2 Hi ro he m'onen piut-piut. Ma hi ro he mikeo ma msadaar are' kanan rasi re' hi mi'uab sin meu Uisneno, ma oras am'onen hi neekm ein naan ro he naheun nok sukuur. 3 Kais amnikan he m'onen amteek kai, ma mtoit Uisneno he nfei ranan he hai bisa mitoon meu tuaf-tuaf, rasi re' unu' te ma'nifa' anmatoom nok Kristus. Mimnau, au 'taam bui re' ia, natuin au utoon 'eu tuaf sin anmatoom nok Kristus. 4 Am'onen he au bisa utoon ma 'boot-beon Rais Reko naan tar namnuut, maut he tuaf fatuf re' anneen ma antoup Gwe, bisa nahiin ma nakeo Gwe kninu'.

5 Ammoin namnoon ambi tuaf-tuaf re' ka npirsain fa fe' neun Kristus sin sonak ma sin atnanak. Ampaek tabu ma eti rek-reko re' Uisneno anfee je neu ki.^b 6 Karu hi mi'uab ate, mi'uab meik haan ba-baun nok neek a'paran he antoom atoni' in nekan. Kais sin nrenan ma nbosan hi uab ein naan. Ampaek uab reko batuur-batuur, he hi bisa mitaah sin rek-reko, karu anmui' tuaf nataan ki.

7 Nai' Tekikus of neit. Rarit in of anpeo ma nareta' ki au kberok anbi bare ia. In re' naan, hai aok-bian re' hai mneek, re' na'kii' anbi tuthaes neu Uisneno Iin na. Unu' te, in nok kau minaob Uisneno In mepu.^c 8 Au 'reek ma 'haef ee neit neu naan, he in bisa nha'tain hi neekm ein naan, ma bisa anpeo ma nareta' ki saa'-saa' re' anmatoom nok kai anbi bare ia.^d 9 Au 'reek nai' Onisimus anfain neit he nok nai' Tekikus amsa'. In re' naan, hi ja kiim. Sin nua sin naan, of anpeon ma nareet ein saa'-saa' re' anjari nrair anbi bare ia.^e

10 Nai' Aristarkus ansonu' haan tabes ma haan buseet neu ki. Sin nataam ee es bui nabua nok kau. Nai' Barnabas in oirf es, kaann ee nai' Markus, ansonu' haan tabes ma haan buseet neu ki msa'. Unu' te, au 'ba'an 'ain, karu nai' Markus anfain neem ankius ki te, amtoup gwe rek-reko.^f 11 Nai' Yesus, (re' hit teek ee msa' tak “Nai' Yustus”) ansonu' haan tabes ma haan buseet neu ki msa'. Na'ko partei nggwin ok-oke' re' nanaob Uisneno In mepu, suma tuaf teun nggoah re' anjarin atoni Kristen na'ko uuf ma nonot Yahudi. Ma sin re' ia, es re' anha'tain au nekak.

12 Hi partei nai' Epafras es ia msa'. In ansonu' haan tabes ma haan buseet neu ki msa'. In njair Yesus Kristus In aan renu'-aan reka'. In n'onen ma'tani' fai-manas ma anteek ki, ma ntoit Uisneno he nha'tain ki, namtisib ki, ma nmoe' ki he hi mihiin batuur-batuur In romin.^g 13 Au utoon 'ain ki m'ak, nai' Epafras naan anmeup ma'tain 'een neu ki, ma neu atoni Kristen sin et kota Laodikia ma kota Herapolis.

14 Haan tabes ma haan buseet na'ko nai' Demas, ma dokter Lukas, re' hit aok-bian manekat sin.^h

15 Au 'sonu' haan tabes ma haan buseet 'eu aok-bian apirsait ein re' abitan kota Laodikia. Kais amnikan he msonu' au haan tabes ma haan buseet meu ain Nimfa ma apirsait ein re' nati' te nabuan anbin in umi.

16 Karu hi abit Kolose aar ki amrees amrair surat re' ia te, amsoun ee nkoon meu apirsait ein kota Laodikia he sin bisa nresan amsa'. Ma hi ro he mrees surat re' au 'sonu' 'iit ee 'eu sin amsa'.

17 Mimnaub nai' Arkipus am mak, “Ho kais amnikan he munaob piut ho mepu tar namsoup, mepu re' ho mtoup gwe na'ko Uisneno.”ⁱ

18 Kais amnikan, sin nataam kau et bui ia fe'.

Au 'toit he Uisneno nakrira' ma naruru' In nekan arekot neu ki aar ki.

Amkius kiim, surat re' ia, au 'teken ma 'nene, 'eik kuuk au 'nimak,