Au 'tui surat re' ia 'eu apirsait ein ok-oke' re' biasa nabuan nbin kota Korintus ma propinsi Akaya.^a 2 Au 'onen 'eu Uisneno, es re' hit Ama', ma 'eu Yesus Kristus, es re' hit Usi'. Au 'toit he Sin naruru' ma nakrira' Sin nekak arekot neu ki, maut he hi bisa mmoin nok mamut, rame' es nok es, ma tainina'.

3 Hai mroim he are' kanan mansian ii naikas na'rat-ratan Uisneno In kanan. Fin In re' naan, hit Usi' Yesus Kristus In Amaf. Are' rais kasian ii na'uu ma na'baa' na'ko Ne, ma In es re' anha'tain hit nekak. 4 In es re' anseu'saab ma nhaan mau kit oras hit tapein susat. Etun es hit bisa tseu'saab ma thaan mau tuaf bian re' napenin susat amsa'. Fin hit bisa tha'tain sin neek ein, on re' Uisneno nha'tani nrair hit nekak amsa'. 5 Kristus napein susat amfa-faun neu kit. Onaim natuin Kristus annaben naan susat huma'-huma' on re' naan, etun In Amaf anha'tain hit nekak nathoe, oras hit tapein susat. 6 Karu hai mipein susat ambi ia, Uisneno nha'tain hai neekm ein. Ma karu hai mipein susat, rarit hai maran nok neek sabaar, hi ro he mihiin mak, Uisneno npaek ranan on re' naan amsa' he nha'tain hi neekm ein, ma nafetin ki na'ko rais maufinu. Fin karu hi mipein susat on re' hai, Uisneno nha'tain hi neekm ein, he hi bisa maran ma mtahan nok neek sabaar amsa'. 7 Es naan ate hai mpirsai mak, hi bisa mtahan ma'tani' ma ka mi'oni' fa. Fin hai mihiin mak, karu hi mipein susat on re' hai, Uisneno nha'tain hi neekm ein, ma In nha'tain hai neekm ein amsa'.

8 Aok-bian manekat aar ki! Hai roim ein ii he hi mihiin batuur anmatoom nok susat re' hai mnaben miit ee ambi propinsi Asia. Hai mnaben ate ma'fena', anneis na'ko re' hai he bisa misaah. Tar antea hai he ma'nuur, natuin hai mitenab mak, hai he mmaet een.^b 9 Hai amnaben ate, ma'fena', on re' tuaf es fe'e nneen afeek rasi nafeek hukun a'maten neu ne. Mes are' rasin naan anjarin, maut he hai mpirsai Uisneno, ma ka mpirsai fa hai tuam ein kiim. Fin Uisneno es re' anmui' kuasa he namonib nafani amates. 10 In es re' nafetin anrair kai na'ko maufinu, oras hai he noi mmaet. In nroim he nafetin kai na'ko maufinu. Ma hai mifnekan piut mak, In of nafetin kai na'ko rais maufinu piut-piut. 11 Karu hi m'onen ma mteek kai piut, naan anturun ma nbaab kai msa', fin Uisneno nroim he nmoe' rais reko mfaun neu kai. In he nmoe' on re' naan, natuin tuaf amfaun an'oen ein ma nteek kai. Rarit oras tuaf amfaun namnau kai, sin of antotin makasi kou'-ko'u neu Ne msa'.

