A'monit re' anharineb Uisneno In nekan
4
On nai, aok-bian aar ki! Hai mtoit ma mi'paen meu ki, he hi mmoin ma mharineb Uisneno In nekan, on re' hai minoni' ki oras naan. Batuur, hi mmoin mituin sin oek' een, mes natuin hit ttaam atjair nonot-asar teu Usif Yesus, es naan ate, hai mtoit ki he hi maim ranan ma'tani' ntein. 2 Hi aar ki mihini mrair saa'-saa' re' hai minoni' ki sin, ampaek Usif Yesus In kuasan. 3 Uisneno In roimn ii on nai: ammoni kninu'! Kais am'oemeet. Tait i'tope' on re': kais ammakaek ma mmakoin karu ka fee-mone fa. 4 Hi ro he m'ator mihiin hi tuam ein kiim he mmoni kninu', tar antea biak ein anhormaat ki.a 5 Kais ammoin mituin hi tenab amre'ut re' anpoi na'ko hi neekm ein naan, on re' biak ein re' ka nahiin fa Uisneno. 6 Kais anmui' tuaf re' he niis anmees kuun ma naim ranan he narukib apirsait ein neu Uisneno. Natuin Uisneno naan, hit Usi' re' of anbaras amreu't ein ok-oke'. Rasin re' ia, hai mitoon sin neu ki fani-fani, ma mimnaub main ki sin na'ko oras unu' naan. 7 Fin Uisneno no'en anrair kit he tjair Iin na. In sairt ii, hit ro he tmoni te, takninu', ka t'oemeet, ka on fa tuaf-tuaf re' anmakonin rafu'-rafu'. 8 Nok rasi naan, sekau-sekau re' ka natuin fa noni' ia, in ka npenan kai fa, mes in npenan Uisneno re' anfee nrair In Asmaan Akniun' ee neu ki.9 Anbi au teenb ii te, au kais a'tui ufani' 'eu ki rasi re' anmatoom nok rais manekat anbi hi apirsait bare naan, natuin Uisneno neikn On nanoni' ki mnak, hi ro he mmaneek es nok es. 10 Hai mneen amrair mak, hi mneek hi aom-bian sin abitan propinsi Makedonia naan. Mes aok-bian aar ki! Oras ia, hai mtoit ki, he hi mmaneek amtein mok tuaf bian amsa'. 11 Maim ranan he hi 'moinm ein mamut, rame' es nok es, ma tainina'. Kais amseit-seitn om meu biak ein sin rasin, mes es-es ate m'urus kuum ho rasi. Hi ro he maim mepu-re'ot he mipeni mnahat natuin hi maskeet aa kuum. Kais amharap ma mifnekan meu biak ein. Rasi ia hai mimnaub ee meu ki na'ko neon gwes ii. 12 Karu hi mmoin on re' naan ate, hi ka misaeb fa ma'fena' meu biak ein. Of tuaf-tuaf re' ka npirsain fa neun Kristus niit hi 'moinm ein on naan ate, sin nak, “Aijoo! Apirsait ein neu Usif Yesus, sin a'moink ein mne'o batuur!”
Rasi re' anmatoom nok Usif Yesus he nkoen On anfain neem
13 Oras ia, aok-bian aar ki! Au he utoon ki rais jes, maut he hi mihiin batuur anmatoom nok amaets ein. Hit aar kit tahiin tak, amaets ein of anmonin nfanin. Onaim karu anmui' tuaf na'ko Usif Yesus Iin aa nmaten, hi kais misusab hi tbuuam ein naan, on re' biak ein re' ka nahiin fa nak, amaets ein of anmonin nfanin. 14 Natuin hit tahini trair tak, Nai' Yesus anmaet, mes rarit Uisneno namonib nafain' Ee. Onaim karu on naan ate, of Uisneno namonib nafani' are' amaets ein amsa' re' anpirsai nrarin, ma nabuaba' sin nok Usif Yesus.
15-17 Karu Usif Yesus ankoen On anfain neem, In nsaun neem na'ko sonaf neno tunan neu pah-pinan, of anmui' hanaf re' naprenat nok ma'tani'. Rarit ameupt ein sonaf neno tunan sin a'naakt ee naprenat sin he nfuun to'is. Rarit Uisneno Iin na re' nmate nrarin, of anmonin nfanin. Rarit sin, nok hit amoint ii, ta'ait ok atsae teu nope, he hit ar-arkit tseun Usif Yesus In amneman naan. Rarit hit aar kit atmoin tabu-bua piut tok Ne.b