Noni-roit re' tuaf anfee sin he nturun ma nbaab Uisneno Iin na
16
Oras ia, au he 'tui anmatoom nok roit ein re' hi mibuab sin he mturun Uisneno Iin na anbin kota Yerusalem. Au utoon a'rair apirsait ein et propinsi Galatia, anmoe' on mee m'es na' sin bisa na'bua' roit ein naan. Oras ia, hi ro he mmoe' mituin on naan amsa'.a 2 Ansuun neno krei, apirsait ein ro he napasib naan sin roit ein a'kre'o na'ko sin meupk ein sin aafk ein. Kais ampao he au 'uum fe'e te, na' hi mmurai m'urus he mi'bua' roit. 3 Rarit, karu au 'uum a'tea te, hi miruru' maan kau tuaf re' hi mpirsai je, he neik roit ein naan neu Uisneno Iin na anbin Yerusalem. Rarit au 'tui surat he utoon 'eu sin neu a'naak jemaa't ein et naan. 4 Ma karu hi mitenab reko he au 'ok amsa', hai bisa mnao mibu-bua.Nai' Paulus anroim he nnao neu bare mfaun
5 Karu au 'nao 'fuun am uteef a'rari 'bi propinsi Makedonia, na' au 'eit 'eu ki on naan. Mes au he 'nao 'eu Makedonia fe'.b 6 Rarit na' au umaik 'ok ki sero 'roo; of oni' 'tea oras mainiikn ii namsoup. Rarit hi bisa mnao maat kau mtea baer jes anteni'. 7 Au sairt ii he 'uum 'eu ki ka rabah fa. Fin au he utua 'ok ki sero 'roo, karu natuin Uisneno In romin. 8 Mes au he umaika' fe' a'bi kota Efesus re' ia, oras neon ko'u Pantekosta, [es re' Paska oke' te, ankoon neno bo' niim].c 9 Natuin anbi bare ia nmui' mainuan re' reko nneis he au bisa 'meup mepu mfaun fe', maski nmui' too mfaun re' anraban Uisneno In mepu.d
10 Karu nai' Timotius anjair he neem neu ki, amtoup gwe nok reko, he in kais anmui' tenab. Fin in re' naan, hit Usi' In ameput, on re' au.e 11 Kais amkonan he tuaf ankana'paar ee. Amturun ma mbaab ee, tar antea in nfain neem nok mamut ma ao-mina', he in bisa nateef nok kau. Fin au 'ok au aok-bian re' bian sin, ampa-pao gwe.
12 Anmui' rais jes antein. Au 'furi' 'rair hit aok-bian nai' Apolos, he in neit inkius ki ma aok-bian, bian sin. Mes in ka nroim fa he neit oras ia. Karu in napein mainuan re' reko, na' in neit neu naan.
Ammoe' rais jes amtein
13 Hi ro he mpaant om rek-reko! Hi ro he maran ma mtahan he mpirsai piut meu Uisneno! Kais mimtau! Amha'tain jom! 14 Hi mmoe' saa'-saa' aah ate, mikrira' ma miruru' hi rais manekat.
15 Aok-bian manekat aar ki! Hi aar ki mihiin mak, nai' Stefanus nok in uim je nanan, anjarin apirsait ein ahun-hunut neun Kristus anbin propinsi Akaya. Ma sin nmepun nbain-'aetn ok amsa' he ntuthae apirsait ein ok-oke' nbin naan. Onaim au 'toit hef 16 hi mneen ma mitniin tuaf human on re' sin. Es re' tuaf re' anmepu nbain-'aetn on he ntuthae apirsait ein nok tuaf bian sin re' anmepun huma' mese'.
17 Au umnau he 'iit 'aan ki. Rarit, au neek ii nmariin, natuin nai' Stefanus, nai' Fortunatus, ma nai' Akaikus neman esan ia. Nok ranan naan, sin nsenu' ma nseka' ki. 18 Sin nha'tain au nekak, nahuum on re' sin nha'tain hi neekm ein amsa'. Hi ro he mhormaat meu tuaf ein on re' sin.
Nai' Paulus ansonu' haan tabes ma haan buseet neu tuaf amfaun
19 Apirsait ein pukan-pukan re' abitan propinsi Asia ansoun ein haan tabes ma haan buseet neu ki. Nai' Akila nok in fee je bi' Priskila,g ma tuaf bian re' nabua nbin sin umi nsoun ein haan tabes ma haan buseet amsa', fin sin anmafuut piut nok hit Usi' msa'.h 20 Apirsait ein ok-oke' re' abitan ia nsoun ein haan tabes ma haan buseet amsa'.
Karu hi mibua' te, ammatoup es nok es nok manekat akninu' re' arekot neu apirsait ein.
21 Amkius miit! Fin au nai' Paulus kau, au 'tui kuuk 'eik au 'niimk aa kuuk on nai: Saloom!
22 Sekau ka nmui' fa rais manekat neu hit Usi', Uisneno of anfee hukun neu ne.
Au 'roim he usee tuaf, a'paek uab Aram re' hai atoin Yahudis hai uab 'ak, “Marana ta!” In a'moufn ii nak, “Usi'! Amkoen Om uum nai, tua!”
23 Au 'toit he Nai' Yesus, hit Usi', nakrira' In nekan arekot neu ki.
24 Au 'neek ki ok-oke', natuin hit aar kit atmafuut tok Kristus, re' Uisneno nreek Ee neem.
Au 'tu'u 'bi ia gwen, tua. Saloom!
Na'ko au,
nai' Paulus, kau, tua.