Nai' Paulus nafeek he nreek nai' Timotius he nnao neu Tesalonika
3
1-2 Hi mihini te, noo gwah! Neon gwes ii, oras hai misaitan ki mbi naan, ka natuik ma natai fa nok hai romim. Hai neekm ein anmariin anmaten he iim amkius ki, mes ka njair fa. A'roo-'roo te, hai ka mibe'i mtein fa gwen, etun hai mifeek he mreun nai' Timotius neit inkius ki. Mes au 'ok nai' Silas mibaar ambi kota Atena. Nai' Timotius naan, hai aom-bian. In re' naan, hai partei ja nbi mepu re' hai mibua oras hai minaob Yesus Kristus In Rais Reko. Hai mreek ee neit he in nanoni' ki ma nha'tain ki, he hi rais pirsait meu Uisneno naan na'kii' ma naheer antein.a 3 Nok ranan naan, karu hi mipein susat, hi neekm ein naan ka na'oin ein fa. Ampooh ma mnaa' miher-heran hi rais pirsait naan. Fin hi mihiin mak, apirsait ein neun Kristus, ro tebes of napenin susat on re' naan. 4 Neon gwes ii, oras hai mok ki fe', hai mimnaub main ki mmak, tuaf-tuaf re' npirsai neu Usif Yesus, of napenin susat huma'-huma'. Oras ia, are' kanan susat naan, anjarin nrarin, ai' on mee?5 Natuin au 'susa 'maet 'ok hi 'tokom ma hi 'hakem, es naan ate au 'reek nai' Timotius neit neu Tesalonika, maut he hai mipein hanaf nak, hi mpirsai piut fe' meu Uisneno, ai' kaah. Natuin au neek ii nabait imsa', kais-kaisa' niut reu'f ein sin a'naak kou' gwe neem ma nfuir ki he hi maikoit Uisneno. Karu njair on naan ate, hai mepu neno naan, ruum am parsuum!
Nai' Timotius nfain neem ma neik hanaf na'ko apirsait ein abitan Tesalonika
6 Oras ia, nai' Timotius anfain neem een na'ko Tesalonika, ma neik hanaf re' nhariin kai. In nareet am nak, hi mpirsai piut meu Kristus, ma mmaneek piut. Rarit in natoon am nak, hi mimnau kai msa', on re' hai mimnau ki.b
7-8 Aok-bian aar ki! Maski hai abit ia mnaben ma'fena' natuin hai mipein susat huma'-huma' ka kre'-re'o fa, mes nai' Timotius in neik rais haan maut batuur-batuur neu kai. Natuin rasi naan, oras ia hai mihiin mak, hi mpirsai Uisneno piut-piut ma mmafuut reko mok Ne.
Nai' Paulus an'onen anteek too srani' abitan Tesalonika
9 Onaim hai misaeb sukuur makasi kou'-ko'u meu Uisneno nok neek marine, natuin hi mituin Ee piut. 10 Hai m'onen fai-manas, he reko te, hit aar kit bisa tateef attein. Hai he minoni' minokab ma mimtisib meu ki Uisneno In raan a'honis.
11 Hai mharap ma mifnekan hai teenb ii meu hit Ama' Uisneno, ma hit Usi' Yesus Kristus, re' anfei ranan, he hai iim miteef mok ki mtein. 12 Hai mtoit he Uisneno nmepu nbi hi neekm ein he hi rais maneekt aan nanaob on piut. On naan amsa', mok hi aom-bian sin ok-oke', on re' hai mneek ki msa'. 13 Nok ranan naan, Uisneno nha'tain ki, he mmoin nok neek amne'o ma kninu', tar antea Usif Yesus ankoen On anfain neem nok Iin na, hi mhaek mok amsa' ambi hit Ama Uisneno In human ma In matan, ma hi ka misaah ma mroi meik fa sanat mese' msa'.