Ampaant om mi'ko tuaf-tuaf re' nanoni' fuareur gwah neu too srani'
4
Mes Uisneno In Asmaan ee natoon maat-maat am nak, too srani' bian of antitar saa' re' hit tpirsai. Rarit sin natuin asmanaf bian re' nasekeb mansian, ma natuin niut reu'f ein sin noink ein. 2 Tuaf re' neem ma nanoni' on re' naan, na'uab ate, nasuir nok 'mo'et. Puta-kriu gwi in tuan! Tuaf ein naan sin nekak naank ein, nameis'ook anrarin. 3 Sin nanoni' bifee-atoni' he kais anmatsaon. Sin nanunin amnahat huma'-huma'. Te kaah, Uisneno es re' anmoe' mnaaht ein naan. In nmoe' mnaaht ein naan, he karu apirsait ein nbukaen, sin ntotin makasi neu Ne. Fin sin nahinin neu rais saa' es re' batuur. 4 Are' saa'-saa' re' Uisneno nmoe' sin naan, ro reko. Onaim kais minuin huma'-huma'. Mansian ein ro he ntoup sin ma antotin makasi neu Uisneno. 5 Fin hit tahiin tak Uisneno In Kabin ma Prenat, ma hit onen naan nakninu' nain are' bukaet ein naan.Usif Yesus In ameup rekon
6 Tius! Mumnauba' rasin re' ia meu hit aok-bian apirsait ein. Karu ho mmoe' on naan, ho mjair Yesus Kristus In ameup reok gwes. Uisneno In Kabin ma Prenat sin anmoe' ko he ho mpirsai Je, ma nanoni' ko he muhiin noni' mee es re' amneot. Ho mnaa' muheer amrair Uisneno In Kabin ma Prenat sin. Naan on re' bukaet re' anha'tain ho aom naan. 7 Kais muneuk oras he mpeo uab poi, re' ka natuik ma natai fa nok Uisneno. Kais amtoe mutuin reta' na'ko a'naef am fee mnasi' re' nanunin huma'-huma'. Reko nneis munoni' ho tuam naan he mmoin mutuin Uisneno In roimn ee.
8 Mu'taka' ho aom aan he na'bei', naan reko.
Mes in areokn ii, kreo' gwah.
Mes munoni' ho tuam aan anbi are' kanan rasi, he mmoin mutuin Uisneno In romin,
naan, in reokn ii kah een.
Fin in areokn ii,
ka arahaa fa neu oras tmoni tbi pah-pinan,
mes nbi 'monit neno amnemat amsa'.
9 Uab ein re' ia, ro batuur! Onaim mumnau murek-reko', ma kais amnikan sin. 10 Hit tharap ma tafneek teu Uisneno 'Honis. In es ansoi nafetin are' mansian ok-oke', anneis-neis neu hit apirsait. Etun hit tmeup taheer ma taim ranan ma'tani'.
11 Munoni' rasin ia ok-oke', ma mreun tuaf-tuaf he nmoe' natuin noin' ein naan. 12 Kais amkonan biak ein he nkana'paar ko, natuin ho munif ko fe'. Ho ro he mjari 'tope' meu too apirsait ein, oras ho mu'uab, ho 'mo'em, ho manekat neu tuaf, ho neek pirsait meu Yesus Kristus, ma ho 'monim akninu'. 13 Oras hi mpao kau he au 'uum ate, kais amnikan he mrees Uisneno In Kabin ma Prenat neu too apirsait ein. Amha'tain sin, ma munoni' sin rek-reko.
14 Ampaek ho manoem re' Uisneno nana'at ko gwe jan, re' ho mtoup gwe oras a'naak too srani' n'onen ma ntao 'niman neu ko. Oras naan, sin natoon Uisneno In romin amsa' anmatoom nok ho 'monim ma ho mepu. Onaim kais musaitan manoef re' ho mtoup gwe naan. 15 Ammakoe he munaoba' rasin re' naan! Maut he biak ein nitan nak, ho 'monim ma ho mepu nanaob ok piut. 16 On re': mpanat ho tuam naan, he ho mmoin nok neek amne'o. Ma mpanat amsa' he ho munoni' rais amneot. Karu ho muheer ambi rasin naan, Uisneno of anfei ranan neu ko, ma neu too mfaun re' nneen ma natniin ko, he hi mitsoi mi'ko rais amreu't ein.