2
Hi aar ki re' mitua et kota Kolose, rarit sin re' abitan kota Laodikia, ma re' tuaf-tuaf re' ka nateef niit kau fa. Au 'roim he hi aar ki mihiin au 'meup ma'tani' 'eu ki, ma 'eu sin. 2 Au sairt ii, he 'ha'tain sin neek ein ok-oke', he sin nmafuut ein anjarin mese' natuin sin aar sin anmanek-nekan. Rarit sin neek ein nateen, natuin sin nahiin batuur-batuur Uisneno In sarit re' unu' fe'e te, ma'nifa'. Rais ma'nifa' naan, es re' Kristus. 3 Karu hi mmafutu' mjair nekaf mese' mok Kristus, na' In natoon tenab ma ronef re' hi mperluu, ma nanoni' ki npaek tenab ma ronef he mmoe' are' kanan rais reko. Tenab ma roenf ein naan, nahuum on re' pusaak re' ma'oos' ate rek-reko.4 Au utoon ki rasin re' ia ok-oke', he kais anmui' tuaf neem ma na'uab na'moe he nputa-kriu naan ki. 5 Au u'roo 'ok ki. Maski on naan amsa', mes au ka 'nika' ki fa, natuin au neek ii anmafuut nok ki. Ma au 'mariin, natuin au uhiin 'ak hi mmoin reko, ma hi mnaa' miheran hi rais pirsait meu Kristus amsa'.
Hit aar kit re' tmafuut tok Kristus, tapeni 'monif re' batuur
6 Natuin unu' te, hi mtoupu mrair Yesus Kristus njair hi Usi', etun oras ia, hi ro he mneen Ee piut. Natuin In re' naan, anjair Usi' neu ki fe'. 7 Karu hi mmoin ma mmafuut mok Ne on naan ate, hi on re' hau 'ba'ak re' anseen ok antaman ntean auf gwe 'pinan. Ma hi on re' uim ma'tain es amsa', natuin nahaek ee et fatu 'sukif ma fanderen ma'tani'. Hi ro he mma'tain piut ambi hi rais pirsait, nahuum on re' hi minoni' miit sin naan. Maut he hi neekm ein naan napoitan rais sukuur, natuin saa'-saa' re' Uisneno anmoe' sin neu ki aar ki.
8 Ampaant om he kais mituin tua sona' re' anpaek mansian ii tenab ma ronef, he nteib ma nbeon ki mpoi mi'ko ranan amneot ma amnonot. Ma hi kais mituin mansian ein sin noin mahiinf ein, re' ka ma'u'u fa. Fin sin noni' naan, suma nboor ma npoi na'ko mansian ii tenab ma ronef, ma na'ko pah-pinan ia in atoorn ein. Mes noin' ein naan, ka na'uun ma na'ba'an fa nbin Kristus.
9 Are' kanan saa'-saa' re' anbi Uisneno In tuan, anmu'i et Kristus In tuan amsa'. Ma Kristus anjair mansian on re' hit amsa'. 10 Natuin hi mmafuut mok Kristus, ma mjair Iin na, etun In naheun ma namtisib ki nbi rais manekat ma amneot ein. Natuin In na'ratan nneis na'ko are' kanan kuasa, ma are' kanan anaa' aprenat, et sin re' arekot ai' amre'ut maufinu.
11 Oras atoin Yahudis sin na'heir' ein, sin nnai nain a'maet ii in pasun tunan, he njair tanar am nak, sin re' naan, Uisneno Iin na. Oras hi mtaam amjair Kristus Iin na, hi mipeni ‘'heri'’ amsa'. In sairt ii on nai: 'heri' ia ka on fa re' atnai tain pasu na'ko hit aok, mes anmatoom nok rasi re' Kristus anheir ma nnai nain are' kanan rais maufinu na'ko hit nekak. Es re' are' kanan rais maufinu amre'ut re' hit tmoe' sin, natuin hit re' ia, mansian.
