Surat na'ko nai' Paulus ansoun ee neu
Nai' Filmon
Tabe ma haan buseet
1
Surat re' ia, na'ko au nai' Paulus kau. Au partei nai' Timotius ansonu' haan tabes ma haan buseet amsa'. Asar ho muhiin, sin nataam kau es bui et bare ia, natuin au 'eut ma utoon anmatoom nok Yesus Kristus.Au 'tui surat re' ia,
'soun ee 'eu ko Filmon, re' hai mneek, ma mjair partei ambi mepu mese' mok kai;
2 ma 'eu bi Apfia,a re' hai maan ee on re' hai feto';
ma 'eu nai' Arkipus, re' anmeup ma'tani' nok kai mbi mepu ia;
ma 'eu are' too apirsait ein re' nati' te, nabuan ma n'oen ein anbin ho umi.b
3 Au 'toit 'ak Ama' Uisneno ma hit Usi' Yesus Kristus nakrira' Sin nekak arekot neu ki aar ki, he hi bisa mmoin nok mamut, rame' es nok es, ma tainina'.
Nai' Paulus antoit sukuur natuin nai' Filmon in a'monin
4 Ba'e Filmon! Au 'onen es mee te, au 'teek ko, ma 'toit makasi 'eu Uisneno natuin ho 'monim naan. 5 Au 'neen a'rair uab reko namfau, anmatoom nok ho pirsait naan meu Usif Yesus, ma ho rais manekat meu apirsait ein. 6 Natuin ho rais pirsait naan, ho bisa mmoin nekaf mese' mok apirsait bian ein. Au 'onen he karu hi mikrira' hi neek rekon es nok es, hi bisa mihiin mirek-reko' are' kanan rais reko re' hit bisa tmoe' sin teu Usif Yesus. 7 Ba'e! Natuin ho manekam naan, ho mmoe' au nekak ia anmariin, ma neiki 'be'if ha'tanis neu au nekak. Ma ho rais manekat naan amsa', neiki 'be'if ha'tanis neu apirsait ein.
Nai' Paulus antoit he nai' Filmon nakrira' in manekan neu nai' Onisimus
8-9 Ba'e! Au 'perluu ko on nai: au 'jair Kristus In haef. Nok ranan naan, au 'mui' hak he uprenat ko ammoe' rasi pisa' ia. Mes au ka 'roim fa he upren-reent aah, suma au 'toit turun-babat, nahuum on re' tuaf re' namnasi nrair antoit turun-babat. Au 'jair atoin bui natuin au utuin Yesus Kristus, etun au ubrain he 'toit turun-babat na'ko ko, natuin au uhiin ho manekam meu too mfaun ein. 10 Au 'toit he ho mukrira' ho manekam meu au anah nai' Onisimus. In re' naan on re' au aanh aa kuuk, natuin In npirsai Nai' Yesus na'ko au meup ki, 'bi bui re' ia.c
11 Au uhiin 'ak nai' Onisimus naan, ho ate re' naen nasaitan ko. Oras in nbi ho 'nimam, in ka mapake' fa. Mes oras ia, au 'pirsai 'ak in of mapake' neu hit nua kit.d 12 Au 'neek 'iis ne, mes maut he au 'reek ee ntebi nfain neit neu ko.
13 Amneon ii, au he 'tahan 'aan ee, he in bisa nsenu' ko, he ntuthae kau 'bi bare ia. Natuin anbi bare ia, au ka upein fa mainuan he 'moe' saa'-saa'. Au 'jair atoin bui, natuin au utoon ma ubeno' rasi anmatoom nok Usif Yesus In Rais Reko. 14 Mes au ka 'roim fa he ho mutaah mak, ‘tua’ on re' naan, natuin on re' ho mnaben ate atoni' na'seke' ko. Au roimk ii te, ho mmoe' rais reko ma mmoe' arekot mutuin ho roim maan kuum. Onaim karu ho ka mtoup reko fa fe'e te, au ka 'roim fa he 'moe' saa'-saa' anmatoom nok nai' Onisimus re' ia, natuin naan ho hak.
15 Ai' ho of mutenab on nai: Uisneno ankonan nai' Onisimus nasaitan ko ka 'roo fa, he in nfain neem ma natua nok ko. 16 Oras in naen nasaitan ko, in suma ho ate. Mes oras ia, in nfain neem, in njair ho ori' re' ho mneek main je. Au a'neek 'iis ne msa'! Onaim oras ia, in mapake' anbi ho 'nimam, ka neu he njair fa ho ate, mes anjair ho ori' msa' re' hi mpirsai bu'-bua' meu Kristus.
17 Onaim on nai ba'e! Karu ho maan kau 'jair ho partei ambi mepu mese' te, au 'toit he ho mtoup mufain' ee, nahuum on re' au es re' amnemat. 18 Mes karu nai' Onisimus anmo'e nsaan neu ko, ai' anmui' tusa' fe' neu ko, maut he au es re' utaah tusa' naan. 19 Amkius kuum surat tusa' re' ia, au 'tui je 'eik kuuk au 'nimak: Au, nai' Paulus of a'baen nai' Onisimus in tusa' 'eu nai' Filmon. Nanokab, aa oo? Au kais umnaub ko, ho tusa' neu kau re' ko'u nneis ji, es re': ho mjair Uisneno Iin ja, natuin au meupk aa.
20 Batuur, ba'e! Maut he ho mturun kau mbi rasi pisa' re' ia, natuin hit atmakua'nonon atbi Uisneno. Natuin hit aar kit atjair Kristus Iin na, etun au neek ii natee ma na'tena'.
Nai' Paulus nasoup in surat
21 Ba'e! Au 'tui 'aan surat re' ia ma 'soun ee 'eu ko, natuin au 'pirsai 'ak ho of amneen murek-reko' kau. Au 'naben ho of ammo'e nneis na'ko saa' re' au 'toot je.
22 Anmui' rasi piis es antein. Mubarab maan kau ke'en es. Natuin au 'pirsai 'ak Uisneno anneen hi onen totis sin, ma In of anfei ma nasoit ranan he au 'poi u'ko bui re' ia, he au 'uum a'kius ki 'tein a'bi naan.
23 Nai' Epafras es ia. In njair atoin bui msa', natuin in n'eut ma natoon rasi anmatoom nok Yesus Kristus, on re' au. In nsonu' haan tabes ma haan buseet amsa' neu ko.e 24 Nai' Markus, nai' Aristarkus, nai' Demas, ma nai' Lukas esan ia msa'. Hai mmeup mibu-bua. Sin nsoun ein haan tabes ma haan buseet amsa' neu ko.f
25 Au 'toit 'eu hit Usi' Yesus Kristus he In nakrira' In nekan arekot neu ki aar ki.
On re' naan, tua!
Saloom,
Au, nai' Paulus kau, tua.