Uisneno In Asmaan ee nfee mepu huma'-huma' neu Iin na
14
Am'usaha he mmaneek es nok es ambi are' kanan rasi. Fin ka nmui' fa rasi bian re' pentiing anneisi ntein. Ma maim ranan amsa' he Uisneno In Asmaan ee anfee ki kuasa nok mahinif ma manoef, he hi bisa mmoe' rais arekot huma'-huma'. Ma re' reok gwi, karu hi mipein mahinif ma manoef he mitoon Uisneno In haan beno. 2 Fin, karu tuaf anmui' mahinif ma manoef he na'uab anpaek uab a'teta', Uisneno In Asmaan ee anfee ne kuasa he natoon rasin re' ka nakninu' fa fe'. Mes in ka na'uab fa nok tuaf bian, fin in suma na'uab nok Uisneon gwah. Ka nmui' fa tuaf re' nabua nbi naan, re' nahiin tuaf naan in uab naan. 3 Mes karu tuaf anmui' mahinif ma manoef he natoon Uisneno In haan beno, in nfee haan beno naan neu tuaf ein ok-oke' re' abitan naan. In nahake' tuaf-tuaf in rais pirsait neu Uisneno, nha'tain sin neek ein, nseu'saab ma nhaan mau tuaf ein re' neek ein ansusan. 4 Tuaf re' na'uab anpaek uab a'teta', in nha'tain kuun in nekan. Mes atoni' re' natoon Uisneno In haan beno, in nha'tain too mfaun re' nabuan, he jemaa't ein ok-oke' na'be'i nnesin.5 Au roimk ii he hi aar ki bisa mi'uab ampaek uab a'teta'. Mes au 'romi 'neis he hi bisa mi'uab mitoon Uisneno In haan beno. Fin tuaf re' natoon Uisneno In haan beno, mapake' nneis na'ko tuaf re' suma na'uab anpaek uab a'teta'. Karu mi'uab ampaek uab a'teta', naan reko amsa', asar anmui' tuaf re' bisa natoon uab naan in a'moufun. Nok ranan naan, haan beno naan bisa na'be'ib too mfaun ein abitan jema'at, he sin bisa nahinin imsa'.
6 Aok-bian manekat aar ki! Mitenab miit rasi ia. Kar-karu au 'uum 'eu ki, rarit au u'uab a'paek uab a'teta' re' hi ka mihiin je fa, hi mipein upan saa'? Ka tiit fa, tua. Mes karu au u'uab 'eu ki, reko nneis au utoon Uisneno In romin. Reko nneis au 'fei rasi re' unu' te, ka nakninu' fa. Reko nneis au 'turun ma 'baab ki he mihiin rasi huma'-huma' antea namnuut. Reko nneis au umnauba' ki 'eik Uisneno In Kabin ma Prenat. Reko nneis au unoni' ki. Nok ranan naan ate, na' anmui' in upan neu ki, tua!
7 On naan amsa' nok baer musiik ein. Fin sin ka nmonin fa, mes sin nahanan hanaf huma'-huma'. Ampaek bobe, ai' 'he'o, ai' 'reku', karu in not ee ka na'bani' fa, atoni' ro ka nahiin fa neu in nreuk siit mee ja, oo? 8 Ma karu toi's ee haan ee ka nakninu' fa, on mee he soraurs ein bisa nahinin nak, in haan tanar he sin nabaarb ein he nmakenan? Ka bisa fa, tua. 9 On naan amsa' neu ki. Karu hi mi'uab ampaek uab a'teta', ai' mpaek uab re' atoni ka nahiin je fa ma nkeukn ee, naan on re' hi mi'uab mok anin. Ruum am parsuum aah, fin atoni' ka bisa nheek fa ho sarit! 10 Anmui' uab amfaun anbi pah-pinan ia. Uab mese'-mese' te, anmui' kuun in a'moufun. 11 Mes karu au ka uhiin fa atoni' bian sin uab, naan ka nmui' fa upan saa'-saa' neu kau. Au ka uhiin fa sin uab, ma sin ka nahiin fa au uab amsa'. Hit aar kit es nok es ate, atjair on re' kase.
12 On naan amsa' nok ki. Hi he mipein kuasa nok mahinif ma manoef mi'ko Uisneno. Naan reko. Mes reko nneis hi m'usaha he mipein kuasa nok mahinif ma manoef re' hi bisa mpaek je he mha'tain apirsait ein amfa-faun!
