Karu apirsait ein nabuan ate, ro hit tmoe' on mee?
2
Nahunu te, au 'toit ki he hi m'onen amteek are' too mfaun ein ok-oke'. Karu hi mbaiseun Uisneno te, mtoot Je he In nturun are' too mfaun ein anbin susat. Ma mtoit makasi msa', natuin In es re' nmoe' rais reko neu sin ok-oke'. 2 Amteek ambi 'oen ein amsa' anmatoom nok uisf ein ma 'naakf ein. Nok ranan naan, hit aar kit bisa tmoni tbi mamut, rame' es nok es, ma tainina' natuin Uisneno In romin, ma tmoni tbi raan amneot, on re' tuaf-tuaf re' na'bees neu Ne. 3 Am'onen on re' naan ate, reko. Naan anharineb Uisneno re' nsoi nafetin kit. 4 In nroim he are' too mfaun ein ok-oke' napenin a'honis, ma nahinin mee ja es re' amneot ma amnonot, esan re':5 Uisneno mees' aah.
Ma nmu'i haa nete ranan mees' aah, re' narame' Uisneno nok mansian aar kit, es re' Yesus Kristus.
Nai' Yesus naan, mansian batuur-batuur.
6 In nnona' In tuan ee he nsoi nafetin kit na'ko hit saant ein ok-oke'.
Nateef nok in oors ate, Uisneno nfei rais reko naan kninu'-kninu' neu are' too mfaun ein. 7 Rarit Uisneno npiir naan kau 'jair In haef, he 'nao utoon tuaf re' ka atoin Yahudis fa a'bi mee-mee, ma unoni' sin he sin npirsain neu Usif Yesus ma nmonin natuin raan amneot ma amnonot. Saa'-saa' re' au utoon sin re' ia, batuur on naan. Au ka upoi fa, tua!a
8 Au 'roimk ii on nai: anbi mee-mee, karu hi mibua he m'onen ate, hi ro he mitaiba' nekaf es nok es. Kais ammakto'on. Kais ammatoe. Karu hi mi'aiti' hi 'nimam oras hi m'onen, hi neekm ein ro he kniun' ein.
9-10 Bifee nggwin on naan amsa'. Au 'roim he sin n'ator sin tuak ein te, suuk nahuum, ma npaken amsa' seor nahuum. Kaisa' nbagaya he biak ein antarun mataf neu sin, a'naak fuun ein re' ansoi' ma nbui' sin huma'-huma', ai' npaken tai ma'osa' re' ka natuin fa atoran, ai' natoon ok bainesi' nok sin npaken moro'-muti' ma mutiara sin. Re' nmoe' bifee nggwin namasan naan, es re' neek akninu', ma sin a'moe'k ein rekon. Re' naan es re' natai neu bifee nggwin he na'besan neun Uisneno.b 11 Karu too srain ein nabuan ma nnenan noni' te, bifee nggwin ntook nokan ma nneen nokan rek-reko anmatoom nok noin' ein naan. Kais ta'se'o ma ta'root. 12 Anbi au te, ka reko fa karu bifee ji nait in tuan ma naprenat atoni', ma nanoni' sin. Reko nneis bifee nggwin sin neek ein natean ma kais mafeef ein bainesi'. 13 Fin Uisneno nmoe' nai' Adam nahuun. Rarit, na' bi Hawa.c 14 Ma ka nai' Adam fa es antoup uab poi nahuun na'ko niut reu'f ein sin a'nakat, mes bifee. Anmurai oras naan, mansian ii ntanhai Uisneno In atoran.d 15 Maski on naan amsa', mes bifee nggwin napenin a'honis, natuin sin nahoin ein. Asar sin npirsain batuur-batuur neu Kristus, anmonin nbin rais manekat, anmu'in neek akninu', ma sin a'moink ein pantas ma kais anbainesin.e