Surat re' ia, na'ko au nai' Paulus kau, Uisneno In aan renu-aan reka', ma Yesus Kristus In haef. In nreek haefan kau he 'nao 'ha'tain neek pirsait 'eu tuaf ein re' In npiir naan sin. In nreek haefan kau msa' he utoon raan amneot he sin nmonin natuin Uisneno In romin. Nok ranan naan, Uisneno In nonot-asar sin, nafnekan he nmonin nok Ne piut-piut. Oras Uisneno ka najarib fa pah-pinan ia fa fe'e te, In nba'an nain nak, In nonot-asar sin of anmonin piut nok Ne. Ma In ka napoi nahiin fa. Antea in oors aa on naan ate, Uisneno natoon maat-maat am nak, In he nsoi nafetin mansian ii na'ko sin saant ein, he sin bisa nmoin nabar-baran nok Ne. Rarit In naprenat kau, he 'nao utoon Rais Reko naan 'eu mansian ii ok-oke' 'bi mee-mee.

Titus! Ho on re' au aanh aa kuuk, natuin hit nua kit atpirsai teu Kristus. Onaim au 'onen 'eu Ama' Uisneno, ma Yesus Kristus re' nsoi nafetin kit, he Sin nakrira' Sin nekak arekot neu ko, he ho mmoni mbi mamut, rame' es nok es, ma tainina'.^a

5 Neon gwes ii, au ufeek he usaitan ko mbi puru Kreta, he ho bisa m'ator maan mepu fauk ambi naan. Maut he ho mpiir maan a'nakat-a'nakat neu too srani' nbin kota mese'-mese'. Kais amnikan atoran re' au utoon urair sin 'eu ko, anmatoom nok tuaf-tuaf re' na'naak jema'at, esan re': 6 karu mroim he mpiir tuaf he na'naak ma nnaa' jema'at, in ro he kais anmui' sanat saa'-saa'. In ro he na'kii' nbi matsaos nok bifee mese'. In aanh ein amsa' anpirsain Yesus Kristus. Kais-kaisa' biak ein nak, sin re' naan, es re' nati' te anmo'en taisibu, ma ntanhai atoran. 7 Natuin a'naak jemaa't ein naan, nanaob Uisneno In mepu, onaim sin ro he nmonin nok neek amne'o, ma sin kaank ein ro nfoo menin. Kais ampiir maan tuaf re' nroim he na'naeb in tuan; re' maan aa fa te natoo'; abukae raur mafu; amabanat; akoom noni-roit. 8 Tuaf re' na'naak neu jema'at sin ro he nromin he ntoup sekau gwah nbin sin umin. Sin ro he nromi haa rais reko; neek teas, atai rasi, neek akninu', ma ntahan nahiin in tuan. 9 Sin ro he nnaa' naher-heran Uisneno In Kabin ma Prenat, re' unu' te hit tanoni' ma tatoon sin neu sin. Nok ranan naan, sin bisa nakrira' Uisneno In raan amneot neu biak ein, ma bisa nanoon naan noni' re' anbeon.^b

10 Fin anmui' tuaf namfau re' anromin he nraban noni' re' amneot, re' na'uab ein te, naboo nggoah ma nputa-kriu nggoah. Anneis-neis atoin Yahudis sin re' nak, are' too mfaun ein re' nroim he napenin saok sanat ma raan a'honis, ro he na'heir ein. 11 Sin nasekeb nonot-asar a'teme-'teme, he sin na'roon na'kon Uisneno In noni' re' amneot ii, ma npaek sin noni' re' ansaan ma nbeo. Sin suma he naimn ahaa roit, npaek ranan re' he napoi nggoah. Tuaf-tuaf on re' naan, ro he mufreu sin feefk ein, maut he sin kaisa' nanoni' nsanan piut-piut. 12 Neot es, sin atoon nee jes na'ko puru Kreta natoon kuuk sin nee mnak,

13 Batuur. Abitan bare naan, on re' naan! Onaim ho ro he mutuuk meik apoit ein naan, he mha'tani mtein sin rais pirsait neu Uisneno. 14 Rarit sin kais natniin anteni' atoin Yahudis sin reet poi nggwin, ma sin kais natuin prenat na'ko tuaf-tuaf re' ntitar napasib noni' amneot.

15 Mumnau murek-reko'! Neu tuaf re' in neekn ee kninu' te, are' saa'-saa' ii msa' kninu'. Mes neu tuaf re' in neekn ee nameis'ook ma ka npirsai fa Uisneno, are' saa'-saa' ii msa' nameis'ook. Natuin sin neek ein ma teenb ein n'oemeet naan nanin. 16 Sin nmanauk ein nak sin nahiin Uisneno. Mes sin a'moink ein, on re' ka nahiin Je fa. Sin na'uab ein ate, 'teta', mes anmoo' je te, 'teta'. Batuur-batuur sin ro puun ii, neikn on! Sin ka nromin fa he natuin Uisneno In romin. Kaisa' mifnekan meu tuaf-tuaf on re' naan, natuin sin ka bisa fa he nmo'en rais reko!