Kristus anmaet no mees' aah, he mansian ii bisa nmoin reko nok Uisneno nabar-baar
10
Karu hit troim he tahiin batuur-batuur Uisneno In romin, atoran re' In nasaunt ee neu hit be'i-na'i sin naan, ka mahini' reko fa fe'. Naan suma on re' rais rekon Uisneno sin maofk ein, re' he nfee sin neu kit. Onaim maski atoni' natuin atoorn ein re' naan, neikin mu'it he nafuat sin piut-piut amsa', naan ka bisa nakninu' sin fa batuur-batuur na'ko sin saant ein. 2 Fin karu atoorn ein naan bisa naneuk nain saant ein batuur-batuur ate, sin ka neikin ntein' ein fa mu'it he nafuata' sin, natuin sin nnaben ate sin saant ein anbin sin neek ein namnekun nrarin. Te kaah, ka on fa naan. 3 Fin toon-toon ate sin ntotin teni-teni fani-fani, he Uisneno nnoes ma nsaok nain sin saant ein, 4 natuin ka neu fa he naa mu'it anmui' kuasa batuur he nait inporin mansian ii sanat.5-6 Es naan ate, Kristus na'uab on nai oras In ntaam neem anbi pah-pinan ia:
“Uisneno!
Uisneno ka nmariin fa meu mu'i-'turu' ma fua'-turu' bian antein re' sin neik sin.
Sin nroor niis nain mu'it amfa-faun,
he njarin fua'-turu'.
Rarit sin nout mu'it amfa-faun,
he ntotin saok sanat.
Maski on naan amsa', mes Uisneno In nekan ka nmariin fa.
Es naan ate, Uisneno anreek ma nsonu' Kau 'uum a'taam 'eu pah-pinan ia,
he 'jair mansian on re' sin.”
7 Rarit Kristus na'uab antein am nak,
“Uisneno! Au es ia, tua!
Au 'uum he 'moe' utuin Uisneno Ho romim,
on re' Ho mafefa kniun' ein antui nain sin anmatoom nok Kau.”a
8 Onaim re' Kristus na'uab ee ahuunt aan, es re':
“Uisneno ka nmarinan fa mu'i-'turu' ma fua'-turu' bian antein re' sin neik sin.
Sin nroor niis nain mu'it amfa-faun,
he njarin fua'-turu'.
Rarit sin nout mu'it amfa-faun,
he ntotin saok sanat.
Maski on naan amsa', mes Uisneno In nekan ka nmariin fa.”
Onaim maski sin nmoe' natuin batuur-batuur on re' ka'o Musa in atoorn ein, mes Uisneno In nekan ka nmariin fa. 9 Oras Kristus na'uab am nak,
“Au 'uum he 'moe' utuin Uisneno Ho romim.”
Rasi naan in oetn ii nak, Kristus ntaam neem he nnoes ma nsaok nain ranan amnaa', rarit ansenu' ma nseka' nok raan fe'u. 10 Fin Uisneno In romin, es re' Yesus Kristus anjair fua'-turu' he nmaet no mese' neu mansian kit. Nok ranan naan, In nmoe' kit tjair atoni kninu' tar antea nabar-baar.
11 Neno-mneno te, a'naak rais pirsait amnaa' sin nanaob sin mepun, ma anroron mu'it he njarin fuat. Te kaah, fua'-tuur' ein naan ka nmui' fa kuasa he nait nain sanat mansian.b 12 Mes hit A'naak Rais Pirsait A'raat Re'uf, es re' Kristus, annona' ma nfee In tuan he nmate njair fua'-turu' neu kit. Nok ranan In njair fua'-turu' no mees' aah, In nfei ma naruru' ranan he bisa tait itporin tain hit mansian ii saant ein ok-oke'. Rarit na' In nnao ntuun On anbi Uisneno In abnapan a'ne'u, anbi bare re' anhormaat ee nnes-neis. 13 Anbi bare naan, In npao he Uisneno nmoe' In musu sin na'ruir ein ma nhuum fousun neu Ne.c 14 In fuat no mese' naan, nafeek piut-piut saant ii in kuasan neu tuaf re' Kristus nakninu' nrair sin.
15 Uisneno In Asmaan Akniun' ee natoon rasi re' naan neu kit msa'. In na'uab niit am nak,
16 “Hi Usi' na'uab nak on nai:
Au uhake' rais manba'an fe'u 'ok Au nggwin,
Au 'tao Au atoorn ein et sin teenb ein,
ma Au 'tui Au preent ein etan sin neek ein.”d
17 Rarit In na'uab antein am nak,
“Au of ka umnau 'tein fa sin saant ein.
Ma Au 'nikan 'ain saa'-saa' re' sin nmoe'-moe' sin naan,
oras sin antanhai Au atoorn ein.”e
18 Rasi naan in oetn ii nak, karu Uisneno nsako nrair tuaf ein sin saant ein, sin ka nperluu fa he neik fua'-turu' ntein, he nhainiik Uisneno In nekan.
