Nai' Paulus in surat
ansoun ee neu apirsait ein kota
Kolose
Tabe ma haan buseet
1
Tabe ma haan buseet na'ko au, nai' Paulus kau. Uisneno kuun es re' anpiir ma nbetis naan kau he 'jair Yesus Kristus In haef. Nai' Timotius amsa' es ia, ma in ansonu' haan tabes ma haan buseet amsa' neu ki aar ki.2 Au 'tui surat re' ia, ma 'soun ee 'eit 'eu ki aar ki, es re' Uisneno Iin na abitan kota Kolose, re' anmoe' natuin piut Yesus Kristus In raan a'honis.
Hai mtoit he hit Ama' Uisneno nakrira' In nekan arekot neu ki aar ki, he hi bisa mmoni mbi mamut, rame' es nok es, ma tainina'.
Nai' Paulus an'onen ma anteek apirsait ein abitan Kolose
3 Hai m'onen es mee te, hai mteek ki, hai mtoit makasi meu Uisneno, es re' hit Usi' Yesus Kristus In Amaf. 4 Hai mneen amrair are' rasi mfaun anmatoom nok hi rais pirsait meu Yesus Kristus, ma hi nekam arekot re' ammaneek meu are' apirsait ein ok-oke'. 5 Hi mmoe' on naan, natuin hi mihiin are' kanan rais reko, re' matunu' nrair neu ki et sonaf neno tunan. Rasin re' ia, hi mneen miit sin na'kon uab ein re' batuur, es re' Uisneno In Rais Reko naan, 6 re' tuaf neit natoon ki je na'ko oras ahunut naan. Rais Reko naan nasiin On, nabeon On ntea bare-bare nbi pah-pinan ia, ma napein afan arekot, natuin in na'bani' tuaf ein sin a'moink ein anjarin reko. Hi 'moinm ein amsa' na'bain ein njarin reko on re' naan, anmurai na'ko neon ahunut oras hi mneen ma mtoup Rais Reko naan, ma mihiin batuur-batuur Uisneno In nekan arekot.
7 Hi minoni' mrair rasin re' ia na'ko hit aok-bian nai' Epafras. Nai' Epafras naan es re' hit partei anbi mepu mese' re' hit tneek. In nmakoe he nanaob Kristus In mepu anbi hi sonam ma hi tnanam.a 8 In natoon kai mbi bare ia anmatoom hi maneekm ein, re' Uisneno In Asmaan ee anfee nrair je neu ki.
9 Natuin rasi naan, anmurai na'ko oras hai mneen rasi anmatoom nok ki, hai m'onen piut-piut ma amteek ki. Hai mtoit Uisneno he hi bisa mihiin In roimn ee batuur-batuur, ma hi mihiin rasi mfaun antein, natuin saa' re' Uisneno In Asmaan ee nanoni' ki sin. 10 Nok ranan naan, hi bisa mmoin mimnoon gwah, ma meik Uisneno In kanan arekot. Ma hi bisa mharineb Uisneno In nekan anbi are' kanan rasi msa'. Karu hi mikrira' hi nekam arekot sin meu tuaf bian, Uisneno of anfee ki upan arekot. Nok ranan naan, hi bisa mihiin mirek-reko' Uisneno piut-piut.
11-13 Hai m'onen amtoti msa' he Uisneno nfee In kuasa ma'tani' naan, he hi bisa misaah are' kanan rasi nok neek sabaar. Hai mtoit he hi neekm ein nahenun nok rais marine, he hi mtoit makasi piut-piut meu Ama' Uisneno. Fin In nfei ranan he hi bisa mtoup pusaak na'ko sonaf neno tunan. Pusaak naan, In nfee je neu are' kanan apirsait neu Yesus Kristus. Natuin In nsoi nafetin kit na'ko kuasa meis'okan, rarit nataam kit tjair Yesus Kristus Iin na, he tatua tbi meu'-sine'. In nait na'ratan Yesus Kristus amsa', he njair hit Usif. Nai' Yesus naan, Uisneno In Aan neka'. 14 Uisneno annona' In Anah naan, he nsoi nafetin naan kit, ma nnoes nain hit sanat ma penu sin.b
Kristus naan na'raat anneis-neis
15 Kristus naan, huma' mese' nok Uisneno,
re' mansian ii ka bisa niit Ee fa.
In nbi nain naan nahuun na'ko are' kanan saa',
ma In njari 'Nakaf ma Usif neu are' kanan saa' re' Uisneno anmoe' sin.
16 Fin Uisneno anpaek Je,
he nmoe' naan neon gwe ma pah-pinan ia in afan ma in nesan sin ok-oke'.
In nmoe' are' kanan saa'-saa' re' mansian ii bisa niit sin,
ma saa'-saa' re' mansian ii ka bisa niit sin fa.
Tait i'tope' on re': anaa' aprenat sin, anaa' kuasa sin,
uisf ein, ma a'naakt ein.
Are' saa'-saa' re' Uisneno he nmoe' sin naan,
In nmoe' sin neu Yesus Kristus,
ma Yesus amsa' es re' anmeup sin ok-oke'.
