Tabe ma haan buseet na'ko au, nai' Paulus kau. Uisneno npiir kau 'jair haef 'eu Yesus Kristus. Ma hit tharap ma tafneek teu Usif Yesus, re' anfee kit a'honis piut-piut tok Ne, natuin Uisneno nsoi nafetin anrair kit na'ko hit sanat ma penu sin.

Tius! Ho on re' au aanh aa kuuk, natuin au ururu' 'rair ranan he ho mpirsai meu Kristus. Au 'onen 'eu hit Ama' Uisneno, ma hit Usi' Yesus Kristus, he Sin nakrira' Sin neek rekon ma rais kasian neu ko, maut he ho mmoni mbi mamut, rame' es nok es, ma tainina'.^a

3 Neon gwes ii, hit nua kit tabua tbi kota Efesus. Oras au he 'nao 'eu propinsi Makedonia, au 'ak ko he mubaar ambi kota Efesus. Oras naan, anmui' tuaf re' ntaka'nanab Usif Yesus In too srani', anpaek noni' re' ansaan ma nbeo. Onaim au 'toit ko, he mnao mukaina' sin, he sin kais nakonob sin noin' ein naan. 4 On naan amsa', tuaf ein re' naan anpoirn ein oras parsuum aah, karu sin nnaon ma nmakoin ein penit anbi rais reet poi nggwin. Ma sin nmasau fefan nokn ahaa mapeo' uuf ma 'naof re' ka natfeek niit fa. Rasin on re' naan, suma neik mansian ii nmatoen am anmabanan. Ma ka npaumakab sin fa neun Uisneno ma ka nha'tain fa sin rais pirsait.

5 Au 'faineek ko he munoni' apirsait ein neu Usif Yesus he nmonin nbin rais manekat nok neek akninu', tenab amneot, ma nbi neek akteeb kninu'.

6 Mes anmui' tungguru bian re' sin ntebi nrarin, ma nait inporin fainekat naan. Rarit sin npoirn ein oras, ma nmasau fefan ma na'uab ein tafi'-tafi'. 7 Sin nakrira' sin tuak ein am nak, sin re' naan tunggurun re' nanoni' ka'o Musa in Atoorn ein. Sin natoon ok on re' tunggur ko'un, mes sin ka nahinin fa saa' re' sin nanoni' sin naan.

8 Hit aar kit tahiin ka'o Musa in Atoorn ein naan, reko. Asar hit tanaoba' sin natai nok Uisneno In sarit amneot. 9 Atoorn ein naan, ka ntui sin fa neu atoin amoe' reko. Mes antui sin neu a'naak fatus, araban aprenat, na'roo na'ko Uisneno, atoin amaufinut, tuaf re' ka nfairoir fa Uisneno, re' anfare' rasi kninu', aroor atoni', ma aroor mahoni'. 10 Atoorn ein naan antui sin neu mansian re' nmakonin tafi'-tafi', re' anmakoin atoni' nok atoni', re' anheek na'koro' tuaf he na'seke' tuaf bian he napein roit, re' aputa-kriut, apoit, ma neu tuaf-tuaf re' anraban rais noni' amneot. 11 Noni' re' amneot ein, neman na'kon Uisneno In Rais Reko, re' In nanaa't ee neu kau. Ma Uisneno naan, Uis mapina'-makraha'. Mansian ii ro he ntuna' na'rat-raatn Ee.

12 Au 'toit makasi kou'-ko'u 'eu hit Usi', Yesus Kristus, natuin In npirsai kau, ma nfee kau 'be'if ma'tani' he unaob In mepu. 13-14 Te kaah, unu' te, au es re' ureuk Usi' Yesus In kanan. Au ususab ma 'ha'mui' tuaf-tuaf re' natuin In raan a'honis amsa'. Au 'teir hae sin. Au 'maufiun on re' naan, natuin oras naan, au ka uhiin 'aan fa saa' re' au 'moo' je re' naan, ma au ka 'pirsai 'eu hit Usi' Yesus Kristus fa fe'. Mes In ka nnikan kau fa. In nakrira' In maneekn Ee neu kau.^b Saa' anteni', In nakrira' In neek reok gwe neu kau piut. In nfee kau tetus-athoen he au bisa 'pirsai Je nok neek a'ki'it, ma au bisa 'neek sekau-sekau on re' In nneek kau.

15 Biasa hit tneen uab am nak, “Yesus Kristus neem anrair jen anbi pah-pinan, he nsoi nafetin mansian asaant ein.” Batuur on naan! Na'ko mansian asaant ein ok-oke', au es re' amaufinut anneis-neis ji. 16 Maski au 'maufiunk ii kah een, mes Uisneno nafeek he ka nhukun kau fa. Natuin In he npaek kau 'jari 'tope' he ukrira' Yesus Kristus In sabaar ee neu atoni' re' maufiun ii ma'tain besi on re' au. Nok ranan naan, biak ein re' nmo'en sanat amsa', bisa npirsain neu Ne, henati' sin bisa nmonin piut-piut nok Ne.

18 Timotius, au aanh reko! Au he utoon ko saa'-saa' re' ho ro he mmoo' je ma ho mmeup gwe. Are' saa'-saa' re' ia, natuin mafefa' kninu' Uisneno sin uabk ein anmatoom nok ho tuam naan. Karu ho mutuin murek-reko' uab ein naan, ho on re' sorarus re' amakeen reok gwes, anraban amre'ut. 19 Amnaa' muher-heran ho rais pirsait meu Kristus. Ampanat ho neek akninu' naan piut-piut. Tuaf bian ka nromin fa he natniin hanaf na'ko sin neek aan'-aan' ee ntein, re' nmoe' sin neek pirsait ein naan namre'un, on re' bnao oe, nasrae ma na'tutu' niis on anbi faut puutk ein. 20 Nai' Himenius ma nai' Aleksander sin, a'moe'k ein natai nok rasin re' naan. Etun au una'at sin 'eu niut reu'f ein sin a'nakat. Au 'moe' on re' naan, he sin nanoin ein he kais na're'uf antein Uisneno In kanan.