Amaufiun reu'f ee neem fe', na' Usif Yesus ankoen On anfain neem
2
Aok-bian aar ki! Hai he mitoon meu ki rasi anmatoom nok hit Usi', Yesus Kristus, In oras re' he nkoen On anfain neem, ma oras hit aar kit tabua tok Ne.a 2 Kais maan aa fa te, tuaf es neem napoi ki te, hi mroim mituin aah. Hi of amtaka'nana' karu hi mneen biak ein nak, Usi' ankoen On anfain neem anrair jen. Maski sin na'uab ein nak, sin napenin hanaf na'ko Uisneno In Asmanan, ai' sin nnenan na'ko biak ein, ai' sin napenin surat na'ko kai, mes kais ampirsai sin. Natuin rasin naan, poi ok-oke'! 3 Kais amkonan biak ein he namonob ki. Fin of anmui' naan tua amaufiunt es, neem nahuun fe', rarit na' Usif Yesus ankoen On anfain neem. Tua amaufinut re' ia, of anraban ma'tani' neu Uisneno, tar antea too mfaun ein natuin ee ma nraban Uisneno msa'. Tuaf re' ia, in maufiun ii ma'tain besi! Es naan ate, batuurn ii, in ro he ntaam neu ai marara' abar-barat. 4 In na'naeb in tuan ee na'raat anneis na'ko are' kanan pah tuaf, ma nraban nain are' kanan uis fuat re' mansian ii na'ruri' ma na'besan neun sin. Ma in ntaam neu Uisneno In Uim Onen Uuf amsa', rarit in npaas in a'baasn ee mnak, “Au re' ia, Uisneno kau!”b5 Hi mimnau, ai' kaah? Neon gwes ii, au utoon 'ain ki anmatoom nok tuaf re' naan, oras au ubua 'ok ki fe'. Batuur!
6 Oras ia, tua amaufinut naan ka ntea in oors aa fa fe' he nakrira' in tuan, natuin anmui' tuaf an'eka' ma ntaahn ee. Ma hi mihini msa' mak, saa' na es re' antaahn ee ji on re' naan. 7 Oras ia, abroet re' he ntao taisiub gwi, nmepu mninu'-mninu', natuin anmui' tuaf an'eka' ma ntaahn ee. Mes anmui' oras he tuaf re' an'eka' ma ntaahn ee naan, of he nafeitn ee. 8 Rarit tua abroet naan, anpoi neem ma ntao in meupn ee maat-maat. Mes nateef nok Usif Yesus In oras amasat re' nkoen On anfain neem, In na'uab hanaf mese' te, tuaf naan anre'u nkoon.c
9 Mes oras Usif Yesus ka nkoen On anfain neem fa fe' ete, niut reu'f ein sin a'naak kou' gwe nfee kuasa ma'tani' neu tua amaufinut naan, he in bisa nmoe' rais sanmakat huma'-huma', tar antea mansian ii nateenb ein am nak, of oni' tuaf anpaek Uisneno In kuasan.d 10 Nok ranan naan, tuaf naan napoi ma nputa-kriu naan kuun too mfaun ein. Sin re' naan, of anbaits ok na'kon Uisneno. Maski In nfei ranan he nsoi nafetin naan kuun sin, mes sin ntitar ma napasib In sarit naan, ma ka nromin fa he npirsain rais amneot ma amnonot. 11 Etun Uisneno npooh naneuk sin neek ein na'ko rais amneot ma amnonot, maut he sin npirsain neu rais puta-kriu nggwin. 12 Nok ranan naan, Uisneno nfee hukun ma'fena' neu tuaf ein naan, natuin sin ka npirsain fa neu rais amneot ma amnonot. Fin sin nroim nanesib neu 'moe' amre'ut.
Apirsait ein ro he naran ma'tani'
13 Aok-bian aar ki! Hai mtoit makasi piut meu Uisneno, natuin In nneek ki. Natuin oras In ka nmoe' fa pah-pinan ia fe' ete, In nafeek anrair he nsoi nafetin naan ki. Rarit In nfee In Asmanan he nakninu' ki, natuin hi mpirsai rais amneot ma amnonot. 14 Oras hai mitoon Rais Reko meu ki, Uisneno npaek Rais Reko naan he no'en ki, maut he hi mnaben mihiin hit Usif Yesus Kristus In pinan ma krahan.
15 Aok-bian aar ki! Hi ro he mtahan piut, mpooh ma mnaa' miher-heran saa'-saa' re' hai mitoon ki sin, ma saa'-saa' re' hai mtui miit sin amsa'.
16-17 Hai m'onen piut meu hit Ama' Uisneno, ma hit Usi' Yesus Kristus. Hai mtoit he Sin nha'tain ki, maut he hi bisa mmoe' are' kanan rais reko. Hai mtoit on re' naan, natuin hai mihini mmak, Uisneno anneek niis kit ok-oke'. Natuin In neekn ee reko, es naan ate, In ka nasnaas niit fa fe' na'ko mepu re' he nha'tain kit. Nok ranan naan, hit bisa tafnekan teu Ne piut-piut.