Anbi puru Malta
28
Oras hai mtea mrair nok ao-mina' mbi meot ee te, na' hai mihiin mak bare naan, puru Malta. 2 Abitan puru naan antoup kai nok reko. Natuin oras naan na'uur, ma mainiikn ii kah een, onaim sin nahuup ein ai, rarit sin nak kai he mraar. 3 Nai' Paulus nsiun nok hau meto' msa'. Oras in npaan hau nggwin neu ai, nok askeken ate, kaun araut es anpoi neem, natuin in ka nabei' fa maputu'. Onaim kauna' naan, anrau ma na'kii' anbi nai' Paulus in a'niman. 4 Oras abitan Malta niit kauna' naan na'kii' anbi nai' Paulus in a'niman ate, sin na'uab ein es nok es am nak, “Of oni' atoni' ia, aroor atoni'. Maski tais je fe' nafeitn ee te, in uan ii on naan. Etun es in ka bisa fa he nmoin. Sekau es re' anmoe' re'uf te, of in nseu fuan.” 5-6 Atoin ein naan nateenb ein nak, of akreo' gwes anteni' te, nai' Paulus in a'niimn ee of anfu'un. Ma nok askeken ate, of in nmaet.
Mes nai' Paulus antekar kauna' naan neu ai. In ka nnaben fa menas saa'-saa'. Rarit sin npaon a'kreo' gwes ate, mes nai' Paulus ka saa'-saa' fa. Onaim sin nateenb ein nak, “Kais-kaisa' atoni' ia, pah tuaf!”
7 Ka na'roo fa na'ko bare naan, gubernur ee in soonf ein ma in auf mainuan ein. Gubernur puru naan, kaann ee nai' Publius. In neem anseun kai nbi tais je ninin, rarit in naskau kai he hai mitua mok ne nbi in sonaf. Anbi naan, in n'urus kai neno teun.
8 Oras naan, gubernur ee in aam hoinf ee nameen. In nkuan on. Onaim nai' Paulus annao nkius gwe nbi in ke'en. Rarit in npooh gwe, ma an'oen ee. Onaim in nareok nain. 9 Oras sin niit gubernur ee in aamf ee nareok on naan, amenat bian amsa' neman neu nai' Paulus. Sin ntotin he nareko' sin. Onaim in nareko' sin imsa'. 10a Rarit sin nseun banin kai, neik ein bare' amfaun.
Nai' Paulus sin nbokan na'kon puru Malta neun Itali
10b-11 Hai mitua mtahan mbi puru Malta funan teun, tar antea ain ko'u ma oik ko'u naan nasnaas. Oras naan, abnao gwes na'ko kota Aleksandria re' in nhaek nain anbi puru Malta. Abnao naan kaann ee, Ri'aan Koen,a natuin anmui' naan pah tuaf ankoe, re' bnao tuaf ee nmoe' sin na'ko hau, rarit anpasan nakfirit sin anbi bnao naan in matan. Onaim hai he msae bnao naan, ma mnao mkoon meu kota Roma. Onaim oras hai msae meu bnao naan, abitan Malta neik kai beti' ma bare' bian re' hai mperluu sin ambi bnao.
12 Hai mnao kre'o-kre'o, tar hai mtea kota Sirakusa et puru Sisilia. Hai misnaas ambi naan neno teun. 13 Mi'ko naan, hai mnao mteni' mibnono haa Sisilia in ninin, rarit hai mtea kota Regium. Noka' te, anin na'ko pasa' haa'-nua' nfuu nok ma'tani', onaim hai mnao mkoon ma bnao naan in nanapa'. Anmeu te, hai mtea kota Putioli. 14 Anbi naan, hai msaun misaitan abnao naan. Rarit hai mnao maim Nai' Yesus in apirsait ein anbi bare naan. Oras hai miteef mok sin, sin ntotin he hai mitua mok sin. Onaim hai mitua mtahan mok sin neno hiut. Rarit hai mnao raan meto' meu kota Roma.
15 Oras apirsait ein abitan kota Roma nnenan nak hai he iim meu kota Roma, sin neman nseun kai nbi raan atnana'. Bian nateef kai nbi 'masa' Apius; bian nateef kai nbi baer jes, kaann ee Ropo Teun.b Oras nai' Paulus niit sin on nai te, in nbo'is Uisneno, ma in neekn ee natea.