12 Oras hi misrain, sin nasrain ki npaken oe. Naan huma' mese' on re' ansuub na'bua' ki mok Kristus. Rarit hi mipeni 'moin fe'u, nahuum on re' In napein 'moin fe'u msa'. Hi mipein on re' naan, natuin hi mpirsai mmak, Uisneno anpaek In kuasa ma'tani', he namonib nafani' Yesus Kristus na'ko In a'maten. In anpaek kuasa naan amsa', he nmepu nbi hi neekm ein.a
13 Unu' te, hi on re' ammate mrair, natuin hi mmui' sanat huma'-huma', ma hi ka mjair Uisneno Iin na fa fe' msa'. Maski on naan amsa', In nnoes nain hi saant ein ok-oke', ma nfee ki 'moin fe'u, nahuum on re' In namonib nafani' Kristus.b 14 Amneon ii, hit ro he tapein hukun, natuin hit tanhai Uisneno In atoorn ein. Mes In nnoes nain hit hukun sin, oras sin nkuus na'peti' Kristus anbi hau nehe.c d 15 Anbi naan, In niis nain are' kanan kuasa meis'okan, ma are' saa'-saa' re' naprenat anbi rais maufinu. Rarit In namae sin anbi too mfaun ein, sin humak ma sin matak. Naan on re' soraurs ein re' annao nmakenan ma nisan, ma oras anfain neman, anbairs ein nok marine, hunu ma sakanat ko'u, ma nakrira' sin musun re' niis nain sin naan.
16 Karu anmui' tuaf he namouf ki anmatoom nok amnahat ma mninut ate, kais amtoe mituin sin. Ma karu anmui' tuaf re' he naim rasi nok ki anmatoom nok neon rekon, ai' fesat fuun fe'u, ai' atoran neno snasat ate, kais mitniin sin.e 17 Are' kanan rasi human on re' naan, ka ma'osa' fa. Natuin rasin naan, on re' mneit ein re' namnekun oras hit tfeen ta'ko hara 'tupa'. Mes Kristus naan, ro tebe. In ro nabar-baar.
18 Karu anmui' tuaf he namouf ki natuin hi ka mituin fa atoran re' sin nmoe' kuuk sin ite, kais amneen. Karu hi mneen sin, hi ka mtoup fa rais rekon re' Uisneno he nfee sin neu ki. Mes ampaant om! Natuin anmui' tuaf re' naim ranan he namouf ki. Sin nromin he hi mi'paran hi tuam ein, ma mi'besan Uisneno In ameput neno tunan sin, natuin sin nateenb ein nak oni' mneit ii es re' nakrira' on naan. Sin naan sin tuak ein reko nneis na'ko tuaf bian. Te kaah, ka on naan fa! Sin teenb ein on re' mansian. 19 Sin ka nmafuut ein fa nok Kristus. Te kaah, In re' naan, 'Nakaf. Ma Iin na, on re' In aon re' in npairori. In nfee 'be'if ma'tani' neu Iin na piut, anpaek Uisneno In kuasan. Nok ranan naan, sin on re' nuif ma kea nbi hit aok, re' anmafutun he anmaturun es nok es, tar antea aok ii no mes-mese' anmeup nok reko.f
Karu hit tmafutu' tbi Kristus, hit tapeni 'moin fe'u
20 Hi mmate mrair mok Kristus. Rarit kuasa meis'ookn ii ka nfuut ki fa gwen anbi pah-pinan ia. Onaim nansaa' am es hi mitun-tuin pah-pinan ia in atoran huma'-huma' fe'? Sin nak on nai: 21 “Kais amnaa' ia; kais meuk ai' muah nee; kais amreo' ia.” 22 Mes atoorn ein re' naan, suma mansian ii es re' anmoe' sin, he nanoni' mansian ein. Te kaah, atoorn ein naan, suma an'ator saa'-saa' re' of namneuk. 23 Karu anmui' tuaf re' bisa nmoe' natuin atoorn ein naan, sin nak of oni' ai' atoni' anhormaat sin, ma naan sin on re' atoin ahinit, atoni' re' nanaob rais pirsait nok rek-reko, atoin neek a'parat, anha'mui' in tuan aa kuun, ma a'besat re' amakoe-re'uf. Te kaah, kahaf! Atoorn ein naan, ka bisa fa he na'bani' mansian ein sin teenb ein ma sin neek ein he nromin he nmo'en rais maufinu.