Anmatoom nok usi' ma ate
6
Anmui' usif re' sin aten anpirsain neun Usif Yesus. Sin ro he nhormaat sin usin, maut he biak ein kais napenin ranan he na'uab namouf Uisneno In kanan, ma nkana'paar hit noni'. 2a Anmui' aten re' sin uisn ee npirsai neu Usif Yesus. Aten naan sin kais ankana'paar sin usif naan, natuin in npirsai neu Usif Yesus. On mee-on mee msa', sin ro he ntuthae reko nneisi ntein neu sin usin naan, natuin sin aar sin pirsait mese', ma sin ro he nmanekan es nok es.Noni' re' ansaan, ma upan arekot
2b Tius! Munoni' rasin re' ia ok-oke', ma mu'haba' too srain ein, he sin nmoe' natuin sin ok-oke'. 3 Hit noni' ma taru' re' amneot naan, njari 'sukif na'ko raan a'honis re' nharineb Uisneno In nekan. Mes tuaf re' nanoni' 'teta' na'ko noni' re' ia, sin re' naan antitar napasib Usif Yesus Kristus In noni' re' amneot. 4 Tuaf on re' naan, na'naeb in tuan, mes in ka marone' fa! Sin meens ii, es re' nromin he namin rais matoes nok ahaa rais ruum-ruum. Rasin ia, anneek-menab tuaf bian, anmatoeba' tuaf, nareu' atoni' bian sin kaank ein, ma anmaktiun ein ruum-ruum aah. 5 Tuaf human on re' naan, anmoe' rais taisibu piut-piut. Sin teenb ein namre'un. Sin ka nahini ntein' ein fa, mee es re' amneot ma amnonot. Sin natenab nak karu sin nmakoen nbin rais pirsait, sin bisa njarin atoin amu'it.
6 Batuur, rais pirsait ii bisa nmoe' mansian ii napeni mnisat ko'u. Fin 'monit re' anharineb Uisneno In nekan, masero' nok rais tenab manokab anmatoom nok saa' re' sin nmu'i, naan ro rais pirsait batuur aa!
7 Mimnau mirek-reko'! Oras nahoni' kit, hit ka teik fa saa' es attaam teu pah-pinan ia. Ma oras hit tmate msa', hit ka teik fa saa'-saa' tpoi ta'ko pah-pinan ia. 8 Onaim asar mnahat, mninut, ma pake-nohas nanokab ate, ta'tena' hit teenb ii nai!
9 Mes tuaf re' anroim he njair atoin amu'it, maan aa fa te, in of napein rais furit huma'-huma', ma nmoufu nbi kreot a'rii-'ne'u, natuin sin nateenb ahaa 'mu'if. Are' kanan rasin naan of neik siraak ma nareu' sin a'moink ein. 10 Atneek tanesib roit ii te, naan anjair uuf neu rais maufinu huma'-huma'. Anmui' tuaf bian re' sin naimn ahaa roit, tar antea sin ntanhai sin rais pirsait amneot. Nok ranan naan, sin neikn ok, nareu' sin a'moink ein.
Amnaa' muher-heran noni' re' ho mtoupu mrair je
11 Timotius! Ho mjair Uisneno Iin ja ko. Onaim amtet-koit mu'roo-'roo mu'ko rais amreu't ein ok-oke'. Ammoin mok neek akninu'. Ammoni mbi rasi re' amharineb Uisneno In nekan anbi are' kanan rasi. Ampirsai piut meu Yesus Kristus. Amneek sekau-sekau gwah. Ho ro he mtahan ambi susat. Ammoin mok sekau-sekau gwah amsa', ro he nok neek ma'nura'. 12 Ammeup batuur-batuur, he munaob are' noin' ein re' hit tpirsai sin. Uisneno no'en nataam ko meu rasi 'honis abar-barat. Onaim amnaa' ma mhoo muher-heran rasi 'honis naan, kais mufetin. Ma ho mutoon amrair ho rais pirsait meu Usif Yesus anbi too mfaun ein sin humak ma sin matak. 13-14 Onaim oras ia, au 'toit ko he muhake' rais manba'an on nai: ammoe' mutuin Usif Yesus In apreent ein ok-oke'. Kais amtanhai prenat mese' msa', maut he biak ein kais nitan ma napenin sanat na'ko ko. Ammoe' mutuin sin ok-oke' nok batuur, tar antea hit Usi', Yesus Kristus, ankoen On anfain neem. Au 'toit ko he muhake' rais manba'an on naan anbi Uisneno In human ma In matan. In es re' anfee snasaf neu are' kanan amonit. Au 'toit ko he ho muhake' rais manba'an on re' naan anbi Yesus Kristus In human ma In matan. In es re' neikn On natoon nanon-noon anmatoom nok In tuan ee, nbi gubernur Pontius Pilatus in human ma in matan.a
15 Usif Yesus re' ma'tain re'uf naan, In es re' annaa' kuasat!
In re' naan, Uis Ko'u nneis na'ko are' uisf ein.
Ma In re' naan, A'naak Ko'u nneis na'ko are' kanan a'naakf ein.
Antea in oors ate,
Uisneno of nakrira' are' kanan rasin ia.
16 Suma In kuun, es re' ka nmaet fa ma nmoin nabar-baar.
In nmoni nbi me'u re' mansian ii ka nabei' fa he nkius ma n'ere.
Ka tiit tain fa tuaf es, re' nabei' he nkius Gwe.
Are' kanan rais hormaat nasaeb ok neu Ne!
Are' kanan kuasa et In a'niman tar antea nabar-baar!
On re' naan, tua! Amin!
Anmatoom nok amu'it ein
17 Tius! Mutoon meu amui't ein pah-pinan ia, he sin kais nabe'on, ma kais na'panen sin a'moink ein neu 'mu'if pah-pinan. Fin a'mui'f ein naan of oek' ein. Reko nneis sin na'paen ok anbin Uisneno 'Honis. Fin In es re' nathoeb kit saa'-saa' re' hit tperluu sin, he hit bisa tnaben tiit 'moint ii in mainonin. 18 Mutoon meu sin he sin npaek sin a'mui'k ein he nmo'en rais reko. Sin ro he nmakoen nbin nmoe' reko. Sin ro he nnona' sin a'niimk ein he nfiit ma nbaab tuaf, ma nroim he nfee athoen na'ko Uisneno neu sin. 19 Nok ranan naan, sin nkikin ma nakbua' a'mu'if he njari 'sukif ma'tani' neu sin a'moink ein noka'-nmeu. Nok ranan naan amsa', sin nafena' rasi 'monit re' ma'upa' ma ma'osa'.
Nai' Paulus natu'ub in surat
20 Tius! Ampanat murek-reko' are' kanan rasi re' Uisneno nana'at ko sin. Kais amseit-seitn om meu rais poi ruum-ruum. Kais amtuut mok ambi uab reu'f ein, re' ka neik fa rais hormaat neu Uisneno. Mumnau, goo! Anmui' tuaf anpaas in a'basan nak, in atoin ahinit. Te kaah, sin ‘hinit’ naan, ka nmui' fa 'sukif. Kais amnao he mmatuut-feef mok sin. 21 Anmui' tuaf bian re' npirsai rais puta-kriu nggwin, tar antea sin ntebin na'kon sin rais pirsait re' amneot ma amnonot neu Uisneno.
Au 'toit he Uisneno nakrira' In neek arekot neu ki ok-oke'.
Saloom,
Au nai' Paulus kau, tua.