12 Hai bisa mifeef a'kre'o, natuin hai mihini mbi hai neekm ein am nak, saa' re' hai mmoe' sin ambi pah-pinan ia, mituin Uisneno In romin neu kai. Hai ka mtet-koit fa na'ko mepu naan, maut he biak ein ok-oke' bisa nkius ma niit hai mmeup nok neek akninu'. Hai minaob hai mepu mpaek mahinif ma manoef^c re' ansaun na'ko Uisneno, ka mpaek fa mahinif re' na'uu ma na'baa' na'ko pah-pinan ia. Fin Uisneno naruru' ma nakrira' In nekan arekot neu kai. Es naan ate hai bisa mmeup ma'tani' ntein oras hai mibu-bua mok ki. 13 Au suma 'tui 'eu ki nmatoom nok rasin re' hi bisa mrees ma mihiin. Oras ia hi mihini mrair au sarit bian. Mes au ufnekan he hi bisa mihiin au sairt ii 'teme-'teme. 14 Oras ia, hi fe' mihini 'kreo' gwah anmatoom nok kai. Mes oras hit Usi' Yesus Kristus ankoen On nfain neem, au 'pirsai hi of mihini mfaun. Nok ranan naan, hi bisa mifeef a'kre'o nmatoom nok kai, on re' hai mifeef a'kre'o nmatoom nok ki.

15 Natuin au 'pirsai 'ak, hi mihiin rasin re' ia ok-oke', etun unu' te, au ufeek 'iit he 'eit i'kius ki 'tein, maut he hi bisa mipein tetus no nua. 16 Onaim unu' te au utenab, karu au 'jair he 'nao 'eu propinsi Makedonia, au bisa 'eis i'kius ki. Rarit, karu au 'fain 'uum u'ko Makedonia, au bisa 'eis i'kius ki 'tein. Nok ranan naan, hi bisa mturun ma mbaab kau, he au bisa 'koon 'eu propinsi Yudea.^d

17 Mes on mee, tua? Ansuun oras au utoon ki m'ak, au 'roim he 'eit i'kius ki, of oni' hi mak, au 'fe'-'fee'n aah ee, ai'? Ai', hi mak au suma ufeek rasi utuin au roimk ii kuuk, on re' tuaf bian anbi pah-pinan ia, oo? Ai' hi mak au atoin aputa-kriut, re' nak, “Tua.” Te kaah, anbi au nekak naan ii, au utenab 'ak, “Kahaf!” Of oni' hi mak, au re' ia, on re' naan, aa oo? 18 Hit bisa tpirsai teu Uisneno, fin karu In na'uab rais jes, In ro nmoe' natuin ee. Es naan ate hai on naan amsa'. Karu hai mak, “Tua,” hai ka mitenab fa mak, “Kahaf.”

19 Au 'ok nai' Silas, ma nai' Timotius minoni' mrair ki nmatoom nok Yesus Kristus, Uisneno In Anah. In ka atoin aputa-kriut fa re' nak, “tua”, mes in sairt ii, “kahaf”. In ka na'oni' fa msa', fin karu In nak, “tua”, In sairt ii batuur-batuur “tua”.^e 20 Are' kanan rasi re' Uisneno nba'an anrair sin naan, In of anmoe' sin anjarin. Es naan ate, karu Nai' Yesus anba'an rais jes nak, “tua,” hit bisa tataah am tak, “Batuur. On re' naan, tua! Amin!” Natuin hit tahiin tain saa' re' Nai' Yesus he nmo'e. Hai mitoon rasi ia he miruru' ma mikrira' Uisneno In pinan ma krahan. 21 Uisneno naan es re' anpiir naan ki ma hai msa'. In es re' nait kit atjair Iin na. In es re' anmoe' kit atmaran ma ttahan piut amsa'. 22 In es re' anfee In Asmanan he n'ator kit, naruru' ma nakrira' In reon neu kit. Naan on re' tuaf es, re' antao marak neu in baer es he natoon nak, naan iin ja.

23 Au 'toit he Uisneno kuun es re' anjair saksii neu au uabak ia. Fin In nahiin au nekak nanan. In nahiin neu saa' am es au ka 'nao fa fe' 'eu kota Korintus. Au ka 'roim fa he 'tao umaeb ki, es naan ate, au ka 'eit fa fe' 'eu naan. 24 Hai ka maikas fa hai tuam ein mjair usif he mreun ki mak, hi ro he mpirsai meu sekau. Mes hai mmeup huma' mese' mok ki, maut he hi neekm ein bisa nmarinan. Fin hi bisa maran ma mtahan ma'tani', natuin hi mpirsai meu Uisneno.