Nai' Paulus antoit apirsait ein abitan Tesalonika he n'onen anteek sin
3
Aok-bian aar ki! Kais amnikan kai mbi hi onen toits ein. Am'onen, he karu reko te, Uisneno In Rais Reok gwi nanaob on rabah neu uuf ma pah, tar antea tuaf bian anbi mee-mee anhormaat Rais Reko naan, on re' oras hi mtoup Gwe. 2 Am'onen amsa', he reko te, hit tafetin taan ok ta'ko ataisiubs ein, ma ta'ko amaufinut bian amsa', fin na'ko mansian pah-pinan ia, bian ka npirsain fa Rais Reko naan.3 Mes Uisneno nnaa' In hanan. In bisa nha'tain ki, ma njari 'pesit neu ki he nafetin ki na'ko amre'ut. 4 Ma hai neekm ein natea nak, Usif Yesus anmoe' ki natuin saa' re' hai mitoon amrair sin neu ki, ma hai mbatuurn ee mmak, hi of ammoe' mituin on re' naan.
5 Hai mharap ma mifnekan meu Usif Yesus, he In es re' na'naak ma nnaa' ki, he reko te, hi mihiin batuur-batuur mak, Uisneno anneek ki. Ma hi mihini msa' mak, hi mtahan ambi susat-ha'mu'it, on re' Kristus unu' te, In naran ma ntahan anbi susat-ha'mu'it ma ma'ne'at.
Mansian ii ro he tmeup, kais tapeeh
6 Aok-bian aar ki! Au utoon 'ain ki 'paek Usif Yesus Kristus In kanan. Hi kais amkua'noon mok apehet re' neno-neno te, in nnao ma ntoe neu-mneem ruum-ruum aah. Fin sin ka natuin fa hit i'tope' re' hit tmeup ma'tan-tani'. 7 Hi aar ki mihiin mak, hi ro he mait i'tope' mi'ko hai 'monim neno naan, oras hai mitua mok ki. Hi miit kiim. Hai ka mporin miit fa oras anjair ruum am parsuum. 8 Hai mmeup ma'tani' fai-manas, he hai kais misusab ki. Hai ka mtoup fa bukaet ruum-ruum aah. 9 Hai re' ia, Uisneno In ameupt ein. Onaim hai mmui' hak he mtoit saa'-saa' na'ko ki. Mes hai ka mpaek fa hak naan. Hai re' ia, mjari 'tope' arekot meu ki. 10 Neon gwes ii, hai mitoon ki rasi tfeka' es nak, “Sekau ka nmeup fa te, kais naah.”
11 Hai mipein hanaf nak, anmui' tuaf na'ko ki re' suma nnao ntoe natef-teef, ma ka nroim fa he nmeup. Sin suma ntaisibun ma nseit-seitn ok neu biak ein sin urusan. 12 Tuaf-tuaf on re' naan, hai mimnaub sin ampaek Usif Yesus Kristus In kanan, he sin nasnasab sin 'moe't ein naan. Reko nneis, sin nmurai nmepun, he nataah ma nasaah kuuk sin a'moink ein anpaek kuuk sin nenuk ma maskeet.
13 Aok-bian aar ki! Hi kais misnasab meup reok gwi, joo!
14 Hi mtanar mirek-reko' tuaf-tuaf re' ka nromin fa he natuin saa'-saa' re' hai mtui mitoon ki sin ambi surat re' ia. Kais maen mituin sin, maut he sin namaeb ok. 15 Mes hi kaisa' maan sin on re' hi musun. Mo'en sin ma mikain mirek-reko' sin, nahuum on re' hi aok-bian sin kiim.
Nai' Paulus natu'ub in surat
16 Uisneno naan, Usif re' neik rais mamut ma rame' es nok es. Au 'toit he In nfee ki In rais mamut naan anbi saa'-saa' aah. Maut he Uisneno nok ki piut-piut.
17 Uab amuint ein re' ia, au 'tui sin 'eik au 'niimk ii kuuk, maut he hi mihini mmak, surat re' ia batuur-batuur na'ko kau. Surat bian sin imsa', au 'tui sin on re' naan.a
18 Au 'toit he hit Usi' Yesus Kristus In neek arekot naan nabua nok ki aar ki.
Surat re' ia, antuu' ma nheu'b on, on re' naan, tua.
Au nai' Paulus kau, tua.