13 Onaim karu tuaf re' na'uab anpaek uab a'teta', reko nneis in n'onen antoit he Uisneno nfee ne mahinif ma manoef msa' he in bisa natoon uab a'teta' naan in sarit. 14 Karu au 'onen a'paek uab a'teta', au 'onen a'paek au nekak, mes au ka uhiin fa neu au u'uab saa'. 15 Onaim in reokn ii, au he 'moe' on mee? Au 'paek sin nua sin, mes es-es ate nok in tabu. Au he 'onen a'paek au nekak. Ma au he 'onen a'paek uab re' au uhiin je msa'. Au he 'sii siit pures-bo'is 'eu Uisneno 'paek au nekak. Ma au bisa 'sii 'paek uab re' au uhiin je msa'. 16 Fin karu ho mpaek uab a'teta' he mpures ma mbo'is Uisneno mu'ko ho nekam, rarit anmui' tuaf bian anbi naan re' ka nahiin fa rasin naan, on mee he in bisa nekaf mese' nok ko? Oras ho mtoit makasi meu Uisneno mpaek uab a'teta', on mee he tuaf naan bisa nekaf mese' nok ko mnak, “Naan batuur, tua!” Ka bisa fa, ai'? Fin in ka nahiin fa ho uab naan. 17 Ho bisa mtoit makasi meu Uisneno on naan. Mes rasi naan ka nha'tain fa tuaf bian sin neek ein.
18 Hi of oni' ka mihiin fa. Au u'uab a'paek uab a'teta' a'neis u'ko ki ok-oke'. Ma au 'toit makasi 'eu Uisneno, natuin In nmoe' kau bisa u'uab on naan. 19 Mes karu apirsait ein nabuan, reko nneis au u'uab a'paek uab tuk-tuka' ma par-para' niim aah re' he sin bisa nahinin, he au unoni' sin, naan reko nneis na'ko au u'uab amnanu'-mnanu' a'paek uab a'teta' amfa-faun, re' sin ka nahiin je fa.
20 Aok-bian manekat aar ki! Karu hi he mroim he mihiin are' kanan rasi, hi ro he minoni' on re' tua neek amnasit. Kais mitenab on re' ri'aan a'baut ein! Mes anmatoom nok rais maufinu, hi ro he on re' ri'aan a'baut ein, re' ka nmoe' nahinin fa rais maufinu, fin sin neek ein nakniun' ein. 21 Anbi Uisneno In Suur Akninu', matu'i mnak:
“Hit Usi' na'uab am nak,
‘Au he 'paek pah re' na'uab anpaek uab a'teet ein,
he Au u'uab 'eu pah Isra'el ia.
Maski Au u'uab on mee msa',
mes sin ka nromin fa he natniin Kau, tua.’”a
22 Natuin rasi naan, hi mkius miit kiim, karu tuaf na'uab anpaek uab a'teta', naan anjair tanar neu tuaf re' ka npirsai fa fe' neu Uisneno, he sin nkius niit In kuasan. Naan ka nturun ma nbaab fa tuaf-tuaf re' anpirsai nrarin neun Uisneno. Mes karu tuaf natoon Uisneno In haan beno, naan anturun ma nbaab atoni' re' anpirsai nrair neu Ne. Naan ka nturun ma nbaab fa tuaf re' ka npirsai fa fe' neu Ne. 23 Karu hi mibua, rarit hi aar ki es-es ate ampaek uab a'teta', rarit anmui' tuaf re' ka npirsai fa, ai' tuaf re' ka nahiin fa rasin re' ia, antaam anbi hi sonam ma hi tnaanm ein, sin of nateenb ein on mee? Tebes, sin of nak, “Atoin ein ia namanun nrarin, tua!”
24 Karu hi aar ki, es-es ate mitoon Uisneno In haan beno, rarit anmui' tuaf re' ka npirsai fa, ai' tuaf re' ka nahiin fa rasin re' ia, antaam anbi hi sonam ma hi tnaanm ein, ro tebes tuaf naan anroim he nneen ma natniin saa' re' hi mi'uab ee. Onaim saa' re' hi mi'uab ee naan, naruru' ma nakrira' tuaf naan in saant ein, tar antea in nparikas namnuut in a'moin aa kuun. 25 Rais maufinun re' in na'nifa' sin anbin in nekan amsa', of mamnita' he too mfaun ein niit sin. Rarit tuaf naan of anri'tuu he na'besan neu Uisneno mnak, “Ro tebes, Uisneno et hi sonam ma hi tnaanm ein, tua!”
