Nai' Timotius in taos ma mo'et neu too srani'
5
Kais mukain tuaf ein re' namnasin nneis ko mpaek haan ma'tani'. Mes ampaek uab ma'nura', on re' ho mu'uab meu ho aam honi'. Ma neu muinf ein, mu'haba' sin on re' ho aom-bian sin. 2 On naan amsa', neu bifee mnais ein. Mu'uab meu sin on re' meu ho ain honi'. Karu mu'uab meu bifee muinf ein ate, mpanat sin on re' sin ho feto'. Ho neekm aan ro he namneo ma nakninu'.Anmatoom nok bifee baun ein
3-5 Too srani' ro he nturun ma nbaab baun bifee nggwin, re' sin ka nmu'in fa nonot-asar re' he npairoir sin. Mes karu banu' re' anmui' anah-upuf fe'e te, sin re' naan ro he es anpairoir je. Munoni' sin, he sin nbaras nahinin neu banu' naan in maskeet ein. Nok ranan naan, sin ntuthae Uisneno, ma nharineb In nekan. Mes neu banu' re' nmoni nmes-mees, in ka nmui' fa tuaf antein he npairoir je. In arahaa nharap ma nafneek neu Uisneno. Fai-manas in n'onen ma ntoit turun-babat na'ko Uisneno. Too srain ein ro he npairoir baun ein on re' naan.
6 Mes neu banu' re' naminab sin tuak ein neikin rais marinet pah-pinan, maski in nmoin fe'e msa', in ka maso'ik fa heen, on re' atupas sin.
7 Mumnaub are' rasin naan neu too srain ein, maut he biak ein ka na'uab na're'uf fa sin kaank ein.
8 Mes karu nmui' tuaf re' ka nroim fa he npairoir kuuk sin nonot-asar, anneis-neis in uim je nanan, naan on re' in nait inporin in rais pirsait neu Uisneno. In maufiun ii nneis na'ko atoni' re' ka nahiin fa Uisneno.
9 Karu mpiir banu' he nturun a'naak jemaa't ein ate, in tui'n ii on nai: in toon anmoin naan ii, kais ankuran na'ko toon bo' nee; unu' te, in na'kii' nbi matsaos nok atoni' mese'; 10 tuaf nahiin je mnak, nati' te in nmoe' reko neu tuaf bian; in npairoir nahiin in aanh ein nok reko; re' ntuthae tuaf bian nok neek marine; re' anturun ma nbaab too apirsait ein nok meup ba-baun; re' anroim he nturun ma nbaab tuaf anbi susat; ma re' nabarab in tuan ee piut-piut he nturun ma nbaab anbi rais reko.
11 Kais ampiir banu' re' munif fe' he nturun a'naak jemaa't ein. Kais-kaisa' sin neek romit he nmatsaon ntenin naan, ansiu' napoitan sin rasi mnaut neu Kristus. Nok ranan naan, sin of ka napenin fa mainuan anteni' he ntuthae too srain ein nok rek-reko. 12 Fin karu sin oras mainuan neu jemaa't ii nrabu' te, naan namnees nok sin nareu' sin rais manba'an anbi Uisneno In human ma In matan. Of atoni' nasaan sin. 13 Kais-kaisa' sin napehen, rarit antaisibun ma npoi-ntaman neu biak ein sin uimn ein, ma nareet ein rais ruum-ruum, ma na'uab na're'uf biak ein sin kaank ein. Ma rais reu'f es anteni', es re' sin nroim nanes-nesib he nhee-hee gok neu es in rasi, ma na'uab ein rasi re' ka ma'upa' ma ma'osa' fa. 14 Reko nneis, baun ein re' munif fe', sin nsaon ntein' ein, he reko te, sin nahoin ein, ma n'urus kuuk sin uim je nanan. Nok ranan naan, tuaf re' anmusun kit, ka napenin fa ranan he nareu' ma nkana'paar kit. 15 Anmui' baun munif bian re' anseken nrarin. Sin natuin anrair niut reu'f ein sin a'naak kou' gwe in ranan.
16 Karu nmui' bifee re' npirsai neu Usif Yesus, re' nmui' nonot-asar banu' te, bifee naan ro he nturun ma nbaab bifee banu' naan. Kais amkonan jemaa't ein he sin es ansutai je. Nok ranan naan, too srain ein bisa nturun ma nbaab banu' bian, re' batuurn ii sin ka nmu'i ntein' ein fa tuaf bian he nsutai sin.
Anmatoom nok a'naak jema'at ein
17 Tuaf re' na'naak jema'at nok reko, hi ro he mhormaat ee batuur-batuur, ma mbaen in kai je nok reko. Anneis-neis neu tuaf re' anmeup ma'tani' he naknutu' Uisneno In Kabin ma Prenat, ma nanoni' ki raan a'honis arekot amneot. 18 Fin matu'i et Uisneno In Suur Akninu' mnak, “Karu mpaek bijae he nteir namouf maak ee in fuan na'ko in asrakon, kais amfuut mu'temeb in fefan, maut he in naah.” Ma matu'i nteni' msa' am nak, “Sekau nmepu te, ro he napein kai.”a
19 Karu nmui' tuaf re' nakuu a'naak jema'at ate, kais amtoup gwe on ahaa re' naan! Ro he nmui' tuaf nua'-teun re' ansaksii ma na'uab huma' mese', on naan ate, na' hi bisa m'uurs ee.b 20 Karu mukain amrair je nmes-mees, mes in nmoin fe' anbi sanat naan ate, na' mukain ee nbi jema'at sin humak ma sin matak. Nok ranan naan, tuaf bian of ka nabrain fa he nmoe' natuin in sanat.
21 Munaob are' tui'n ein re' ia nbi jemaa't ein ok-oke', ma kais ampiir humaf. Au una'at mepu ia 'eu ho 'nimam 'bi Uisneno ma Yesus Kristus sin humak ma sin matak. Ameput sonaf neno tunan re' Uisneno npiri nrair sin, anjarin saksii msa'.
22 Kais ammanaap he mpiir tuaf he njair a'nakat. Amtai ma mtae mirek-reok' ee nahuun. Natuin karu hi mpiir maan tuaf es nok akraf-rafu', rarit tuaf naan anmo'e nsaan, hi misaah sanat naan amsa', natuin in a'mo'en. Ampanat ho 'mo'et ma taos he kninu' piut.
23 Au 'neen ate, fe'-fe' fa te ho taim aan nameen. Reko nneis, anmurai oras ia ho mseor tua min-kase kre'o, maut he njair re'u. Kais minu haa oe ruum-ruum.
24 Amkius rek-reko! Anmui' tuaf re' in saant ein nakriir ok. Sin ka ntea nanan fa fe' neu afeek raisn ein sin maatk ein te, too mfaun ein nahini nrarin. Mes anmui' tuaf bian amsa', re' a'roo-'roo te, na' sin saant ein nakriir ok. 25 On naan amsa' huma' mese' neu tuaf-tuaf re' anmo'en reko. Bian nakriir ok nanin. Ma bian anteni' nmo'en reko mes ma'nifa'. Maski on naan amsa', mes saa'-saa' re' sin nmoe' sin naan, a'roo-'roo te, nakriir ok amsa'. Ka bisa fa he ta'koro' rais reko.