2 Au 'toit bifee nua' ein, es re' bi Yodia ma bi Sintike, he sin kais anmatoen ntein' ein. Sin ro he nmaraem ein, he nmonin reko es nok es. Natuin sin nua sin, sin Uisn ee mese', es naan ate, sin nua sin anmafutun njarin mese'.

3 Ba'e! Au 'toit he ho m'urus hit aok-bian bifee nua' ein naan, tar antea sin narekon nfanin. Natuin unu' te, sin nmepun ma'tani' he nturun kau he natonan neu tuaf bian anmatoom nok Uisneno In Rais Reko. Sin anmeup nitan on re' naan amsa' nabu-buan nok nai' Klemens, ma partei bian antein. Sin aar sin re' naan, sin kaank ein matu'i nrair et Uisneno In daftar re' ntui kanaf neu tuaf-tuaf re' of anmoin nabu-buan nok Ne anbin sonaf neno tunan.

4 Natuin hi mtaam amrair ma mjair Uisneno Iin na, es naan ate hi neekm ein ro he nmarinan fai-manas. Au ufani' 'tein ki: mharineb hi neekm ein piut!

5 Hi ro he mneka'paar meu sekau-sekau gwah. Ma kais amnikan am mak, Usif Yesus In oors ii anpaumaak een he ankoen On anfain neem. 6 Karu hi mipein susat ate, hi kais neekm ein nabatin akre'o msa'. Mes am'onen amtoit Uisneno he nturun ki anbi are' kanan rasi. Ma anbi are' kanan rasi re' hi mtoit sin naan ate, kais amnikan he mtoit makasi meu Na msa'. 7 Karu hi mmoe' on naan ate, of Uisneno nmoe' hi neekm ein naan, na'teen am antainiin ein. Ro batuur, mansian ii ka bisa fa he nahiin batuur-batuur neek a'tena' re' hit tapein je ta'ko Uisneno. Mes natuin hi mpirsai meu Yesus Kristus, Uisneno re' na'tena' hi neekm ein naan, anroim he npafa' ma npanat hi neekm ein naan ma hi teenb ein he kais namre'un.

8 Aok-bian aar ki! In uun ii on nai: kais mitenab rafu'-rafu'. Mes ampanat hi teenb ein naan he mitenab are' kanan rais reko re' natai nok Uisneno In nekan, ma mitenab are' kanan rais reko re' nmoe' tuaf bian sin neek ein anmarinan. Hi ro he mitenab amne'o ma kninu'. Mitenab are' kanan rais reko re' batuur ma namiin. Maim ranan he tuaf bian napenin hormaat. Maim ranan he mi'ratan meu rais reko. Ma kais misnasab he mitenab rais rekon ia ok-oke'. 9 Au unoni' 'rair ki utuin Uisneno In raan a'honis. Hi ro he mait i'tope' mi'ko au 'monik amsa', ma mmoe' mituin are' kanan rais reko re' au u'uab 'iit sin ma 'moe' 'iit sin. Karu hi mituin on naan ate, Uisneno anha'tain hi neekm ein naan, he hi neekm ein naan na'teen ein ma bisa mmoin nok mamut ma rais rame' es nok es.

10 Au 'toit makasi, pures ma bo'is 'eu Uisneno, natuin hi ka mnikan kau fa. Au uhiin 'ak, nahunu te, hi mimnau kau, mes hi ka mipein fa oras he mturun maan kau. 11 Au 'ka utenab he 'toit fa saa'-saa'. Fin au ka 'kuran ma 'rabu fa saa'-saa' amsa', natuin au unoni' au tuak ii, he unokab au tenab a'paek saa'-saa' re' anmu'i nbi naan. 12 Au 'moin 'iit ka 'paek fa saa'-saa' nahuum bare'. Au a'moin 'iit amsa' nok saa'-saa' ii namtiis ma nathoen. Au 'naben 'iit tai-ruman, ma au 'naben 'iit oras au umseen. Anbi are' kanan rasi, au unoni' rais ma'nifa' he au bisa 'aran ma 'tahan a'bi 'monit. 13 Au bisa usaah are' kanan rasi, natuin Kristus es re' anha'tain ma ntao kau 'be'if ma'tani'.

14 Maski on mee msa', au 'toit makasi, natuin hi mikrira' mrair kau hi nekam arekot naan, ma amturun kau a'bi susat. 15 Unu' te, oras au usaitan propinsi Makedonia he 'nao utoon, a'saksii ma 'boot-beona' Uisneno In Rais Reko anbi bare bian sin, suma hi abit Filipi es re' amturun kau meik noni-roit. Jema'at bian sin, kahaf. Mes hi mihiin reta' naan. 16 On re' oras au 'bi Tesalonika msa', hi msonu' kau roit no gwes a'nua, he mturun ma mbaab kau.^a 17 Oras ia, au ka utenab he 'toit fa saa'-saa' na'ko ki. Fin au 'roim he Uisneno es re' anfee ki tetus-athoen, natuin hi neekm ein naan reko neu kau. 18 Au 'toup hi ook-soun ein naan na'ko nai' Epafroditus. Naan anjair tetus-athoen neu kau, tar au ka 'kuran fa saa'-saa' antein. Naan amsa' on re' fua'-turu' re' anfoo mein, re' tuaf nout gwe he na'besan Uisneno. Ma Uisneno antoup fua'-turu' naan, natuin naan anharineb In nekan.^b

19 Uisneno re' au u'bees 'eu Na ji, amu'it ma'tani'. Ma In nahiin saa'-saa' re' hi mperluu sin amsa'. Rarit In of nakrira' In nekan arekot ma nfee In tetus ma'tani' neu ki, natuin hi mmafuut ma mi'kii' ambi Yesus Kristus. 20 Onaim maut nai he hit tait ma ttuna' ta'rat-ratan Ama' Uisneno In kanan tar antea nabar-baar. Naan ro tebes namneo, batuur!

21 Au 'sonu' haan tabes ma haan buseet 'eu tuaf-tuaf re' natuin Yesus Kristus et kota Filipi.

Au partein re' abitan ia msa', ansoun ein haan tabes ma haan buseet on naan neu ki aar ki.

22 Apirsait ein ok-oke' abitan kota Roma ia, ansoun ein haan tabes ma haan buseet on naan amsa'.

On naan amsa' aok-bian sin re' anmepun et uis kou' gwi in sonaf. Sin nsoun ein haan tabes ma haan buseet neu ki aar ki.

23 Au 'toit he hit Usi' Yesus Kristus, nakrira' In nekan arekot neu ki aar ki.