17 Nahuun na'ko are' saa'-saa' ii he njari te,
In nbi nain naa.
Are' saa'-saa' re' anbi naan, mafutu' nok Ne,
ma In es re' an'ator sin.
18 In es re' anjari 'Nakaf neu apirsait ein ok-oke',
ma apirsait ein anjarin on re' In aon.
Fin In es re' nanaob sin ok-oke'.
Na'ko are' kanan amates re' anmoni nfanin,
In es re' pentiing anneis-neisi,
maut he In es re' na'raat anneis-neis na'ko are' kanan saa'-saa' ii ok-oke'.c
19 Are' kanan saa'-saa' re' anbi Uisneno In tuan,
anmu'i msa' et Kristus In tuan,
ma naan amsa' anharineb Uisneno.
20 Uisneno npaek Yesus Kristus,
he narame' are' kanan saa'-saa' re' In nmo'e nrair sin naan nok Ne.
In nnona' ma nfee In Anah,
he njair fua'-turu' re' nat'opab In naa',
ma nmate nbi hau nehe,
he are' kanan saa'-saa' anbi neon gwe tnanan,
ma are' kanan saa'-saa' anbi pah-pinan,
bisa nmarame' nfain nok Uisneno.d
21 Unu' te, hi kiim ammoni mbi mone' mainuan, mi'roo mi'ko Uisneno. Hi mmusun Uisneno, natuin hi neekm ein nameis'okan, ma hi mmoe' maufinu re' anraabn Ee piut-piut. 22 Maski on naan amsa', mes oras ia In es re' anfei ranan he hit bisa tmarame' tok Ne. Natuin In es re' ansonu' In Anah he njair mansian. Ma In es re' anfee In Anah naan, he njair fua'-turu', nok ranan anmaet anbi hau nehe, he hit bisa tmarame' tfain tok Ne. Yesus Kristus anmoe' on naan, he In bisa neik kit atfain, he thake tbi Uisneno In human ma In matan, he tjair tuaf-tuaf akninu', neek amneot, ma ka tmui' fa sanat attein. 23 Onaim hi ro he maran ma mtahan piut ambi hi pirsait naan. Amnaa' miher-heran he kais na'oni'! Kais amtet-koit mi'ko Rais Reko naan, re' hi mneen ma mtoupu mrair Je oras ahunut naan. Fin hi bisa mi'peis om meu Rais Reko naan. Tuaf-tuaf annaon ma natoon Rais Reko naan anbi bare mee-mee et pah-pinan ia. Ma Uisneno anhaefa' kau, nai' Paulus, he au a'nao utoon ma usine' Rais Reko naan amsa'.
Nai' Paulus anmeup he ntuthae Uisneno Iin na
24 Oras Kristus anmoni nbi pah-pinan ia, In napein ha'mu'it. Ma au usaah ha'mu'it huma'-huma' oras ia msa'. Maski on naan amsa', mes au neek ii anmariin piut. Karu nmui' tuaf re' ro he napein ha'mu'it ate, maut he au 'ok usaah ha'mu'it naan, on re' Kristus nasaah ha'mu'it neu Iin na. Natuin Iin na, nahuum on re' In aon. 25 Uisneno anfee nrair kau mepu he au 'tuthae Iin na. Es naan ate, au unoni' In Kabin ma Prenat sin neu ki tar namnuut. 26-27 Anbi oras ahunut ate, mansian ii nneen Uisneno In Kabin ma Prenat. Mes sin ka nahiin batuur-batuur fa fe' Kabin ma Prenat naan In sarit. Uisneno In Kabin ma Prenat In sairt ii ma'nifa', onaim sin ka nahiin Je fa maat-maat. Mes oras ia, Uisneno nafeek anrair he nfei ma'nifa' naan neu Iin na. Ma In sarit naan, anjair beno re' anpiin ma nakraah neu are' kanan uuf ma pah anbi pah-pinan ia. Beno naan, es re':
Kristus anmoin et hi neekm ein!
Naan es re' anmoe' ki he hi mpirsai piut am mak,
In of anmoe' are' kanan rasi re' reko nneis-neisi neu ki aar ki anbi sonaf neno tunan.
Rasi re' ia, re' mansian kit aar kit atpa-pao na'ko un-unu'.
28 Onaim hai mitoon meu are' kanan mansian anmatoom nok Kristus. Hai minoni' sin aar sin, ma mimnaub sin imsa', ampaek are' tenab ma ronef re' Uisneno anfee sin neu kai. Hai mmoe' on naan, he mifaof ha'tain nekaf meu are' tuaf re' natuin Kristus, he sin bisa nhaken nbin Uisneno In human ma In matan. Ma anbi oras naan sin ka namaeb ok fa, natuin sin nmonin nok neek amneot ma amnonot. 29 Etun au 'paasn ok ma 'meup ma'tani' 'eu ki. Au bisa 'aran ma 'tahan, 'meup ma'tani' on naan, natuin Kristus In kuasan es re' nha'tain kau. Ma In kuasan naan, ma'tain re'uf!