Mibarab he mseun Usif Yesus In amneman
5
Aok-bian aar ki! Hai kais amtui he mitoon meu ki mmak, Usi' In amneman naan, nateef jam fauk, ai' fuun ii ntaam neno fauk. 2 Natuin hi aar ki mihini mmak, In amneman naan nok askeken, on re' abakat re' antaam nabaak oras fai.a 3 Oras naan, of mansian ein anmonin nbin mamut ma tainina', mes nok askeken ate, sin napenin siraak. In amneman naan, nahuum on re' bifee ma'apu', nok askeken ate, meen mahoint ii ntea. Karu rasi naan anboor ate, hit he ttorak attein' ee on mee? On naan amsa', hit Usi' In amneemn ii, on re' naan.4-6 Aok-bian aar ki! Kais-kaisa' In amneman naan napein ki on re' abaakt ii ntaam neu umi nbi oras fai atnanas, nateef hi mtuup amfiin. Hi kais on re' naan! Hit ka tmoin fa et meis'ookn ii nanan, on re' biak ein re' antupan nfinin fe'. Natuin hit es re' atpirsai trair teu Nai' Yesus, atmoni trari tbi me'u, mibarab hi tuam ein naan he mseun Gwe, ma mpanat mirek-reko' hi tuam ein naan. Rasin re' ia, hi mihini mrair sin. 7 Fin karu ttuup ate, ttuup oras fai. Ma tbukae raur mafu te, tbukae oras fai. 8 Mes hi kais on re' naan, natuin hit re' ia, tmoni trair tbi me'u. Hi ro he mpanat hi tuam ein naan. Karu hi mpirsai piut-piut meu Uisneno, ma mmaneek es nok es, naan on re' sorarus re' npaek baur besi re' npafa' naan in a'basan. Ma karu hi mharap ma mifnekan piut-piut meu Usif Yesus re' anpafa' ma npanat ki na'ko Uisneno In to'os, naan on re' sorarus re' na'sobe' 'soeb besi.b
9 Uisneno ka npiir kit fa he hit tapein In hukun. Mes In npiir ma nbeit kit he hit tapeni 'honis, natuin hit tpirsai teu Yesus Kristus, hit Usi'. 10 Fin In nmaet he nsenu' ma nseka' kit. Onaim karu In nkoen On anfain neem, hit of atmoin tok Ne nabar-baar, maski hit tmate trair, ai' tmoin fe'.c 11 Nok rasi naan, ampaek au uabk ein re' ia, he mmafainekan ma mmahaan maun es nok es, on re' hi mmoo' je oras ahunut.
Nai' Paulus anfee noni' neu jema'at Tesalonika
12 Aok-bian aar ki! Mimnau he mhormaat sin aina'-ama' re' ntaman amepu krei he natuuk ki. Fin sin re' naan, anmepun ma'tani' neu ki, ma namnauba' ki he hi kais mistuun, mispae, ma mtaikoib. 13 Amfiit ma mbaab sin nok hi rais manekat, natuin sin nmepun ma'tani' neu ki. Ammoni mbi mamut ma rais rame' es nok es.
14 Aok-bian aar ki! Anmui' rasi bian fe' re' hai he mimnaub ki sin, on nai: tuaf-tuaf re' napehen, sero mpaesa' sin he sin nmepun batuur-batuur. Mee ja in neekn ee nabait, mha'tain je. Mee ja n'ore te, ampeis je. Rarit amneek amnaun meu too mfaun.
15 Mimnau! Kais ambaras 'moe' amre'ut nok 'moe' amre'ut. Mibarab hi tuam ein naan he mmoe' rais reko meu are' too mfaun. Kais ammoe' reok gwah meu hit aok-bian sin kuuk, mes meu tuaf bian amsa'.
16 Mibarab hi neekm ein naan he mmarinan piut-piut. 17 Am'onen fai-manas. 18 Anmui' saa'-saa' aah, et susat ai' marinet, misaeb sukuur ma makasi meu Uisneno. Fin Uisneno anroim nok 'mo'et on re' naan neu sekau-sekau re' natuin Yesus Kristus.
19 Kais am'eka' Uisneno In Asmaan ee In mepun. 20 Karu anmui' apirsait es nak, in napein hanaf na'ko Uisneno, kais mismeur ee! 21 Hi ro he mparikas mirek-reko' hanaf naan, he na' hi mihiin mak, batuur na'uu ma na'baa' na'ko Uisneno, ai' kaah? Karu batuur ate, mituin. 22 Mes mi'roba' hi tuam ein na'kon 'moe' amreu't ein ok-oke'.
Nai' Paulus natu'ub in surat
23-24 Au 'onen a'toit Uisneno he nakninu' hi neekm ein ma hi 'moinm ein ok-oke'. In es re' bisa nmoe' kit he hit tmoni tbi mamut ma rais rame' es nok es. Nok ranan naan, oras hit Usi' Yesus Kristus ankoen On anfain neem, na' hi bisa mhake mbi In human ma In matan, meik hi aom ein, hi neekm ein, ma hi smaanm ein, re' ka nmui' fa sanat saa'-saa'. Batuur! Natuin Usif Yesus In es re' no'en ma nnapen ki mjair In nonot-asar naan, In ka napoi fa. Saa' re' In na'uab ee te, In nmoo' je ma njair. Rarit In neik ki mnao meu Uisneno In human ma In matan nok akninu'.
25 Aok-bian aar ki! Kais amnikan kai mbi hi onen.
26 Au 'toit ki he mfee hai haan tabes ma manekat meu Uisneno In too srain ein et bare naan, joo!
27 Au 'toit ki 'eik Usif Yesus In kanan, he mrees au surat re' ia meu jemaa't ein ok-oke'.
28 Au 'toit he hit Usi' Yesus Kristus nakrira' In nekan arekot neu ki aar ki.
On re' naan, tua.
Saloom,
Au nai' Paulus kau, tua.