Nai' Paulus in surat no nuan
neu apirsait ein abitan Tesalonika
2 Tesalonika
Tabe ma haan buseet
1
Tabe ma haan buseet na'ko au nai' Paulus kau, ma au partein nai' Silas ma nai' Timotius.Surat re' ia, hai msoun ee neu ki aar ki too srani' abitan kota Tesalonika. Hi re' naan, es re' ampiir he mituin hit Ama' Uisneno, ma mituin hit Usi' Yesus Kristus.a 2 Hai mtoit he Sin nakrira' Sin nekak arekot neu ki, maut he hi mmoni mbi mamut, rame' es nok es, ma tainina'.
Nai' Paulus antoit makasi neu Uisneno
3 Aok-bian aar ki! Hai ro he mtoit makasi piut-piut meu Uisneno, natuin hi rais pirsait naan ma'tani' piut meu Ne, ma hi rais maneekt aan amsa' ma'tani' piut. 4 Es naan ate, hai mitoon meu Uisneno In jemaa't ein ambi mee-mee anmatoom nok ki. Hai mitoon am mak, maski biak ein anteir hae ki ma nha'mui' ki, mes hi maran ma mtahan ambi hi rais pirsait naan.
5 Rasin re' ia nakriir ok am nak, Uisneno of nafeek hi rais je te, natai. Fin ha'mu'it re' hi misaah ee oras ia, ro pantas neik ki mtaam amjair Uisneno Iin na. In re' naan, hi Usif. 6 Kais mimtau, natuin Uisneno naan, atai rasi. Amkius! In of anbaras neu tuaf-tuaf re' anha'mui' ki. 7 In of nait nain ha'mui't ein re' hi misaah sin naan amsa'. In of anmoe' neu kai on naan amsa'.
Rasin re' ia ok-oke' of anjarin oras Usif Yesus ansaun neem, nok In ameup ma'tain ein na'ko sonaf neno tunan. 8 Sin of ansaun neman nbin ai piin ko'u. In nbaras sin aar sin re' ka nromin fa he nahiin Uisneno, ma re' ka nromin fa he natuin Usif Yesus In Rais Reko. 9 In nfee hukun maineun besi re' nabar-baar neu sin aar sin, tar antea sin nre'un nkonon. In nriu' napoitan sin na'kon In human ma In matan, he sin kais annaben antein In kuasan re' anpiin ma nakraah re' naan.b 10 Mes oras In ankoen On anfain neem, are' apirsait ein nanaib ma na'rat-ratan In kanan, ma nhormaat Ee. Hi of ambi apirsait ein sin atnaank ein amsa', natuin hi amtoup Rais Reko, re' neon gwes ii hai mitoon ki je naan.
11 Es naan ate, hai m'onen fai-manas ma mteek ki mbi hai onen, maut he Uisneno nkius ki nak, hi ro pantas he mjair In nonot-asar. Hai mtoit he In nfee In kuasan amsa' neu ki, he hi bisa mmoe' are' rais reko mituin saa' re' hi mifeek he mmo'e, ma mituin saa' re' hi mpirsai. 12 Karu hi mmoin nok ranan re' naan ate, of biak ein nait na'ratan Usif Yesus In kanan. Ma hi of mipein bo'is ma mnaikas amsa', natuin hi mituin Ee. Rasin re' ia ok-oke' of anjarin, natuin hit Ama' Uisneno, ma hit Usi' Yesus Kristus, Sin neek rekon.