3 On naan amsa', neu bifee mnais ein. Mutoon meu sin he sin npanat sin a'hakek ma sin a'naok, ma sin ro he nmonin natuin ahaa Uisneno In romin. Kais na'munu' tuaf bian sin kaank ein. Kais anmonin nbin mafu. Mes sin ro he nanoni' tuaf bian he sin nmonin nok reko. 4 Nok ranan naan, sin njarin a'tope' neu bifee amatsao muin ein, ma nanoni' sin he es-es ate nneek in mone ma in aanh ein. 5 Sin ro he nanoni' sin he nmonin nok neek teas, nmonin nok neek akninu', npainoet nahiin sin umi nanan, es-es ate anhormaat in moen ja kuun, ma maut he in moen je na'naak anbi uim je nanan. Karu sin nmonin on naan ate, of ka tiit fa tuaf he na'uab na're'uf Uisneno In Kabin ma Prenat.

6 On naan amsa', mfaineek atoin muinf ein, he sin nmonin nok neek teas.

7 Titus! Ho ro he mmoin nok rek-reko, he mjari 'tope' meu tuaf bian. Ho mmoe' saa'-saa' aah, mmoo' je nok reko, nahuum on re' ho munoni' biak ein. Tebes, ho ro he mmeup batuur-batuur. 8 Karu ho munoni' tuaf bian, ro he na'uu na'ko noni' amneot, he biak ein kais nakre'et ko. Nok ranan naan, tuaf-tuaf re' nraban kit, namaeb ok, natuin sin ka nmu'in fa ranan he ntu'iran kit.

9 Munoni' ameupt ein he natniin sin a'nakat nbi are' kanan rasi ma nhariin in nekan. Sin kais anmatoen nok sin a'nakat. 10 Sin kais nabaak neik sin a'naakt ee in baer' ein. Sin ro he nakrira' nak sin tuak ein atoin neek amne'o ma mapirsa'i. Sin ro he njarin atoin reko re' na'ki'in. Karu biak ein nataiba' ameupt ein sin a'moink ein ma natuik natai nok saa'-saa' re' hit tanoni' sin, sin of anteebs ein nak, noni' naan reok re'uf. Fin hit tanoni' anmatoom nok Uisneno re' nsoi nafetin kit.

11 Fin Uisneno nakrira' nrair In nekan arekot neu are' mansian ii ok-oke', ma nfei raan a'honis he nsoi nafetin naan mansian ii na'ko sin saant ein. 12 Es naan ate, hit ro he ttitar tapoitan a'moin re'uf ma are' tenab maufinu. Hit tmoni tbi pah-pinan oras ia, ro he ttahan tahiin hit tuak, tmoni tbi neek akninu', ma ta'kii' tbi Uisneno. 13 Oras ia, hit tpa-pao, he oras Yesus Kristus ankoen On anfain neem, In neem anbi pina' ma kraha'! Naan anjair tetus neu kit ok-oke'. In re' naan, hit Usi' re' ma'tani' nneis, re' nsoi nafetin naan kit. 14 In nnona' In tuan ee njair fua'-turu', he nsoi nafetin kit na'ko hit saant ein ok-oke', he nmoe' kit atjair In nonot-asar re' anmonin nok neek akninu', ma nromin he nmo'en rais reko piut.^a

15 Titus! Munoni' rasin re' ia ok-oke' meu too srani'. Mu'haba' sin he sin natuin noni'-taur ein. Sekau-sekau nmo'en saan ate, mutonan sin raan reko. Ka nabei' fa he atoni' nasmeru' ma nkana'paar ko, natuin ho mmui' hak he mmoe' rasin naan.