Nai' Paulus in surat ahunut
neu apirsait ein abitan Tesalonika
1 Tesalonika
Tabe ma haan buseet
1
Haan tabes na'ko au, nai' Paulus kau, ma au partein nai' Silas ma nai' Timotius.Surat re' ia, hai msoun ee neu ki aar ki too srani' et kota Tesalonika. Hi es re' ampiir kiim ranan he mituin hit Ama' Uisneno, ma mituin hit Usi' Yesus Kristus.
Hai mtoit Uisneno he nakrira' In nekan reok gwe neu ki, he hi mmoni mbi mamut, rame' es nok es, ma tainina'.a
Nai' Paulus antoit makasi, natuin abitan Tesalonika npirsain piut
2 Hai misaeb makasi piut-piut meu Uisneno, natuin hi pirsait naan. Fai-manas hai m'onen ma mteek ki ok-oke'. 3 Hai mimnau piut-piut meu are' mepun re' hi mmoe' sin, natuin hi mpirsai Uisneno ma mneek Ee. Hi mtahan piut-piut ambi are' mepun naan, natuin hi mharap ma mifnekan meu Usif Yesus. Hai meik sin piut-piut meu Uisneno In human ma In matan, re' hit Ama'.
4 Aok-bian aar ki! Hai mihiin mak Uisneno nneek ki. Etun In npiir ma nbeit naan ki njair In nonot-asar. 5 Neon gwes ii, oras hai iim meu Tesalonika, hai mitoon ki Uisneno In Rais Reko. Oras naan, hi mneen hai uab ein rek-reko. Hi ka mneen ahaa fa, mes hi miit kiim Uisneno In kuasan amsa' na'ko In Asmaan Akninu'. Rasin re' naan, es re' anmoe' ki ma hi mtoup Usi' In Rais Reko batuur-batuur. Oras naan, hi miit meik hi matam, hai 'tokom ma hai 'naom mak, hai mmoe' on mee, he hi mihiin batuur-batuur Usi' In ranan. 6 Natuin hi mroim ma mpiir he mituin Uisneno In romin, es naan ate hi mmoin mituin hai 'tope', ma mmoin mituin Usif Yesus In a'tope'. Mes oras hi mtoup Rais Reko, nmui' tuaf re' nasusab ki. Maski on naan amsa', hi neekm ein naan ka na'oin ein fa, natuin Uisneno In Asmaan Akniun' ee, nfee ki neek marinet.b
7 Nok ranan naan, hi mikrira' 'tope' meu apirsait ein ok-oke' abitan propinsi Makedonia ma propinsi Akaya. 8 Mes ka re' naan anmees fa. Uisneno In Rais Reko naan nasiin on ma nanaob on na'ko ki hi abit Tesalonika naan, antea mee-mee. Onaim hai he mi'uab saa' antein, natuin biak ein oke' anneen anrair hi neek pirsait meu Uisneno. 9 Anbi mee-mee jah, biak ein nareet ein nak, unu' te hi mtoup kai nok rek-reko. Rarit hi mait imporin hi fuat ein naan, ma mi'te'un hi neekm ein naan ma mituin Uisneno re' amneot ma amnonot. Natuin hi re' naan of amjair Uisneno Amonit Iin ja ki. 10 Sin imsa' nareet ein nak, hi fe' mpa-pao Uisneno In Anah, Nai' Yesus, he nkoen On neem na'ko sonaf neno tunan. Neon gwes ii, biak ein na'maet Je, mes Uisneno namonib nafain' Ee. Karu Uisneno nroim he nhukun mansian ii te, Usif Yesus es re' of ansoi nafetin naan kit na'ko to'os Uisneno.