naan apirsait ein neun Kristus. Fin Uisneno anmo'e nrair daftar he ntui sin kaank ein tuaf mese'-mese' et sonaf neno tunan. Anbi naan amsa' Uisneno of anparikas ma nfee nilei neu tuaf-tuaf sin ok-oke' sin a'moink ein. Anbi bare naan amsa' are' tuaf ein ok-oke' nabuan, re' un-unu' fe'e te, Uisneno antoup sin reko, natuin sin anpirsain neu Ne. Anbi naan, sin anjarin tuaf re' nanokab ma namtiis. 24 Ma nbi naan amsa' Nai' Yesus et naa, re' anjair nete-ranan neu Uisneno nok mansian. Nai' Yesus anmaet, In naa' ee nat'oop ma nasai, he Uisneno bisa nahake' rais manba'an fe'u nok kit. Etun Nai' Yesus In naa' naan, anhainiik Uisneno In nekan. Mes re' ia a'teta' na'ko nai' Habel in naa' anbi reta' ahun-hunut naan. Oras nai' Kain anroor niis nai' Habel, nai' Habel in naa' re' nat'oop naan, anmoe' Uisneno In neekn ee maputu', tar antea In nasanut ma nfee hukun neu nai' Kain.i
25 Ampasan hi ruikm ein mirek-reko' he mneen saa' re' Uisneno anroim he na'uab ee neu ki. Kais ammoe' on re' hit be'i-na'i sin, re' antorak nain ka'o Musa in uaban oras in njair Uisneno In mafefa kninu' anbi pah-pinan. Rarit Uisneno nasanut ma nfeen sin hukun. Saa' antein hit! Karu hit ka tneen ma tatniin fa Uisneno In uaban na'ko sonaf neno tunan, ro batuur In hukun kit ma'fena' nneis.j 26 Oras hit be'i-na'i sin anhaken nbin a'to'ef Sinai, Uisneno In haan ee ma'tain re'uf, tar antea auf gwi na'beko'. Oras ia, In nahake' rais manba'an nak,
“Au of u'beko' auf gwi no gwes antein,
mes ka neu fa haa, he auf gwi nmees na'beko',
fin neon gwe tnaan ee msa' na'beko' nok.”k
27 Oras Uisneno na'uab nak, In he nmoe' are' saa'-saa' ii na'beko' “no gwes antein”, in oetn ii nak, Uisneno nroim he na'beko' saa'-saa' ein re' In nmoe' sin, et neon gwe tnanan ma pah-pinan, tar antea re' ka bisa ntahan fa, namnekun nfinin. Re' mee bisa ntahan ate, naan natua nabaar.
28 Uisneno annaa' aprenat et sonaf neno tunan. Naan ka bisa namreu' fa. Reko kuun! Natuin In nroim he ntoup ki mtaam amjair Iin na nbi bare naan, iim aar kit attoit makasi teu Ne, ta'ruri' ma ta'bees teu Ne, ma taikas ta'rat-raatn Ee natuin In re' naan ma'tain re'uf! 29 Mes hit ro he tpaant ok amsa', natuin Uisneno In to'os, nahuum on re' ai re' nout nain are' kanan saa'-saa' ii ok-oke' tar antea nputun nmaten.l