Amnao mutoon Uisneno In Kabin ma Prenat
4
1-2 Yesus Kristus of ankoen On anfain neem neu pah-pinan, he naprenat on re' usif. Et amonit ma amates of anhaken nbin In matan, he In nafeek sin rasin. Natuin rasi naan, anbi Uisneno ma Yesus Kristus Sin humak ma Sin matak, au 'toit batuur-batuur 'eu ko, he mnao mutoon Uisneno In Kabin ma Prenat. Mu'neen om piut! Kais mutenab mak, oras reko, ai' kaah. Mukrira' sin, sin sanat, mes mukain sin nok neek sabaar. Amha'tain sin neek ein meik noni'-taru' amneot.3 Fin of noka'-nmeu te, tuaf-tuaf ka nroim fa he nneen noni'-taru' amneot. Sin of na'bua' tunggurun re' bisa na'uab ein natuin sin roimk ein, he nharineb sin oras sin nnenan. 4 Sin nkeeh natau sin ruik ein he ka natniin fa noni'-taru' amneot. Mes sin nneen neu rais reta' ruum-ruum.
5 Maski on mee-on mee msa', ho neekm aan ro he natea. Maran ambi ha'mu'it. Amnao mutoon Rais Reko, he tuaf-tuaf anpirsain neun Yesus Kristus. Amtuthae tuaf-tuaf nok neek marine, tar antea mepu naan namsoup. Kais ammepu stena'-stena'.
6 Anmatoom nok au tuak ii te, kais amfairoir kau, natuin au nuut ii he namsoup gwen. Au on re' oe nbi kraas, in nat'oop am he oek' een.a 7 On re' mnaent ii te, au 'aen ma 'tea 'rair nok reko. Au utuin piut 'eu Yesus Kristus, ma ka 'teib 'iit fa 'eu mee-mee. 8 Oras ia, au 'pao-pao rais jes fe'. Es re', kraa-mnatu' re' Usi' napaar ee neu sekau-sekau re' in a'moin ee namneo ma namnoon. Hit Usi' naan, afeek rasi amneot. In ka npiir fa humaf. Antea in oors ate, In of annona' kau kraa mnatu' naan. Ka neu au 'mees fa, mes sekau-sekau re' anneek Ee, ma anpa-pao Gwe he nkoen On anfain neem, sin napein akraa mnatu' on naan amsa'.
Nai' Paulus anba'an rasi huma'-huma'
9 Tius! Reko te, uum amkius maan kau rabah fe'! 10 Oras ia, au 'mes-mees kuuk. Nai' Kreskes annao nrair et propinsi Galatia. Ma nai' Titus annao nrair et pah Dalmatia. Mes nai' Demas nroim nanesib risan amre'ut nbi pah-pinan ia, onaim in nnao nasaitan kau. In nnao et kota Tesalonika.b 11 Suma nai' Lukas es re' natua nok kau et ia. Maim maan nai' Markus he nua ki iim bu'-bua'. Natuin in bisa nturun ma nbaab kau nbi rasi huma'-huma' nbi ia.c 12 Au 'reek nai' Tekikus nnao et kota Efesus.d 13 Karu ho uum ate, kais amnikan he mait meik maan kau au baur mainikin re' au umaik ee et nai' Karpus in umi, et kota Troas. Ma kais amnikan he mait meik au tuis ein naan, anneis-neis re' au 'tui sin et pasu.e
14 Nai' Aleksander, atuut noin moro' naan, anmoe' maufinu neu kau fani-fani. Maut he nmoe'. Uisneno of es anbaras neu ne, natai nok in a'mo'en naan.f 15 Ho ro he mpaant om mu'ko atoni' re' naan, natuin nati' te in nraban hit uabk ein.
16 Oras au 'hake 'bi afeek rasi he umneob au tuak, ka tiit tain fa tuaf es he nok kau. Sin aar sin annaon nasaitan kau. Maut he on re' naan. Maut he Uisneno nnikan nain sin saant ein. 17 Maski on naan amsa', mes Uisneno ka nasaitan kau fa. In nha'tain kau, he au bisa unaob In Rais Reko, ma au ka 'kuran fa saa'-saa'. Au utoon 'eu atoin ein re' ka Yahudis fa, he sin nneen niit Rais Reko naan. Ma Uisneno nafetin anrair kau na'ko siraak ko'u. 18 Ma In of nafetin kau na'ko rais maufinun ok-oke'. Ma In neik kau nok mamut, rarit nataam kau 'eu sonaf neno tunan. Anbi naan, In es re' annaa' aprenat.
Uisneno naan, apinat ma akrahat! Au 'pures u'naeb Ee ka natfeek niit fa, tua! Amin.
Nai' Paulus natu'ub in surat
19 Kais amnikan he mfee tabe ma haan buseet meu bi Priskila,g ma in mone, nai' Akila. On naan amsa' meu nai' Onisiforus ma in nonot-asar sin ok-oke'.h 20 Nai' Erastus natua et kota Korintus. Neon gwes ii, au 'nao usaitan nai' Trofimus anbi kota Miletus, natuin oras naan in nameen ma'fena'.i 21 Maim ranan he karu reko te, ho uum amtea main ia, oras mainiikn ii ka ntaam fa fe'. Hit aok-bian abitan ia, esan re': nai' Ebulus, nai' Pudes, nai' Linus, ma bi Klaudia, ansoun ein tabe ma haan buseet neu ki. On naan amsa', neu hit aok-bian Kristen bian sin.
22 Au 'harap ma ufneek he Uisneno nok ko piut-piut. Maut he In nakrira' In nekan arekot neu ki aar ki.
On re' naan, tua,
Au nai' Paulus kau, tua.