Nai' Paulus in surat no nuan
neu in partei nai' Timotius
2 Timotius
Tabe ma haan buseet
1
1-2 Timotius, atoin reko!Surat re' ia na'ko au, nai' Paulus kau, re' Uisneno neikn On anruur kau he 'jair Yesus Kristus In haef. Sin nreek haefan kau he 'nao utoon rasi nmatoom nok 'monit re' batuur, re' Uisneno nba'an he nfee je neu are' apirsait ein neun Yesus Kristus.
Timotius! Ho on re' au aanh aa kuuk. Onaim au 'onen he hit Ama' Uisneno, ma hit Usi', Yesus Kristus, anneek ko, nakrira' Sin neek reok gwe neu ko, ma nfee ko 'monit ambi mamut, rame' es nok es, ma tainina'.a
Nai' Paulus antoit makasi neu Uisneno
3 Au 'onen fai-manas ma 'teek ko. Au 'toit makasi piut-piut 'eu Uisneno, natuin ho mutuin Ee piut. Au 'tuthae Je nok neek akninu', on re' hit be'i-na'i sin antuthae Je. 4 Au umnau, oras hit tbaits ok neno naan, ho mkae mpin-pinus. Etun au 'roim he uteef a'tein 'ok ko, maut he au 'mariin.
5 Au umnau neno naan, oras ho mmurai mpirsai batuur-batuur meu Usif Yesus. Rais pirsait human on re' naan, na'uu ma na'baa' nain na'ko ho be'i bi Luisa, ma ho aina' bi Yunika in nekan. Ma au a'tebes amsa' 'ak rais pirsait human on re' naan anmoin et ho nekam amsa'.b
Nai' Paulus antoit he nai' Timotius anpaek manoef ma mahinif re' Uisneno nfee ne sin
6 Neno naan, oras au 'ait au 'niimk ein ma 'tao sin 'eu ko, rarit au 'onen a'teek ko, oras naan Uisneno ntao ko manoef ma mahinif he ho bisa mmeup meu Ne. Onaim oras ia, au 'toit ko he munaoba' mufani' ho manoef ma mahinif naan. 7 Fin Uisneno In Asmanan ka nmoe' kit fa he tjair amtaus. Mes In nmoe' kit atjair tuaf-tuaf re' na'bei' ma npirsai in tuan, re' anmaneek nahiin, ma nafreu nahiin in tuan ee rek-reko. 8 Onaim kais mumaeb om he mu'uab anmatoom hit Usi'. Ma kais mumaeb om natuin anhukun kau et bui. Au 'taam bui re' ia, natuin au 'tuthae hit Usi'. Onaim karu ho mutoon Rais Reko naan ate, ho ro he mubarab ho tuam aan he musaah susat-ma'ne'at on re' hai. Karu ho mupein susat-ma'ne'at on re' naan, Uisneno of anha'tain ko.
9-10 Natuin Uisneno es ansoi nafetin naan kit na'ko hit saant am penu sin.
Ma In es anpiir naan kit he tjair In tuaf ein re' atmoni kninu'.
In nakrira' In nekan reok gwe neu kit, natuin In nneek kit.
Te kaah, hit ka tmoe' tiit fa saa'-saa' es, he hit maso'ik he ttoup In arekon.
Uisneno ka nmoe' pah-pinan ia fa fe', mes In nafeek anrair he nreek Yesus Kristus neem,
he nakrira' In nekan arekot, ma nsoi nafetin kit.
Rarit Yesus Kristus neem anrair, ma nfei nrair sarit naan,
Ma In naseer rasi 'maten in kuasan!
Ia njair Rais Reko!
Onaim sekau-sekau re' anpirsai neu Yesus Kristus, ka nmate ntein fa gwen, mes anmoin piut nok Uisneno.
11 Etun Uisneno nait kau 'jair haef 'eu Yesus Kristus, he au utoon In Rais Reko, ma unoni' sekau-sekau nbi mee-mee.c 12 Rasin re' naan ok-oke' nmoe' kau m'es na' au upein 'ha'mu'it et bui ia in nanan. Mes au ka umaeb ok fa! Natuin au uhiin sekau es re' au 'pirsai. In es re' Usif Yesus. Ma au uhiin namneo-namneo 'ak In es re' nana'at kau mepu re' ia, In es re' anpafa' ma npanat mepu re' ia, ma In es re' anha'tain kau he au bisa unaob mepu re' ia, tar antea In nkoen On anfain neem. 13 Onaim mutuin nai 'tope' nbi 'monit na'ko noni' amneot, re' au ukrira' sin 'eu ko. Karu ho mpirsai piut-piut, ma mneek sekau-sekau, ho mutoon ma mukrira' mak ho mmafuut mok Yesus Kristus. 14 Uisneno nana'at anrair a'mu'if ma'osa' huum es et ho 'nimam, es re' noni' arekot amneot. Onaim ampanat murek-reko' a'mu'if re' naan! Ampaek Uisneno In Asmaan Akninu' re' et hit nekak, maut he In nturun ma nbaab ko, he mpanat a'mu'if naan rek-reko.
Nai' Onisiforus anturun nai' Paulus anbi bui
15 Ho of amneen amrair nak nai' Figelus ma nai' Hermogenes, sin atoin sona' na'kon propinsi Asiad sin nasaitan kau gwen. 16-18 Mes nai' Onisiforus ka on fa naan. In ka nasaitan kau fa. Ho muhiin kuum, oras au 'bi kota Efesus fe', in nturun ma nbaab kau piut. Oras ia, in natua gwen et kota Roma ia. Oras in neem antea, in naim kau neu-mneem anbi mee-mee. Namuni te, in nateef nok kau nbi bui. Mes in ka namaeb on fa. Fani-fani in neem anbi bui ia, ma nha'tain au nekak.
Onaim au 'onen ma 'baiseun 'eu Uisneno he nakrira' In nekan arekot neu nai' Onisiforus nok nain in nonot-asar sin. Anbi neon amsoupt ii te, oras Uisneno nafeek mansian ein sin rasin, au 'harap ma ufneek he karu reko te, Uisneno nafeek rais arekot neu nai' Onisiforus sin.