Hai msonu' surat re' ia meu apirsait ein neu Yesus Kristus aar ki et kota Filipi. Ma hai mromi msa' he are' a'naak jemaa't ein, ma tuaf-tuaf re' anturun a'naak jemaa't ein amsa' nahiin narek-reko' surat re' ia in afan.

2 Uisneno naan, hit Ama'. Ma Yesus Kristus naan, hit Usi'. Rarit hai mtoit he Sin nakrira' Sin nekak arekot neu ki, he hi mmoin mbi mamut, rame' es nok es, ma tainina'.

3 Maski a'roo gwen au ka 'iit ki fa, mes au ka 'nikan ma 'niahan ki fa. Oras au umnau ki, au 'toit makasi 'eu Uisneno, natuin hi mpirsai meu Ne piut. 4 Au neek ii nmariin oras au 'onen ma 'teek ki, 5 natuin na'ko neno re' hi mtoup Uisneno In Rais Reko, hi minaob In meupn ein piut mok kau. 6 Naan nakrira' nrair nak, Uisneno anmeup et hi nekam nanan. Ma au uhiin batuur-batuur 'ak, In of nanaob In meup arekot naan piut, tar antea namtiis, oras Yesus Kristus ankoen On anfain neem.

7 Batuur au ro pantas he 'neek ki, natuin au neek ii na'kii' nok ki na'ko unu'. Neon gwes ii, hi mmeup mok kau oras au utoon Uisneno In Rais Reko, ma oras au utaah tuaf-tuaf re' anraban Rais Reko naan. Maski au 'taam bui msa', mes hi ka misaitan kau fa. 8 Uisneno neikn On nahiin nak, au neek ii namnau ki batuur. Natuin au manekak 'eu ki naan, nahuum on re' Yesus Kristus In manekan.

9-10 Onaim au 'onen ma 'teek ki on nai: au 'toit he hi rais manekat es nok es naan mifaof ma msaot gwe piut, tar antea nat'oop ma nsai. Au 'toit he Uisneno nturun ki msa', he hi mihiin batuur-batuur mee es reko, he hi bisa mmoin nok kninu'. Rarit oras Kristus nafeek are' kanan mansian ii sin raisk ein ate, In natoon am nak, hi ka mmui' fa sanat ma penu mese' msa', 11 natuin In kuun es re' nakninu' hi neekm ein naan, he hi mmoin nok amne'o ma namnoon. Nok ranan naan, tuaf bian sin naikas ma nbo'is, npures ma nait na'rat-ratan Uisneno.

12 Aok-bian manekat aar ki! Au 'roim he hi mihiin mak, anmui' tuaf re' nasusab kau, tar antea sin nataam kau nbi bui. Mes Uisneno In Rais Reko sin ka n'o'of naan Ee fa, 13 tar antea soraur apaot ein anbi uim jabatan, ma are' bian antein nahinin amsa' nak, au 'taam bui natuin au utuin Yesus Kristus.^a 14 Rarit Uisneno Iin na re' abitan bare ia nak, Uisneno nmoe' on naan oras au 'bi bui. Etun sin nabranin piut, tar antea ka namtaun ntein' ein fa gwen. Rarit sin na'uab ein Uisneno In Kabin ma Prenat anbi bare-bare nok maat-maat.

15-17 Anbi bare ia, anmui' tuaf pukan nua re' anmakoen he nanoni' anmatoom nok Kristus. Es re', bian anmepun nok neek amne'o ma namnoon, ma bian anmepun nok neek abeot ma npeun. Sin re' anmepun nok neek amne'o, sin neek ein reko nok kau. Sin nahiin narek-reko' nak, au usaah kuuk au susat re' ia, natuin au unaob au mepu, ma ka 'tet-koit 'iit fa msa'.