Nai' Paulus antea Roma
16 Oras hai mtea kota Roma, [soraurs ein nataam atoin bui nggwin neu bui.]c Mes nai' Paulus, sin ka nataam ee fa. Sin nkoon ee he in nseeb kuun umi. Anbi naan, in natua nok soraurs es, re' npao gwe fai-manas. Sin a'niimk ein nua sin anmatopub sin nok korenit.d
17 Neno tenu nkono te, nai' Paulus naskau atoni mnasi' Yahudi nbi bare naan, he neem nateef nok ne. Oras sin nabuan, in natoon neu sin am nak, “Aok-bian aar ki! Au 'uum a'tea ia, natuin atoin Yahudis sin anheek kau anbi Yerusalem. Rarit sin nana'at kau neu anaa' aprenat pah Roma. Te kaah, au ka 'mui' fa sanat. Au ka 'moe' fa sanat saa'-saa' re' anraban neu hit atoin Yahudis. Au ka 'moe' fa sanat saa'-saa' amsa' re' anraban hit atoran harat, re' hit ttoup tain sin ta'ko hit be'i-na'i sin. 18 Anaa' apreent ein anparikas anrair au rais ji nbi nee. Mes sin ka niit fa au sanat mese' msa', re' anmatoom nok hukun a'maten. Etun sin he nafetin kau. 19 Mes a'naet ein atoin Yahudis ka ntoup fa rasi tfeka' na'ko anaa' aprenat re' nak he nafetin kau. Es naan ate, au usaeb ukonob au rais ji 'eu pah Roma in uun ia. Au 'moe' on naan, mes au ka 'mui' fa tenab he utraak au atoin Yahudis sin.e 20 Rasi naan, es re' anmoe' kau tar au uskau he hit tabua tbi ia. Maut he hit bisa ta'uab saa' re' hit atoin Yahudis atpa-pao gwe: etun hit tharap Usif re' Uisneno he nreek Ee neem, he nfee 'honis neu kit too Israelas. Rasi re' ia, in kakain tar sin nfuut kau nok korenit re' ia, tua.”
21 Rarit sin natahan am nak, “Antea oras ia, hai ka mtoup miit fa suurt es na'ko Yudea re' he natoon kai nok ho rasi. On naan amsa', re' amneemt ein na'ko naan, sin ka na'uab niit fa ho rais ji, tua. 22 Mes hai mroim he mneen saa' re' ho mpirsai mrair je, natuin hai mneen amrair ambi mee-mee, nak too mfaun ein anpenan pukan Kristen sin noni'. Mes amneon ii, on mee te, hai ka mihiin maan ee fa. Onaim ho mureta' miit kai, tua.”
23 Onaim sin akoran he naim nanan oors es, he nateef anfanin. Antea in oors ate, too gwi mfaun ii kah een neem nabuan anbin nai' Paulus in umi. Onaim in nmurai nareta' sin Uisneno In aprenat. In nait ka'o Musa in tuis ein, ma Uisneno In mafefa kniun' ein bian sin tuis ein, he nheer sin he npirsain neun Nai' Yesus. In na'uab na'ko nok-noka' antea maans ii nmaeb.
24 Oras sin nneen anrair nai' Paulus in uaban, bian anpirsain, mes bian kahaf. 25 Sin nasurin es nok es, tar tuaf bian he nfanin. Mes nai' Paulus na'uab am nak, “Tebe! Hi surin re' ia, natai nok saa' re' Uisneno In Asmaan Akniun' ee natoon nain sin neu ka'o Yesaya 26 mnak,
‘Ho mnao mutoon meu pah re' ia mmak,
“Of hi mneen ma mitniin Au uabk ii piut,
mes ka mihiin je fa mnuut es!
Hi mkius mifan-fain saa' re' Au 'moe' ma 'tao,
mes hi ka mfairoir je fa.”
27 Natuin atoni' re' pah ia, sin neek ein ro fatu.
Sin ruik ein ka nroim he nnenan fa gwen!
Ma sin maatk ein ee, nahuum on re' he nforon nrarin!
Anparaak he sin kaisa' nnenan nai;
ma nparaak he sin maatk ein anforon.
Ma nparaak he sin neek ein na'teme nkonon.
Tar antea sin ka nahinin fa ranan he ntebin nfain neman neu Kau ntenin,
onaim Au bisa ureko' sin, on mee?’”f
28 Onaim nai' Paulus natu'ub in reta' naan, ma na'uab am nak, “On nai, aok-bian aar ki! Hi ro he mihiin mak, oras ia, Uisneno nabarab anrair he nsoi nafetin neu atoni' 'teta' re' ka atoin Yahudis fa, natuin sin nromin he nneen ma natniin Ee.” 29 [Nai' Paulus na'uab anrair on naan ate, too mfaun ein naan ansisa'en. Mes sin nteenb ein ii ka natefan fa, natuin sin nasurin es nok es.]g
30 Nai' Paulus natua nbi uim seba' naan, antea toon nua. In ntoup sekau-sekau re' neman neu ne, nok neek marine.
31 Nok ranan naan, in napein mainuan he nareta' Uisneno In aprenat, ma nanoni' Usif Yesus In Raan A'honis neu sin. In na'uab nok neek abrain, ma ka tiit fa 'eka' msa'.
Aam Teofilus. Au reta' ia na'tuuk ma na'paar on re' ia, tua.
Na'ko au,
nai' Lukas kau, tua