Hit re' atuina' Kristus, ro he tmoin on re' soraurs ein re' natniin sin a'nakat
2
Timotius, au aan neka'! Yesus Kristus naan, Atoin neek reko. Oras ia, ho mmafuut mok Ne, ma In nabarab he nha'tain ho nekam. Onaim ho ro he mtoup gwah! 2 Unu' te, au unoni' ko 'bi too mfaun ein sin humak ma sin matak anmatoom nok Uisneno In raan a'honis re' amneot. Onaim oras ia, au 'toit ko, he are' saa'-saa' re' ho mneen amrair sin na'ko kau, ho meik sin ma mnao munoni' mtein sin meu tuaf-tuaf re' mapirsa'i. Tuaf ein re' naan, ro he nmanoen he nanoni' ntein tuaf bian.3 Hit ar-arkit re' ia, tahuum on re' Yesus Kristus In soraurs ein. Onaim hit ar-arkit tsutai ha'mu'it on re' In. Natuin ho re' naan, soraur reok gwes, ho ro he msutai ho sapaam. 4 Sorarus re' nanaob in mepu, ka nheu-heu gon fa neu urusan bian anteni'. Nok ranan naan, in bisa nharineb in a'nakat.
5 Tait i'tope' 'teta' na'ko mari'ut. Karu he tmariu' tok, ro he tatuin mari'ut naan in atoran. Mes karu ka tatuin fa te, of napoitan kit, ma ka tapein fa mnisat. On naan amsa', karu he tanaob Uisneno In mepu, ro he tatuin In atoran.
6 Amkius atoin tani msa'. In nmeup ma'tani' anbi in rene. Onaim in es re' annaben nahuun neu in reen je in afan. 7 Mutenab murek-reko' a'toep ein fe'e na. Uisneno of namnaub ma natoon sin a'moufk ein neu ko.
8 Mutenab murek-reko' Yesus Kristus. In re' naan, usif nai' Daut in sufan-ka'un. In nmaet, mes Uisneno namonib nafani' nrair Je. Naan anjair Rais Reko, re' au 'eik je ma utoon ee nbi mee-mee. 9 Natuin au utoon Rais Reko naan, es na' au upein ma'ne'at ia. Saa' antein sin nfuut kau npaek korenit, nahuum on re' au re' ia atoin maufinu. Mes sin ka na'be'in fa he nfutu' ma nkorenit Uisneno In Rais Reko. 10 Onaim au ubarab au tuak ii he usaah kuuk ma'ne'at huma'-huma'. Asar Uisneno In tuaf ein re' In npiir naan sin naan, napenin saok sanat ma rasi 'honis. Fin Uisneno of nait na'ratan sin piut, natuin sin antaam anjarin Yesus Kristus Iin na. 11 Uab ein re' ia, ro batuur:
“Karu hit ttoup tak, Kristus anmate nsenu' ma nseka' kit,
naan on re' hit tmaet tasaitan 'monit amnaa',
Rarit hit of atmoin tabua tok Ne msa'.
12 Karu hit taran ma ttahan atbi ma'ne'at,
hit of atnaa' aprenat tok Ne msa'.
Mes karu hit tasuan Ee,
In of nasuan kit imsa'.a
13 Maski hit ka ta'kii' fa,
mes In na'kii' piut,
natuin In ka bisa napoi fa. In na'uab saa' ate, In nmoe' natuin ee.”
Ameput re' Uisneno nbo'is
14 Tius! Mumnaub apirsait ein, he sin kais annikan rasin re' ia ok-oke'. Amreek sin ampaek Uisneno In kanan, he sin nasnasab uab ein re' anmatoena' rasi nmatoom nok uab tuuk es in a'moufun. Rasin naan ka ma'afa' fa. Suma nare'u haa aneent ein sin teenb ein. 15 Maim ranan rek-reko he mmoe' ho tuam aan on re' ameput re' maso'ik anbi Uisneno. Tuaf on re' naan, kais namaeb on, natuin in nanaob in meup gwe nok rek-reko. Ho ro he mjair tuaf re' munoni' namneo gwah anmatoom nok Uisneno In Kabin ma Prenat. Fin In Kabin ma Prenat naan, ro namneo! 16 Mu'roba' ho tuam aan mu'ko uab ein re' ka ma'u'u fa, ma mu'ko uab ein re' ka neik fa hormaat neu Uisneno. Natuin rasin naan anmoe' mansian ii nmaufiun piut-piut. 17 Sin uab maufiun ein naan annoman nahuum on re' menas es, re' anteek ee te nak, kanker. Nai' Himenius ma nai' Filetus sin uabk ein on re' naan! 18 Sin noink ein ansanan. Sin nak, atoin amaets ein, anmonin nfain een. Mes naan ansaan! Nok ranan naan, sin nbeon nrarin na'kon noni' amneot. Saa'-saa' re' sin nanoni' sin naan, nareu' tuaf bian sin neek pirsait.
19 Mes a'sukif re' Uisneno nateke nrair je naan, namkeis. Anbi 'sukif naan matu'i mnak, “Uisneno nahiin narek-reko' In nonot-asar sin”, ma “Sekau-sekau re' na'ruri' ma na'bees neu Uisneno, ro he na'roba' in tuan ee na'ko maufinu.” A'sukif naan, es re' Uisneno Iin na.b
20-21 Tait i'tope' anbi atoin amui't ein sin uimn ee. Anbi naan, anmui' bare' huma'-huma'. Bian anmoe' sin na'kon noni mnatu' ma bian na'kon noin muti'. Mes bian na'kon hau ma afu 'kere. Baer' ein re' mamasa', uim tuaf ee npaek sin nbin fesat ko'u. Mes baer' ein re' ka mamasa' fa, uim tuaf ee namaeb on karu in npaek sin nbin too mfaun ein sin maatk ein. On naan amsa' mansian ii. Karu nmui' tuaf na'roba' in tuan ii na'ko maufinu, in on re' baer mamaas ein. Uim tuaf ee anmariin he npaek je, natuin in mapake' he nmeup reko huma'-huma'.
22 Muinf ein bisa nmoufun rabah natuin sin neek roimt ein. Mes ho ro he mpanat ho tuam aan rek-reko, kais mutuin ho neek roimt aan. Maim meu 'moe' reko piut-piut. Ampirsai piut meu Uisneno. Ammoni mbi manekat, rais rame' ma mamut mok tuaf bian. Are' apirsait ein neu Uisneno, re' anmonin nok neek akninu' naan, sin nromin he nmo'en rais reko piut-piut. Onaim Timotius, ho ro he moes aan sin! 23 Au utoon ufani' ko sin! Kais amseitn om he mnao mmatoena' rasi-rasi re' ka ma'u'u fa. Natuin rasin naan suma neik ki meu matoes ma mabanat. 24 Ameput neu Uisneno ka nabei' fa he njair amatoes. Mes sin ro he nneek ma'nuran nok too mfaun, nanoni' nahinin, ma nneek amnaun neu amatoes ein. 25 Sin ro he natuuk reko neu tuaf-tuaf re' biasa nraban. Nok ranan naan, karu reko te, Uisneno na'bani' sin neek ein ma na'pisan, rarit sin ntoup saa'-saa' re' arekot amneot. 26 Nok ranan naan, sin bisa na'te'un sin neek ein antein, rarit sin nasoitn ok na'ko niut reu'f ein sin a'naak kou' gwe, re' anfuut sin he natuin in roimn ee.