Tu'in antoom neu a'naak jema'at
3
Saa' re' biak ein na'uab sin naan batuur, nak, “Tuaf re' he njair a'naak jema'at, in npiir naan kuun meup reok gwes.” 2 A'naak jemaa't ii, ro he tuaf re' in kaann ee reko. In ro he na'ki'i nbi matsaos nok bifee mese'. In ro he ntahan nahiin in tuan, in neekn ee ro natea, atoni' anhormaat ee, antoup amnemat anbi in umi, ma nanoni' nabei' tuaf bian. 3 Kais tua amauf raru, ma kais amabanat. Tuaf re' batuur ii, es re': atoin neek ma'nura', naim nahiin rais haran nekaf, ma ka nsinmakan fa roit. 4 In ro he n'ator nahiin in uim je nanan. In aanh ein ro he natniin ee ma nhormaat ee. 5 Fin karu in ka bisa n'ator fa in uim je naan ee te, nok ranan mee he in bisa n'ator Uisneno In jemaa't ein?6 Reko nneis ampiir maan tuaf re' in tenab, mo'et ma taos namnasi nbi Kristus. Kais misaeb ma minaib maan a'naak jema'at na'ko tuaf re' fe' natuin Usif Yesus; kais-kaisa' in na'naeb on. Kais-kaisa' Uisneno ntee' je, on re' Uisneno ntee' niut reu'f ein sin a'naak ko'u. 7 Karu hi he misaeb tuaf es he njair a'naak jema'at, maim tuaf re' atoni' bian re' ka npirsai fa nhormaat ee msa'. Nok ranan naan, in ka namaeb on fa. Ma niut reu'f ein sin a'naak kou' gwe, ka bisa nakreo namouf gwe fa.a
Tuaf re' he nturun a'naak jema'at
8 On naan amsa', neu tuaf re' he nturun a'naak jema'at. Sin aar sin re' naan, ro he tuaf re' kaann ee nfoo mein, tuaf re' ka napoi nahiin fa, tuaf re' ka nbukae fa raur mafu, ma kais tuaf re' naah mate'. 9 Sin neek ein ro he kniun' ein, ma sin ro he nnaa' naher-heran noni' re' Uisneno nfee je ma nakriir ee neu kit, too apirsait ein. 10 Amparikas sin a'moink ein ma sin meupk ein rek-reko. Karu ka mipein fa sin saant ein ate, na' mait sin anjarin tuaf re' he nturun a'naak jemaa't ein.
11 On naan amsa' sin feek ein.b Bifeen naan sin a'moink ein ro he namneon ma namnonon. Kais bifee aroob-ra'ut re' nareu' biak ein sin kaan foo menin. Sin ro he ntahan nahiin sin tuak ein, ma tuaf bian anpirsai sin imsa'.
12 Tuaf re' he nturun a'naak jemaa't ein, ro he atoni' re' na'kii' naheer anbi matsaos nok bifee mese'. In ro he n'ator nahiin in uim je naan ee nok reko, ma nanoni' nahiin in aanh ein amsa'. 13 Tuaf re' njair atuta'-abha'et neu jema'at rek-reko, ro tebe biak ein of anhormaat sin. Ma sin nabrain ma ka namtaun fa he na'uab ein anmatoom nok sin rais pirsait neu Yesus Kristus.
Hit rais pirsait ii in a'sukin
14-15 Tius! Au 'harap ma ufnekan he kreo' gwes anteni' te, au 'eit i'makius ko. Karu au u'bake' kre'o te, surat re' ia of antea nahuun. Au 'tui surat ia, he utoon ko m'ak, Uisneno In aasr ein ro he nmonin on re' mee. Kais amnikan, Uisneno naan, Uis Amonit. Iin na nahuum on re' umi re' nahaek ee nbi fatu 'sukif ma nii ainaf re' ma'tani'. Nok ranan naan, sin ro he natnaat Uisneno In noni' amneot.
16 Uisneno nfei nrair rais ma'nifa' ko'u na'ko hit rais pirsait. In a'suikn ii, on nai:
Kristus neem anrair jen anbi pah-pinan ia,
anpaek humaf ma masaf mansian on re' hit.
Uisneno In Asmaan ee msa' nakrira' bukti mnak,
Nai' Yesus naan, Tuaf neek amne'o ma amnonot.
Ma Uisneno In ameupt ein sonaf neno tunan niit Ee msa'.
Uisneno nait nasaeb Ee ntaam neu sonaf neno tunan,
rarit nanaib ma ntuna' na'raatn Ee.
In reetn ee nasiin on ma nabeon on anfuun am nateef uuf ma pah anbi pah-pinan ia msa'.
Anbin mee-mee anbi pah-pinan ia, tuaf anpirsain anrair Je gwen.
Hit tpirsai on re' naan, tua!