Hit kais tamtau ttein he tbaiseun Uisneno
19 Aok-bian aar ki! Nai' Yesus n'opa' nrair In naa' ee he nhainiik Uisneno In nekan. Etun oras ia, hit kais tamtau ttein he teem ma tbaiseun Nggoe, et In Baer Akninu' nneis-neisi et sonaf neno tunan. 20 Mimnau Ke'en Akninu' nneis-neisi mnaa' naan! Anbi naan anmui' tai-eno' noo kou' gwes re' anpiir' ee ma n'eka' tuaf he kais antaman ma nbaiseun langsung anbi Uisneno. Mes nok ranan Nai' Yesus anmaet re' naan, In nfei ma naruru' raan fe'u, he tuaf bisa na'uab ma nbaiseun langsung neu Uisneno. 21 Anneis-neis, Nai' Yesus anjair a'naak rais pirsait re' ma'tain re'uf, re' antuthae ma n'ator Uisneno In uim je nanan. 22 Natuin naan njair hit hak ate, onaim iim he hit ttaam atbaiseun ma ta'uab langsung tok Uisneno. Mes hit ro he tpirsai batuur-batuur teu Ne nok neek amneot ma amnonot. Fin Nai' Yesus In a'maten naan nakninu' nain hit nekak nanan, tar antea hit ka tatenab fa piut-piut rais maufinu. Ma hit ro he tmoni kninu' msa', on re' a'naak rais pirsait amnaa' ein, ro he naniun fe', na' antaman he ntuthae Uisneno.f 23 Iim he hit aar kit atnaa' taher-heran saa'-saa' re' hit atmanaku' sin anmatoom nok Uisneno. Ma hit ro he tafnekan ma tharap teu Ne, ma kais tatenab, natuin In ro batuur-batuur anmoe' natuin saa' re' In nba'an anrair je. 24 Ma iim he hit ttaim ranan he to'en ma taskau hit aok-bian apirsait ein, he hit aar kit takrira' rais manekat kou'-ko'u ma tmeup meup reko huma'-huma'. 25 Au 'neen a'rair anmui' tuaf bian re' ka nabua ntein' ein fa nok sin aok-bian apirsait ein. Kais on naan, tua! Fin hi ro he mibua he mmaha'tanin nekaf es nok es. Anneis-neis oras re' he Uisneno ankoen On anfain neem re' naan, ka 'roo fa gwen. Mimnaub sin on re' naan, tua!
26 Aok-bian manekat aar ki! Hit tahiin namnuut gwen anmatoom nok Kristus In raan reko. Mes karu hit tkoit Nai' Yesus, ma atmoe' sanat piut-piut ate, in oetn ii nak, ka tiit attein fa fua'-turu' 'teta' re' bisa nnoes nain saant ein naan. 27 Hit suma tpao nok rasi mtaus he Uisneno nkoen On anfain neem ma nhukun kit. Fin ai apinat marara' abar-barat naan, nabarab anrair he ntoup ma nout niis tuaf-tuaf re' anraban Uisneno.g 28 Unu' fe', karu anmui' tuaf antanhai ka'o Musa in atoran, ma anmui' saksii tuaf nua'-teun on naan ate, tuaf asanat naan ro he ntoup hukun a'maten, ma ka tiit fa rais saok sanat antein.h 29 Mes oras ia, karu anmui' tuaf ankana'paar Uisneno In Anah, naan on re' in nkana'paar Nai' Yesus In naa' re' nat'oop he nakninu' nain tuaf naan. Ma in ka ntoe fa Uisneno In rais manba'an re' In nahaek ee ma anfuut gwe anpaek naa' re' naan. Ma in nato'ob Uisneno In Asmanan re' nakrira' nrair In nekan arekot neu tuaf naan amsa'. Neu mitenab miit! Tuaf on re' naan of nasaah hukun ma'fena' nneisi ntein na'ko tuaf re' antanhai ka'o Musa in atoran.i 30 Uisneno na'uab niit am nak,
“Au 'mui' hak he 'baras atoni' in maufinun.
Ma Au ro 'tebes he 'moe' on re' naan.”
Ma matu'i ntein am nak,
“Uisneno naan, Usi'.
In of nasanut hukun neu Iin na.”j
31 Mimnau te Uisneno anmoin nabar-baar! Mansian ii of aon ee napiip, karu Uisneno anheek naan sin!
32 Hi ro he mimnau oras hi fe' mmurai mihiin rasi anmatoom nok Kristus, rarit hi teenb ein kniun' ein. Oras naan, maski hi mipein ha'mu'it susat nana'renat kou'-ko'u, mes hi maran ma mtahan ma mpirsai piut meu Kristus. 33 Anmui' tuaf re' ankana'paar ki, ma namae ki nbi too mfaun ein sin humak ma sin matak, sin sonak ma sin atnanak. Anmui' tuaf re' anmoe' on naan amsa' neu hi partei apirsait ein. 34 Hi mkasian ma mikrira' neek reko meu tuaf-tuaf re' nataam sin et bui. Karu abakat nabaak naan hi bare' hi mtoup gwe nok neek sabaar ma oe tenes, natuin hi mihini mrair mak, hi re' naan of amtoup rais reko nneis, re' abaakt ee ka bisa nabaak ee fa. 35 Etun hi ro he mnaa' miher-heran hi rais pirsait naan. Natuin Uisneno of anbaras neu ki on re' naan. 36 Onaim maran ma mtahan miheer! Natuin karu hi mmo'e mrair mituin Uisneno In roimn ee piut, hi of amtoup saa'-saa' re' In nba'an anrair he nfee ma nnona' neu ki. 37 Uisneno In mafefa kniun' ein antuin anmatoom nok Tuaf re' he nkoen On nfain neem am nak,
“Ka 'roo fa gwen ate, Tuaf re' he nkoen On nfain neem re' naan, anpoi ma nboor neem.
Kais am'oer, fin In ka npa-pao fa.
38 Tuaf re' in neekn ee namneo ma namnoon,
Uisneno of ansoi nafeitn ee,
natuin in npirsai neu Kau.
Mes karu anmui' tuaf antet-koit na'ko Kau,
Au nekak ia ka nmariin fa.”k
39 Mes hit re' ia, ka tuaf re' attet-koit fa ta'ko Uisneno. Fin tuaf humaf on re' naan, of anbetis ma ma'bata' na'ko Ne. Mes hit re' ia, apirsait teu Uisneno. Rarit Uisneno ansoi nafetin kit he tmoin tabar-baar tok Ne.