Mes ameput re' anpaek neek abeot ma npeun re' naan, sin namin he sin kaank ein mateek ein, ma sin anmasuntirun es nok es. Sin nbetis ma nbatis apirsait ein, asar anmui' tuaf he natuin sin. Fin sin namin ranan he naikas sin tuak ein nak, sin ma'tain ein anneis na'ko kau. Sin nateenb ein am nak, karu nmui' tuaf re' natuin sin ite, naan of nafaof au susat a'bi bui.

18 Mes amkonan sin on re' naan. Au ka 'toe fa karu atoni' nanoni' nok neek amne'o, ai' kaah. Re' pentiing, sin nanoni' anmatoom nok Kristus! Re' naan anharineb au nekak.

Ma au 'mariin batuur-batuur amsa', 19 natuin au uhiin 'ak, hi m'onen amteek kau, ma Yesus Kristus In Asmaan ee anturun kau. Etun au uhiin in amsoupk ein, ro mamut. 20 Maski au 'moin, ai' au 'mate msa', ka saa'-saa' fa. Asar Uisneno npaek kau he 'ait u'ratan Usif Yesus in kanan, ma unoni' maat-maat anmatoom nok Ne, tar antea ka tiit tain fa saa' es antein re' nmoe' kau he umaeb ok. Are' kanan rasin re' ia, es re' au ufnekan ma 'harap piut-piut, u'ko unu' tar antea oras ia.

21-23 Au utenab on nai: karu au 'moin 'mafuut 'mates a'bi Kristus, ma unaob In mepu naan piut, naan reko. Mes karu au 'maet, au upein pa'e ko'u nneis. Natuin au bisa usaitan pah-pinan ia, ma 'moni 'fain he utua 'ok Kristus a'bi sonaf neno tunan. Etun au neek ii na'oni', onaim au ka uhiin fa mee es re' reko nneis-neisi. 24 Onaim on nai! Natuin hi amperluu kau fe' 'bi ia, reko nneis au utua ubaar 'ok ki 'bi pah-pinan ia. 25 Au 'pirsai, au toon a'moin 'aan ii of a'roo fe', onaim au bisa 'ok ki fe'. Fin Uisneno nroim he au 'ha'tain hi neekm ein, rarit hi mpirsai Je piut nok neek marine. 26 Onaim hi of bisa maikas ma mait mi'rat-ratan Yesus Kristus In kanan, natuin In nfei nrair ranan he au 'eiti 'kius ki 'tein.

27-28 Maski on mee-on mee msa', mes hi 'moinm ein naan ro he batuur, natuin hi re' ia, Uisneno Iin na ki. Onaim hi ro he mmoin mok reko, ma mmoe' mituin saa' re' Kristus In Rais Reko naan natoon anrair ki sin. Rarit, karu au 'jair he 'eiti 'kius ki, ai' suma 'neen ahaa na'ko tuaf amsa' nak, hi mmoin nok rek-reko te, au bisa 'mariin. Fin au bisa uhiin 'ak, hi mmoin nekaf mese', natuin hi mmafutu' mok Asmanaf mese'. Ma au bisa uhiin 'ak, hi mpaasn om he minaob Usif Yesus In Rais Reko bu'-bua', he tuaf bian anpirsain amsa'. Ma hi ka mimtau fa msa', maski anmui' tuaf anraban ki. Naan anjair tanar neu musun sin nak, Uisneno anroim he nait inporin sin. Mes In nsoi nafetin ki, he hi bisa mmoin mok Ne piut. 29 Natuin Uisneno In neekn ee reko, In nfei ranan he hi bisa mpirsai meu Kristus, ma mjair Iin na. Ka neu he mpirsai jah fa, mes In anfee mainuan amsa' he hi mipein susat, natuin hi mituin Ee te. 30 Au 'neen anmui' tuaf anbi bare naan re' anraban ki, natuin hi minaob Kristus In Rais Reko. Mimnau, neon gwes ii, sin anraban kau on naan amsa'. Ma oras ia, sin on re' naan piut fe'.^b