Atoni Kristen sin a'monik re' amneot
3
Mumnaub too srani' he sin natniin anaa' apreent ein, ma tuaf-tuaf re' anna'an kuasat. Ma sin ro he natuin atoran. Sin ro he nabaarb ok piut he nmo'en rais reko. 2 Kais anfeef akreon neu-mneman he na're'uf tuaf bian sin kaan foo menin. Ma sin kais anroim rais matoes. Reko nneis, anmonin nok rek-reko ma neek reko neu sekau-sekau gwah.3 Natuin unu' fe', oras hit ka tahiin fa Usif Yesus, hit ka tahiin fa saa'-saa', ma napoi kit ite, rabah. Hit ka troim fa he tneen tuaf bian. Hit tmoni tbi haa re' he tatuin hit neek maufinu, ma ta'kreob hit tuak ii nok rais sinmakat huma'-huma'. Hit aputa-kriut maufinu teu tuaf bian. Hit a'moink ii naheun nok mantinus. Hit troim he tatunu' neek to'os teu tuaf bian, tar antea atmaufiun teu sin. Rarit sin on naan amsa' neu kit.
4 Maski hit a'moink ii namreu' on naan amsa', mes Uisneno es neikn On ansoi nafetin kit, In nakrira' nrair In manekat ma In neek arekot neu kit. 5 In nsoi nafetin kit, ka natuin fa hit rasi mnamit atbi 'moe' reko, mes natuin In nneek kit. In nboe nakninu' hit saant ein, anpaek In Asmaan Akninu', he na'fe'un hit a'moink ii, nahuum on re' nahonis nafani' kit. 6 Natuin Yesus Kristus anmate nrair he nsoi nafetin kit na'ko hit saant ein, etun Uisneno nathoeb In Asmaan Akniun' ee neu kit. 7 Natuin Nai' Yesus In neekn ee reko, etun In nareko' hit rais kua'-nonot tok Ama' Uisneno, nahuum on re' hit tjair In aanh ein. Ma hit tahiin tak, hit of atmoin piut-piut tok Ne. 'Monit naan, anjair hit pusaak. 8 Saa' re' au u'uab sin re' ia, batuur on re' naan, tua!
Saa' re' au unoni' sin re' ia, maso'ik ma ma'upa' neu are' mansian ein ok-oke'. Etun ho ro he mu'haba' tuaf-tuaf he nmoe' natuin noni'-taru' amneot. Are' apirsait ein neu Uisneno ro he namin ranan piut-piut he nmo'en rais reko. 9 Kais amseit-seitn om meu rais poi sin ruum-ruum, on re' hi mmafefa-kreona' meu rasin re' ka ma'u'u fa, mmatoe tafi'-tafi' es nok es, ammatita'-roin neu uuf ma ka'uf mee es na'nae nneis, ma ammabaan nok rasi atoran harat atoin Yahudis sin. He saa'? Rasin naan ka tiit tain fa es he maso'ik! Amporin mineuk oors ii ruum-ruum aah. 10 Amnao he mfaineek tuaf re' nroim he nareu' too srani' tar anpe'en ma nbaits ok. Karu sin anmo'en fe' on naan ate, ampaesa' sin batuur-batuur. Karu sin nmo'en piut fe', kais amrae mituin sin. 11 Tuaf-tuaf on re' naan, sin teenb ein ka mne'o fa gwen. Sin a'moe'k ein kuuk es re' nakrira' sin sanat neu too mfaun ein.
Nai' Paulus natu'ub in surat
12 Au ureon ma ubarab he 'reek nai' Artemas ai' nai' Tekikus, he neem nateef nok ko on puru Kreta. Karu in neem antea gwen, ho maim ranan he uum rabah, he muteef mok kau on kota Nekapolis. Natuin oras mainikin ia, au 'roim he utua 'bi naan.a 13 Ho muhiin atoin ahiin atoran hukun, re' in kaann ee nai' Senas, nok in partei nai' Apolos, ai'? Sin he nnaon neu bare 'roo. Onaim amturun maan sin he sin kais anmu'in kuran-rabu' nbi ranan.b 14 Natuin tuaf-tuaf re' natuin Usif Yesus kais antook ma n'asak-panak ruum-ruum aah. Sin ro he nanoin ein he nmo'en rais reko, ma nturun tuaf-tuaf re' ankuran-rabu' re'-re'uf. Nok ranan naan, sin a'moink ein maso'ik.
15 Titus. Hai aar kai msonu' tabe ma haan buseet arekot neu ko. Tabe ma haan buseet amsa' neu hit partei bian re' anpirsain neun Usif Yesus.
Au 'onen ma 'toit Uisneno he nakrira' In nekan arekot neu ki aar ki.
On re' naan, tua,
Au nai' Paulus kau, tua.