Are' kanan rasin re' hit tmoe' sin, atmoe tatuin in batuur aan. Kais atmoe' tafi'-tafi'
26 Onaim aok-bian manekat aar ki! Karu hi mibua, tuaf mese'-mese' nok nain kuun in mahinif ma manoef. Anmui' asiit re' nsii siit pures-bo'is neu Uisneno. Anmui' anoni' re' nanoni' tuaf anmatoom nok Uisneno. Anmui' atoon rais ma'nifa' na'ko Uisneno, re' unu fe'e te ma'nifa'. Anmui' a'uab re' na'uab nok uab a'teta'. Ma nmui' tuaf re' bisa natoon uab naan in a'moufun. Are' rasin naan, sin ro he nmoe' sin he nha'tain tuaf bian sin rais pirsait.
27 Karu nmui' tuaf re' nroim he na'uab anpaek uab a'teta', naan reko. Mes maut he tuaf nua ai' teun gwah ate, nanokab nai. Kais amfa-faun. Es na'uab anrair fe'e te, na' es na'uab antein. Ma ro he nmui' tuaf re' bisa natoon uab naan in a'moufun. 28 Karu ka nmui' fa tuaf re' bisa natoon uab naan in a'moufun, kais mi'uab ampaek uab a'teta' ambi too mfaun ein sin humak ma sin matak. Maut he sin na'uab ein on naan anbin sin neek ein kuuk. Sin bisa na'uab nok Uisneno on naan amsa'.
29 Karu hi mibua, maut he tuaf nua ai' teun gwah esan re' natoon Uisneno In haan beno. Hi bian ii ro he mtai mirek-reko' sin uabk ein naan. 30 Mes karu Uisneno nfei neu tuaf es, re' antook ma nneen anbi naan, he nahiin rais jes re' unu' fe'e te ma'nifa', tuaf naan ro he natoon haan beno naan neu abitan naan ok-oke'. Ma tuaf re' na'uab anhaek maat ro he nasnaas fe', he nfee mainuan neu tuaf re' fe' anneen na'ko Uisneno, he in bisa na'uab. 31 Amneon ii, hi aar ki bisa mitoon Uisneno In haan beno. Mes maut he tuaf es na'uab fe', rarit na' in partei. Nok ranan naan, hi aar ki bisa mneen ma mitniin, ma hi aar ki bisa minoni', ma hi aar ki bisa mnaben miit mak hi neekm ein na'be'in. 32 Mimnau, tuaf re' natoon Uisneno In haan beno, in ro he n'ator nahiin in tuan ee kuun amsa'. Tuaf es na'uab, rarit na' tuaf es, fin tuaf bian bisa ntahan in tuan ee. 33 Fin ka tiit fa taisibu anbi Uisneno. Fin anbi Uisneno, are' saa' ii makikin ma ma'ator nok reko.
Anbi mee-mee, karu apirsait ein nabuan ate, biasa on nai: 34 Bifee nggwin ro he ntokon ntainiin ein. Kais nafefan. Sin ro he nneen ma natniin neu a'naakt ein. Fin Uisneno In Atoran na'uab on naan amsa', ai'? 35 Karu nmui' bifee jes re' he nataan rais jes ate, maut he nfain fe', na' nataan neu in mone. Fin karu bifee nggwin na'roton anbin uim onen, naan tamaeb ok, tua!
36 Hi teenb ein on mee? Fin Uisneno In Kabin ma Prenat ka npoi ma nboor fa na'ko ki! Ma In Kabin Ma Prenat naan ka nfee je fa neu hi abit Korintus atmees! Mitenab mirek-reko' fe'! 37 Karu nmui' tuaf re' naan in tuan ee nak, in bisa natoon Uisneno In haan beno, ai' natenab nak, in ntoup kuasa na'ko Uisneno In Asmaan ee, in nahiin kuun am nak, rasi re' au 'tui' 'eu ki naan, ka atoran na'ko au kuuk fa, mes naan prenat na'ko hit Usi', Nai' Yesus. 38 Karu nmui' tuaf re' ka nroim fa he ntoup rasin re' ia, hi kais amtoup gwe.
39 Aok-bian manekat aar ki! Amhaek miheer he hi mipein kuasa he bisa mitoon Uisneno In haan beno. Ma kais ampenan tuaf am mak, sin ka bole fa he na'uab ein anpaken uab a'teta'. 40 Onaim karu hi mibua, minaob are' kanan rasi natai nok in batuur aan, re' pantas. Rais jes nahuun fe', na' bian natuin ein. Minaob sin aar sin nok reko, kais tafi'-tafi', tua.