Anbi oras neon amsoput, mansian ii in a'moin ii on re' mee?
3
Timotius! Oras antea pah-pinan ia in neon amsoupt ein ate, in suust ein amfaun ii kah een. Au utoon 'ain ko on re' naan. 2 Mansian ii of namnau nanesib sin tuak ein, ma nsinmaakn ahaa roit. Sin nabe'ob sin tuak ein, ma nkana'paar biak ein, na'uab na're'uf tuaf bian, ka nromin fa he natniin amahoint ein, ka ntoit nahinin fa makasi, ka atoup noni' fa, ka nroim nain fa rais Uisneno, 3 ka nmaneek nahinin fa, ka nromin fa he naraem ok es nok es, sin nromin he na'munu', ka ntahan nabei' fa sin tuak, maufinu bainesi', ka nromin fa rais reko, 4 anromin he na'sosa' sin aok-biak ein, natenab paar aah, nmoe' jok on ahinit, anromin he natuin sin neek romik anneis na'ko Uisneno In romin. 5 Sin anmoe' jok on re' anaob rais pirsait, mes ruman. Uisneno In kuasan ka natua fa nbi sin neek ein. Kais mubnoon reko mok tuaf-tuaf on re' naan!6 Tuaf-tuaf on re' naan antaman neu es in umi, nok huma' moe', he nfuir bifee neek a'oert ein, ma rabah ate napein kopo'. Bifeen on re' naan, sin a'moink ein anroim ma nbaun sanat na'tuup, ma nmonin natuin sinmakat ma neek komat huma'-huma'. 7 Sin nneen tunggur fe'u re' neem nanoni' rais fe'u, ma sin natun-tuin ein aah. Mes sin ka ntai nahinin fa, mee es re' antoom, ma mee es re' ansaan. 8 Ho mumnau reta' anmatoom nok nai' Yanes ma nai' Yamres,a ai' kaah? Oras naan, sin nraban ka'o Musa. Tunggurun re' oras ia, sin huma' mese' on re' sin. Sin nraban noni'-taru' amneot. Sin teenb ein namre'un, ma sin pirsait ein, anbeon. 9 Tunggur poi on re' naan, ka neu he ntahan fa 'roo. Ka 'roo-'roo fa te, too mfaun ii nahiin sin moonk ein! Nahuum on re' unu' te, too mfaun ein nahiin nai' Yanes ma nai' Yamres sin puta-kriu nggwin.
Amnaa' muher-heran noni'-taru' re' ho mtoupu mrari
10 Tius! Ho muhini mrair au 'moink ii ok-oke'. Ho muhini mrair are' saa' re' au unoni' sin. Ho muhiin au sarit. Ho muhiin saa' re' au 'pirsai. Ho miit kuum au neek sabaar 'eu too mfaun, ma au maneek ii 'eu sin. Ma ho muhini msa' mak au 'aran ma 'sabaar au tuak ii. 11 Ho muhini msa' mmak sin nteir-hae kau, ma nasahab kau ha'mu'it ma ma'ne'at huma'-huma'. Au upein ha'mu'it ma ma'ne'at on re' naan, anbi kota Antiokia, Ikonium, ma Listra. Mes Uisneno nsoi nafetin kau na'ko rasin naan.b 12 Batuur, are' apirsait ein neu Yesus Kristus re' nromin he nmonin nok neek akninu' natuin Uisneno In romin, ro tebes atoni' of anha'mui' sin. 13 Antutan ntein, amaufiunt ein ma aputa-kriu nggwin, anmo'en rais maufinu piut-piut. Sin napoi natupa' biak ein. Te kaah, tuaf bian napoi naan sin imsa'.
14 Mes ho ro he mnaa' muher-heran noni'-taru' re' ho mtoup murair sin. Ma saa' re' ho mpirsai je naan, ro he mutuin ee piut. Natuin, naan es re' amneot! Ho muhiin batuur, sekau es re' nanoni' ko rasin naan. Ho bisa mpirsai sin!c 15 Anmurai na'ko ho aan'-ana' fe', ho mtoupu mrair noni' na'ko Uisneno In Suur Akniun' ee in afan. Suur Akninu' naan in afan, es re' natoon raan a'honis. Fin karu ho mpirsai meu Yesus Kristus, naan anfei ranan he ho bisa mmoni mmafuut mok Uisneno mbi sonaf neno tunan. 16 Are' saa'-saa' re' matu'i et Suur Akninu' naan, ro tebes Uisneno kuun es nana'at sin he mansian ii antui sin. Tuis ein re' naan, mapake' he: nanoni' tuaf anmatoom nok saa' es re' batuur, nakrira' tuaf ein sin sanat, natuuk nafani' tua aseket neu raan amneot, ma nanoni' mansian ii he nmonin neno-neno nbin Uisneno In romin. 17 Nok ranan naan, Suur Akniun' ee, bisa nanokab ma namtisib Uisneno In tuaf ein nok a'be'if ma manoef, he sin nanaob ein are' kanan meup arekot.