Nai' Paulus namnau in mepu nbi Tesalonika
2
Aok-bian aar ki! Hi aar ki mihiin, oras hai iim ma mmepu mbi Tesalonika te, hai ka mporin fa hai suus-haet naan ruum-ruum. 2 Hi mimnau msa', oras hai ka iim fa fe' ambi kota Tesalonika te, abitan kota Filipi sin nasusab ma nha'mu'i nrair kai. Mes Uisneno nha'tain kai, he hai mibrain he mitoon Uisneno In Rais Reko meu ki, maski too mfaun ein anmusun kai.a 3 Oras naan, hai meik Rais Reko meu ki mbi kota Tesalonika, hai ka meik fa noni' re' neik ki neu raan amre'ut. Hai ka iim fa he miboo, ai' mputa-kriu ki.4 Oras naan, hai iim nok neek akninu' ma mne'o. Uisneno neikn On anruur ma nreek kai, he hai meik Rais Reko meu ki. Hai ka mroim fa he mhariin mansian ii in nekan, mes hai mroim he mhariin Uisneno In nekan, natuin In es re' ansuu' hai neekm ein nak, namneo ai' npeun.
5 Hi mihini msa' mak, hai ka mkopo' ki fa, saa' antein he maim ranan he mipein roit na'ko ki. Uisneno nahiin nain hai neekm ein. 6 Hai mmepu msa', ka neu fa he mipein bo'is na'ko mansian, ai' na'ko ki, ai' na'ko biak ein. 7 Hai re' ia, Kristus In haef ein. Hai mmui' hak he mmoe' jom on re' a'naet ein, mes hai ka neu he maiks om fa on re' naan. Oras naan, hai mmoe' jom on re' ri'ana' re' natua nok ki.b Hai mikrira' msa' rais manekat meu ki, on re' bifee asusu' ri'ana'. 8 Hai ka iim fa neu haa he mfee ki Rais Reko, mes hai mnona' ki hai tuam ein ii ok-oke', natuin hai mneek miis ki.
9 Aok-bian aar ki! Hi of mimnau fe' amsa', hai mmeup fai-manas nok ma'tani', he hai mitaah ma misaah kiim hai 'monim naan. Hai ka misusab ki fa, oras hai meik Rais Reko naan meu ki. 10 Hi aar ki miit ma msaksii, ma Uisneno njair saksii msa' nak, oras hai mok ki apirsait ein abitan bare naan, hai mmoin nok neek akninu' ma mne'o, ma ka mmoe' fa sanat mese' msa'. 11 Hi mihiin mak, hai m'urus ki ok-oke' on re' aam honi' n'urus in aanh ein, 12 es re' hai mha'tain hi neekm ein, mimnaub ki nok rasi huma'-huma', ma mfuir ki, he hi mmoin nok reko ma mharineb Uisneno In nekan. Fin In re' anjair Usif, es re' no'en ki he mtaam amjair In nonot-asar, ma mipein sapaaf ambi In pinan ma krahan amsa'.
Uisneno nmeup et hi neekm ein
13 Hai misaeb makasi ka natfeek niit fa meu Uisneno, natuin oras hi mneen Rais Reko naan mi'ko kai, hi ka mtoup fa mansian ii in uaban, mes hi mneen ma mtoup Uisneno In Uaban. In es re' neikn On anmepu mbi hi neekm ein naan sin naank ein.
14 Aok-bian aar ki! Hi fe' mmurai mituin Uisneno In ranan, mes hi aom-bian sin re' hi mok sin pah mese', nasusab ki. Nok ranan naan, hi mnaben miit amsa' mok apirsait ein propinsi Yudea, re' sin napenin susat ma ha'mu'it na'ko sin atoin Yahudis kuuk, natuin sin npirsain neun Yesus Kristus.c
15 Anmui' atoin Yahudis re' ka ntoe natuin fa Uisneno In romin. Etun oras Uisneno nreek haefan In mafefa kniun' ein neman neu sin ite, sin nasusab ma nha'mui' sin, ma na'maet sin. On naan amsa', sin na'maet Usif Yesus. Oras ia, sin namin ranan he ntitar napoitan kai ntein. Sin nmusun nok sekau-sekau gwah. Natuin are' kanan rasin naan, etun Uisneno ka nroim sin fa.d 16 Rais jes antein, sin nmo'en ekat huma'-huma', he hai kais meik Uisneno In Rais Reko ia meu tuaf ambi pah bian antein. Atoin Yahudis sin ka nromin fa he Usi' nsoi nafetin tua 'teta'. Nok ranan naan, sin ntao sin saant ein na'unu' ma na'tuup ok piut. Etun Uisneno natoo' ma nhukun sin.
Nai' Paulus anroim he nateef nok apirsait ein abitan Tesalonika antein
17 Aok-bian aar ki! Maski oras ia hit tmaka'roon, mes hit neek ein kais on re' naan. Hai maim oras, he karu reko te, hai mfain iim amtein he miteef mok ki, natuin hai mimnau ki re'-re'uf. 18 Au kuuk, au 'soba' ufan-fain he 'eit i'kius ki, mes niut reu'f ein sin a'naakt ee, n'eka' kau piut. 19 Hi mihiin mak, nansaa' am es hai he iim amkius ki? Hai he iim, natuin hai mharap ma mifnekan meu ki. Hi es re' mhariin ma mi'naeb hai neekm ein. Fin sekau ntein' es re' nnaa' naher-heran Usif Yesus In kanan, karu ka hi fa! Karu hit Usi' ankoen On anfain neem, hai mibei' he mi'aiti' hai 'naakm ein, natuin hi raism ein naan. 20 Batuur! Hi es re' mi'naeb hai neekm ein ma mhariin kai.